[Rasmei Kampuchea Daily News] - មន្ទីរសាធារណការ ខេត្តបន្ទាយមានជ័យ បើកយុទ្ធនាការស្តារប្រព័ន្ធលូ តាមផ្លូវជាតិលេខ៥៩
ដោយៈ ប.ជ័យ / បន្ទាយមានជ័យៈ លោក សុក ចាន់ថា ប្រធានមន្ទីសាធារណការ និងដឹកជញ្ជូន ខេត្តបន្ទាយមានជ័យ បានប្រាប់ឲ្យដឹងនៅល្ងាច ថ្ងៃទី១៨ ខែឧសភា ឆ្នាំ២០២២ ថាៈ មន្ទីរសាធារណការ ខេត្តបន្ទាយមានជ័យ បានបើកយុទ្ធនាការ ស្តារប្រព័ន្ធលូ ស្ថិតក្នុងទីរួមស្រុកម៉ាឡៃ ខេត្តបន្ទាយមានជ័យ ដែលមានបណ្តោយចាប់ពី ផ្លូវជាតិលេខ៥៩ ចន្លោះពី គ.ម ៤១+០០០ ដល់ គ.ម ៤៣+៥០០ និងកាយដីចាក់ខ្ពស់ ជាងចិញ្ចើមផ្លូវចេញ ធ្វើឲ្យទឹកដក់ខូចផ្លូវ មុនរដូវវស្សា ចូលដល់ ។
លោកបានឱ្យដឹងទៀតថាៈ កន្លងមក ប្រព័ន្ធលូ នៅតាមបណ្តោយផ្លូវជាតិលេខ៥៩ ចាប់ពីចន្លោះ គ.ម ៤១+០០០ ដល់ គ.ម ៤៣+៥០០ ស្ថិតក្នុងទីរួមស្រុកម៉ាឡៃ រងគ្រោះ ដោយទឹកជំននទឹកភ្លៀង និងទឹកហូរធ្លាក់ដីចូលពេញលូ ជាដុំៗ ច្រើនកន្លែង បណ្តាលឲ្យ ស្ទះ។ ដូច្នេះ ក្រុមការងារជំនាញ នៃមន្ទីរសាធារណការ និងដឹកជញ្ជូន ដឹកនាំដោយលោក ផ្ទាល់ យកគ្រឿងចក្រ មកស្តារ ចាប់ពីផ្លូវជាតិលេខ៥៩ ចន្លោះពី គ.ម ៤១+០០០ ដល់ គ.ម ៤៣+៥០០ ឡើងវិញ ។ ពោលគឺ ដើម្បីឲ្យទឹកហូរចេញចូលស្រួលឡើងវិញ មុនរដូវវស្សា ចូលដល់ ពិសេស កាយដីដែលចាក់ខ្ពស់ ជាងចិញ្ចើមផ្លូវចេញ ដោយសារវាធ្វើឲ្យទឹកដក់ ខូចផ្លូវ ដើម្បីឲ្យប្រជាពលរដ្ឋ ធ្វើចរាចរណ៍ ទៅមកបានស្រួល។
ដោយអនុវត្តតាមបទបញ្ជា ឬការណែនាំរបស់លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ក្នុងនាមប្រធានមន្ទីរសាធារណការខេត្ត ត្រូវស្ដារឡើងវិញ ផ្លូវដែលរងគ្រោះ ដោយទឹកជំនន់ និងស្តារប្រព័ន្ធលូ ស្ទះទាំង៩ ស្រុក ក្រុង។ ពោលគឺ ប្រព័ន្ធលូស្ទះ (នៃផ្លូវជាតិ និងផ្លូវខេត្ត ដែលគ្រប់គ្រង ដោយក្រសួងនិងខេត្ត) ទាំង៩ ស្រុក ក្រុង, កកស្ទះដោយដីបាក់ចូល ដោយទឹកជំនន់នោះ ក្រុមការងារ របស់លោក បានចាប់ផ្តើមស្តារឡើងវិញ ក្នុងស្រុកម៉ាឡៃ ហើយនឹងបន្តទៅស្រុក ក្រុង ផ្សេងទៀត ៕/V
