ភ្នំពេញ ៖ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា ការបង្កើតមជ្ឈមណ្ឌលភស្តុភារកម្មភ្នំពេញ នឹងជួយពង្រឹងការតភ្ជាប់របស់កម្ពុជាជាមួយនឹងរំហូរពាណិជ្ជកម្មឆ្លងព្រំដែន ដើម្បីលើកកម្ពស់ប្រសិទ្ធភាពនៃការដឹកជញ្ជូនពហុមធ្យោបាយនៅប្រទេសកម្ពុជា។ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីចុះហត្ថលេខា លើអនុស្សរណៈ (MoU) រវាងក្រុមហ៊ុន YCH Group និង WorldBridge Group ស្តីពីការសហការអភិវឌ្ឍន៍ និងដំណើរការ មជ្ឈមណ្ឌលភស្តុភារកម្មភ្នំពេញ ដោយមានការអញ្ជើញចូលរួមពីអង្គភាពពាក់ព័ន្ធ រួមមានដូចជា៖ ក្រុមហ៊ុន YCH Group ក្រុមហ៊ុន WorldBridge Group ក្រុមហ៊ុន Infrastructure Asia (IA) ធនាគារអភិវឌ្ឍន៍អាស៊ី ឯកអគ្គរាជទូតនៃសាធារណរដ្ឋ សិង្ហបុរី ប្រចាំព្រះរាជាណាចក្រកម្ពុជា ឯកអគ្គរាជទូតនៃព្រះរាជាណាចក្រកម្ពុជាប្រចាំសាធារណរដ្ឋសិង្ហបុរី ក្រសួងសេដ្ឋកិច្ច និងហិរញ្ញវត្ថុ ក្រុមប្រឹក្សាអភិវឌ្ឍន៍កម្ពុជា ថ្នាក់ដឹកនាំ និងអគ្គនាយកដ្ឋានជំនាញរបស់ក្រសួង និងគណៈប្រតិភូអមដំណើរផងដែរ កាលពីថ្ងៃទី០៣ ខែឧសភា ឆ្នាំ២០២២ នៅទីស្តីការក្រសួង ។ ថ្លែងនៅក្នុងពិធីនេះ ឯកឧត្តមទេសរដ្ឋមន្ត្រី បានជម្រាបជូនថា មជ្ឈមណ្ឌលភស្តុភារកម្មភ្នំពេញនេះ មានតួនាទីយ៉ាងសំខាន់ មិនគ្រាន់តែការពង្រឹងការតភ្ជាប់របស់កម្ពុជាជាមួយនឹងរំហូរពាណិជ្ជកម្មឆ្លងព្រំដែន ជាពិសេសក្នុងចំណោមប្រទេសក្នុងតំបន់ ទន្លេមេគង្គ ដើម្បីលើកកម្ពស់ប្រសិទ្ធភាពនៃការដឹកជញ្ជូនពហុមធ្យោបាយនៅប្រទេសកម្ពុជាតែប៉ុណ្ណោះទេ ប៉ុន្តែថែមទាំងបាន បង្កើតប្រព័ន្ធអេកូឡូជីស្ទីកប្រកបដោយប្រសិទ្ធភាព កាត់បន្ថយថ្លៃដើមដឹកជញ្ជូន ធ្វើឱ្យប្រសើរឡើងនូវការប្រកួតប្រជែង សមាហរណកម្មខ្សែច្រវាក់ផ្គត់ផ្គង់ ជំរុញនិងលើកកម្ពស់កំណើនសេដ្ឋកិច្ច។ សូមជម្រាបជូនថា យោងតាមកិច្ចព្រមព្រៀងក្របខ័ណ្ឌ FA (Framework Agreement) ដែលក្រសួងសាធារណការ និង ដឹកជញ្ជូន បានចុះហត្ថលេខាជាមួយក្រុមហ៊ុន YCH កាលពីខែមីនា ឆ្នាំ២០២១ បានតម្រូវឱ្យក្រុមហ៊ុន YCH ជ្រើសរើសក្រុមហ៊ុន ដៃគូក្នុងស្រុក ដើម្បីសហការអភិវឌ្ឍន៍មជ្ឈមណ្ឌលភស្តុភារកម្មភ្នំពេញ (PPLC) ហើយគោលបំណងសំខាន់ នៃការចុះហត្ថេលខា លើអនុស្សរណៈ (MoU) រវាងក្រុមហ៊ុន YCH Group និង WorldBridge Group នៅថ្ងៃនេះ គឺជាការអនុវត្តន៍កិច្ចព្រមព្រៀង ក្របខ័ណ្ឌ FA (Framework Agreement) ដែលក្រសួងបានចុះហត្ថលេខាជាមួយក្រុមហ៊ុន YCH។ សូមបញ្ជាក់ផងដែរថា ប្រទេសកម្ពុជាបានប្រកាសពីចក្ខុវិស័យរបស់ខ្លួនក្នុងការប្រែក្លាយជាមជ្ឈមណ្ឌលដឹកជញ្ជូនក្នុងតំបន់ នៅក្នុងផែនការមេនៃការតភ្ជាប់និងប្រព័ន្ធភស្តុភារអន្តរកម្ម ចក្ខុវិស័យនេះមានគោលបំណងយុទ្ធសាស្ត្រចំនួនបី៖ (១) ដើម្បីជំរុញការតភ្ជាប់ពាណិជ្ជកម្មក្នុងតំបន់ (២) តភ្ជាប់តំបន់ឥណ្ឌូចិនជាមួយប្រទេសចិន និង (៣) ទាក់ទាញអ្នកវិនិយោគ បន្ថែមទៀត មកបង្កើតអាជីវកម្ម និងរោងចក្រផលិតនៅប្រទេសកម្ពុជា៕