អប់រំផ្សព្វផ្សាយអំពីបណ្តាញលូ និងទឹកកខ្វក់ ដល់បងប្អូនប្រជាពលរដ្ឋប្រមាណជាង ២៥០នាក់ ដើម្បីបញ្ជ្រាបឱ្យមានការចូលរួមថែរក្សា និងការគាំទ្រប្រតិបត្តិការសេវាកម្មប្រព័ន្ធចម្រោះទឹកកខ្វក់ សៀមរាប៖ ថ្ងៃសុក្រ ៦រោច ខែចែត្រ ឆ្នាំខាល ចត្វាស័ក ព.ស.២៥៦៥ ត្រូវនឹងថ្ងៃទី២២ ខែមេសា ឆ្នាំ២០២២ ឯកឧត្តម វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិតីភាពក្នុងកម្មវិធីអប់រំផ្សព្វផ្សាយបញ្ជ្រាបការយល់ដឹងជាសាធារណៈ អំពីបណ្តាញលូ និងទឹកកខ្វក់ដែលរៀបចំឡើងដោយ នាយកដ្ឋានសរុប និងព័ត៌មាន នៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន ក្រោមកិច្ចសហការជាមួយរដ្ឋបាលខេត្តសៀមរាប និងការចូលរួមសហការពីអង្គការសហប្រជាជាតិសម្រាប់លំនៅដ្ឋានមនុស្សជាតិ (UN-Habitat) នៅទីតាំងបរិវេណមុខសាលាខេត្តសៀមរាប។ កម្មវិធីនេះមានការអញ្ជើញចូលរួមពីលោក អ៊ឹង គីមលាង អភិបាលរងខេត្តសៀមរាប និងលោកស្រី ពិសិដ្ឋ សែនសម្រស់ តំណាងកម្មវិធី UN-Habitat តំណាងអគ្គនាយកដ្ឋានថវិកានៃក្រសួងសេដ្ឋកិច្ច និងហិរញ្ញវត្ថុ មន្ត្រីរាជការមកពីមន្ទីរ អង្គភាពពាក់ព័ន្ធនានាក្នុងខេត្តសៀមរាប កងរាជអាវុធហត្ថ រដ្ឋបាលក្រុង សង្កាត់ លោកគ្រូ អ្នកគ្រូ សិស្ស និស្សិត ក្រុមយុវជនសហភាពសហព័ន្ធយុវជនកម្ពុជា (ស.ស.យ.ក) យុវជនស្រលាញ់សន្តិភាព យុវជនកាយរឹទ្ធ យុជនកាកបាទក្រហម តំណាងក្រុមហ៊ុនប្រមូលសំរាម ក្នុងក្រុងសៀមរាប និងបុគ្គលិកប្រមូលសំរាម សរុបទាំងអស់ប្រមាណជាង ២៥០ នាក់។ កម្មវិធីអបរំផ្សព្វផ្សាយនេះធ្វើឡើង ក្នុងគោលបំណងលើកកម្ពស់ការយល់ដឹងពីតម្រូវការ គុណប្រយោជន៍ ភាពចាំបាច់នៃប្រព័ន្ធចម្រោះទឹកកខ្វក់ និងស្នើទាមទាឱ្យមានការចូលរួមពីបងប្អូនប្រជាពលរដ្ឋ ថែរក្សា ការពារបណ្តាញលូ ប្រព័ន្ធចម្រោះទឹកកខ្វក់ ដើម្បីសុខុមាលភាព មានអនាម័យស្អាត និងឈ្វេងយល់ពីសេវាកម្មប្រព័ន្ធចម្រោះទឹកកខ្វក់ ។ នាឱកាសនោះ ឯកឧត្តមអនុរដ្ឋលេខាធិការ បានលើកឡើងថា ដោយសារកម្ពុជាបច្ចុប្បន្នមានសន្តិភាព ទើបធ្វើឱ្យយើងមានការរីកចម្រើនផ្នែកសេដ្ឋកិច្ចក្នុងរយៈពេលពីរទសវត្សរ៍ចុងក្រោយ ជាពិសេសនៅក្នុងខេត្តសៀមរាបនេះតែម្តង មានការអភិវឌ្ឍខ្លាំងលើហេដ្ឋារចនាសម្ព័ន្ធផ្លូវថ្នល់ ស្ពាន ប្រឡាយ លូ ខ្វាត់ខ្វែងប្រទាក់ក្រឡា មានបណ្តាញផ្លូវ ៣៨ ខ្សែ ដែលសាងសង់ដោយក្រសួងសាធារណការ និងដឹកជញ្ជូន និងមានការចូលរួមពីគ្រប់ស្ថាប័នពាក់ព័ន្ធតាមវិស័យនីមួយៗ ទើបបានដាក់សម្ពោធថ្មីៗនេះ ក្រោមអធិបតីភាពដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ជាសក្ខីភាព ផងដែរ។ ទន្ទឹមនឹងសន្ទុះនៃការអភិវឌ្ឍនៅក្នុងខេត្តសៀមរាប បញ្ហាទឹកកខ្វក់ដែលបង្កពីសកម្មភាពផ្សេងៗ បានហូរចូលទៅក្នុងតំបន់លំនៅដ្ឋានរបស់បងប្អូនប្រជាពលរដ្ឋ និងសហគមន៍ បង្កផលប៉ះពាល់ដល់សុខុមាលភាពប្រជាជន សោភ័ណភាព ជីវៈចម្រុះ ប្រព័ន្ធអេកូឡូស៊ី និងជះឥទ្ធិពលដល់សេដ្ឋកិច្ចជាតិ ហើយត្រូវបានរាជរដ្ឋាភិបាលកម្ពុជា កំពុងយកចិត្តទុកដាក់ជាចម្បង។ ហេតុដូចនេះ ហេដ្ឋារចនាសម្ព័ន្ធសាធារណៈជាច្រើនពិសេស បណ្តាញលូទឹកភ្លៀង បណ្តាញលូទឹកកខ្វក់ ស្ថានីយ៍ប្រព្រឹត្តកម្មទឹកកខ្វក់ ទីលានចាក់សំណល់ភក់ ត្រូវបានសាង់សង់ និងកំពុងសាងសង់នៅតាមបណ្តារាជធានី និងក្រុងសំខាន់ៗ រួមទាំងក្រុងសៀមរាប ខេត្តសៀមរាប ផងដែរ។ ឯកឧត្តម ក៏បានលើកឡើងបន្ថែមទៀតថា យើងមានប្រាសាទជាកេរ្ត៍ដំណែលដូនតាច្រើន មានផ្លូវស្អាតច្រើន បណ្តាញលូ ប្រឡាយខ្វាត់ខ្វែងក៏ច្រើន តែដើម្បីឱ្យសមិទ្ធផលអាចប្រើប្រាស់បានយូអង្វែង សូមឱ្យមានការចូលរួមពីប្រជាពលរដ្ឋ និងគ្រប់ភាគីពាក់ព័ន្ធដើម្បីប្រែក្លាយក្រុងសៀមរាបទៅជាទីក្រុងដ៏ស្រស់ស្អាត មានសោភ័ណភាព អនាម័យស្អាត បរិស្ថានល្អ និងគួរឱ្យចង់រស់នៅ ក៏ដូចជាទាក់ទាញភ្ញៀវទេសចរណ៍ជាតិ និងអន្តរជាតិ តាមរយ:ការលើកកម្ពស់អនាម័យស្អាត និងសុខភាពសាធារណៈ ធ្វើឱ្យសុខុមាលភាពរបស់ប្រជាពលរដ្ឋកាន់តែប្រសើរឡើង។ តាមរយៈកម្មវិធីអប់រំផ្សព្វផ្សាយបញ្ជ្រាបឱ្យមានការយល់ដឹងជាសាធារណៈអំពីបណ្តាញលូ និងទឹកកខ្វក់ ក្នុងក្រុងសៀមរាបនាពេលនេះ ជាមធ្យោបាយមួយដ៏ល្អ ក្នុងការជំរុញឱ្យមានការចូលរួមខ្ពស់ពីសំណាក់ប្រជាពលរដ្ឋទូទៅក្នុងការប្រើប្រាស់ និងថែរក្សាការពារហេដ្ឋារចនាសម្ព័ន្ធ ដែលបានសាងសង់រួច ប្រកបដោយ ប្រសិទ្ធភាព និងនិរន្តរភាព។ ការចូលរួមផ្តើមចេញពីយើងទាំងអស់គ្នា ជាប្រជាពលរដ្ឋ ដើម្បីផ្ទះយើងស្អាត ភូមិយើងស្អាត សង្កាត់យើងស្អាត ទីក្រុងយើងស្អាត និងសុខភាពយើងល្អ ៕ អរគុណសន្តិភាព!