ឯកឧត្តមអគ្គនាយក សួន ភារិទ្ធ ជួបពិភាក្សាការងារជាមួយតំណាងធនាគារអភិវឌ្ឍន៍អាស៊ីតាមប្រព័ន្ធវីដេអូពីចម្ងាយ ដើម្បីពិភាក្សាអំពីសំណើគម្រោងជំនួយបច្ចេកទេសក្នុងការរៀបចំគោលការណ៍ណែនាំបទដ្ឋានបច្ចេកទេស ថ្ងៃពុធ ៣រោច ខែពិសាខ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១៨ ខែឧសភា ឆ្នាំ២០២២ នៅទីស្តីការក្រសួង ឯកឧត្តម សួន ភារិទ្ធ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន បានអញ្ជើញជួបពិភាក្សាការងារជាមួយតំណាងធនាគារអភិវឌ្ឍន៍អាស៊ី “ADB” តាមរយៈប្រព័ន្ធវីដេអូពីចម្ងាយ ដោយមានការចូលរួមពីដឹកនាំក្រសួងទទួលបន្ទុក មន្ត្រីជំនាញបច្ចេកទេស និងភាគីពាក់ព័ន្ធ។ កិច្ចប្រជុំនេះធ្វើឡើងក្នុងគោលបំណងដើម្បីពិភាក្សាអំពីសំណើគម្រោងជំនួយបច្ចេកទេសក្នុងការរៀបចំគោលការណ៍ណែនាំបទដ្ឋានបច្ចេកទេសផ្សេងៗ ក្រោមជំនួយកិច្ចសហប្រតិបត្តិការបច្ចេកទេសជាមួយធនាគារអភិវឌ្ឍន៍អាស៊ីដែលរួមមាន៖ ១. ការរៀបចំបង្កើតបទដ្ឋានបច្ចេកទេសសម្រាប់វិស័យទឹកកខ្វក់ ២. ការរៀបចំគោលការណ៍ណែនាំថ្នាក់ជាតិសម្រាប់ការគ្រប់គ្រងស្ថានីយប្រព្រឹត្តកម្មកាកសំណល់ភក់៕