ក្រសួងសាធារណការ និងដឹកជញ្ជូន ទទួលបានឧបករណ៍វាស់កម្តៅ ចំនួន១០០គ្រឿង ជាអំណោយរបស់ក្រុមហ៊ុនព្រូដិនសលកម្ពុជា ថ្ងៃពុធ ៣រោច ខែពិសាខ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១៨ ខែឧសភា ឆ្នាំ២០២២ នៅទីស្ដីការក្រសួង លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីប្រគល់-ទទួល ឧបករណ៍វាស់កម្តៅចំនួន ១០០គ្រឿងជាអំណោយរបស់ក្រុមហ៊ុនព្រូដិនសលកម្ពុជា ដោយមានការចូលរួមពីថ្នាក់ដឹកនាំក្រសួង តំណាងក្រុមហ៊ុនព្រូដិនសលកម្ពុជា តំណាងអគ្គនាយកដ្ឋាន តំណាងអង្គភាពក្រោមឱវាទក្រសួងសរុបប្រមាណ២៩រូប។ ឧបករណ៍វាស់កម្តៅទាំងនេះនឹងត្រូវប្រគល់ជូនបន្តទៅអគ្គនាយកដ្ឋាន នាយកដ្ឋាន និងអង្គភាពចំណុះឱ្យទីស្តីការក្រសួង និងមន្ទីរសាធារណការ និងដឹកជញ្ជូនរាជធានី-ខេត្ត ដើម្បីចូលរួមចំណែកជាមួយរាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងកូវីដ១៩។ ឆ្លៀតក្នុងឱកាសនោះដែរ លោកជំទាវរដ្ឋលេខាធិការ បានស្នើឱ្យអ្នកចូលរួមកម្មវិធីទាំងអស់ចូលរួមនិយាយឱ្យបានច្រើនអំពីបញ្ហាចរាចរណ៍ផ្លូវគោកឱ្យបានគ្រប់ៗគ្នា ឱ្យដូចជំងឺកូវីដ-១៩ ផងដែរ ដោយសារបញ្ហាចរាចរណ៍នេះគឺជាបញ្ហាសង្គមចម្បងដែលត្រូវយកចិត្តទុកដាក់ឱ្យបានខ្ពស់ ដោយសារពាក់ព័ន្ធទៅនឹងអាយុជីវិតរបស់មនុស្ស។ បន្ថែមពីលើនេះ លោកជំទាវ ក៏បានស្នើសុំដល់ក្រុមហ៊ុនបន្តជួយផ្តល់សម្ភារសុវត្ថិភាព រួមមានរនាំងសុវត្ថិភាព បោះពុម្ពអាវ និងឯកសារសុវត្ថិភាព ក៏ដូចជាកៀរគរអង្គការ និងស្ថាប័នអង្គការដៃគូ ដើម្បីចូលរួមក្នុងសកម្មភាពលើកកម្ពស់សុវត្ថិភាពចរាចរណ៍ផ្លូវគោកឱ្យបានផុសផុល៕