ស្ពានអាកាសស្តុបផ្សារដីហុយ ដែលជាគម្រោង ហិរញ្ញប្ប​ទាន​របស់ចិន នឹងដាក់ឲ្យដំណើរការប្រើប្រាស់ជាបណ្តោះអាសន្ត នៅថ្ងៃទី១២ ខែមេសា ឆ្នាំ២០១៨ ដើម្បីឲ្យប្រជាពលរដ្ឋបានធ្វើដំណើរឆ្លងកាត់ក្នុងឱកាសបុណ្យចូលឆ្នាំខ្មែរ ។ នេះបើតាមការបញ្ជាក់ពីរដ្ឋមន្ត្រីក្រសួង​សាធារណការ កាលពីដើមសប្តាហ៏ ។ លោក​ ស៊ុន​ ចាន់​ថុ​ល ថ្លែងបែបនេះក្រោយបញ្ចប់ពិធី​ចុះហត្ថលេខា​លើ​អនុស្សរណៈ​នៃ​ការ​យោគយល់​ឡើង​វិញ​ បញ្ជាក់​ពី​ការ​សហការ​ ដើម្បី​លើកកម្ពស់​សកម្មភាព​សុវត្ថិភាព​ចរាចរណ៍​ផ្លូវគោក​ ជា​ពិសេស​បង្ការ​ការ​បើកបរ​ក្រោម​ឥទ្ធិពល​នៃ​គ្រឿង​ស្រវឹង​នៅ​ក្នុង​កម្ពុជា ​រវាង​សម្ព័ន្ធ​ក្រុមហ៊ុន​ផលិត​ស្រា​អន្តរជាតិ​ប្រចាំ​តំបន់​អាស៊ី​ប៉ា​ស៊ី​ហ្វិ​ក​ (APIWSA)​ និង​ក្រសួង​សាធារណការ​និង​ដឹក​ជញ្ជូន​ (MPWT)​ កាលពីរសៀល​ថ្ងៃ​ទី​២០​ ខែមីនា​ ឆ្នាំ​២០១៨ ​។ លោក​ ស៊ុន​ ចាន់​ថុ​ល​ បញ្ជាក់ថា ស្ពានអាកាសស្តុបផ្សារដីហុយនឹងដាក់ឲ្យដំណើរការប្រើប្រាស់ជាបណ្តោះអាសន្ត នៅថ្ងៃទី១២ ខែមីនា ឆ្នាំ២០១៨ ដោយលោកនឹងជម្រុញឲ្យក្រុមហ៊ុនធ្វើឲ្យបានលឿនដើម្បីឲ្យប្រជាពលរដ្ឋបានធ្វើដំណើរឆ្លងកាត់ក្នុងឱកាសបុណ្យចូលឆ្នាំថ្មីព្រៃណីជាតិខ្មែរខាងមុខនេះ ។ គួរបញ្ជាក់ថា ស្ពានអាកាសស្តុបផ្សារដីហុយ មកដល់ពេលនេះការដ្ឋានទាំងមូលសម្រេចបាន ប្រមាណ៩០% ហើយ ខណៈគ្រឿងបង្គុំសំណង់ខាងក្រោមសម្រេចបាន១០០% ។ ស្ពានអាកាសស្តុបផ្សារដីហុយបានចាប់ផ្តើមបើកកា​រដ្ឋាន​សាងសង់ កាល​ពី​ចុង​ខែសីហា ឆ្នាំ២០១៦ ហើយបើតាមគម្រោងត្រូវបញ្ចប់នៅបំណាច់ខែធ្នូ ឆ្នាំ២០១៧ ប៉ុន្តែដោយមានបញ្ហាខ្លះ ក្រុមការងារបានបន្តពន្យាពេលមកឲ្យហើយនៅមុនចូលឆ្នាំខ្មែរ ។ បើតាមមន្ត្រីជំនាញបានបញ្ជាក់ថា មូលហេតុដែលបង្កឲ្យមានភាពយឺតយ៉ាវមិនបានរួចរាល់ទៅតាមគម្រោង គឺដោយសារមានបញ្ហាផលប៉ះពាល់ ពិសេសគឺបង្គោលតង់ស្យុងអគ្គីសនីកម្ពុជាមិនទាន់ដកចេញ ។ គួរបញ្ជាក់ទៀតថា ការដ្ឋានរស្ថាបនាស្ពានអាកាស ស្តុបផ្សារដីហុយ មានបណ្តោយ ៩០៥ម៉ែត្រទទឹង១៦.៥ម៉ែត្រ ស្ថិតនៅប្រសព្វរវាងមហាវិថីសហព័ន្ធ​រុស្ស៊ី និងផ្លូវហាណូយ​(១០១៩) ​ដែលជាគម្រោង ហិរញ្ញប្ប​ទាន​របស់សាធារណរដ្ឋប្រជាមានិតចិននិងទទួលបានសិទ្ធិសាងសង់ ដោយ​ក្រុមហ៊ុន សៀងហៃ ហើយត្រួតពិនិត្យបច្ចេកទេសដោយក្រសួងសាធារណការ និងដឹកជញ្ជូន ។ សូមបញ្ជាក់ថា បច្ចុប្បន្ននេះនៅក្នុងរាជធានីភ្នំពេញមានស្ពានអាកាសចំនួន៥កន្លែងហើយ គឺ​ស្ពានអា​កាស​ក្បាលថ្នល់ នៅអតីតរង្វង់មូលក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ថិតនៅ​ស្តុប​ពេទ្យលោកសង្ឃ ស្ពានអាកាស៥មករា ស្ថិតនៅស្ដុបតិចណូ និងស្ពានអាកាស ស្តុបផ្សារដីហុយនេះ ៕