រដ្ឋមន្ត្រីក្រសួងសាធារណការ និងដឹកជញ្ជូន លោកទេសរដ្ឋមន្ត្រី ស៊ុន ចាន់ថុល បាន លើកទឹកចិត្តដល់វិនិយោគិនពីហុងកុង ក្នុងការបណ្តាក់ទុនវិនិយោគលើវិស័យដឹកជញ្ជូននៅកម្ពុជា ខណៈវិស័យមួយនេះរាជរដ្ឋាភិបាល បាននឹងកំពុងស្វែងរកដៃគូ និងជំនួយ ដើម្បីអភិវឌ្ឍន៍។ សំណើលើគម្រោងវិនិយោគនេះ បានធ្វើឡើងក្នុងជំនួបជាមួយគណៈប្រតិភូមកពីក្រុមប្រឹក្សាអភិវឌ្ឍន៍ពាណិជ្ជកម្មទីក្រុង ហុងកុង ដឹកនាំដោយលោក Edward YAU ទទួលបន្ទុកការិយាល័យអភិវឌ្ឍន៍សេដ្ឋកិច្ច និងពាណិជ្ជកម្ម កាលពីរសៀលថ្ងៃទី២០ ខែមីនា ក្នុងគោលបំណងស្វែងរកឱកាសវិនិយោគពាក់ព័ន្ធនឹងការស្តារឡើងវិញនូវហេដ្ឋារចនាសម្ព័ន្ធដឹកជញ្ជូនរបស់កម្ពុជា។ លោកទេសរដ្ឋមន្ត្រី បានបង្ហាញប្រាប់អំពីស្ថានភាព នៃការអភិវឌ្ឍ ហេដ្ឋា រចនាសម្ព័ន្ធនៅកម្ពុជានាពេលបច្ចុប្បន្នរួមមាន៖ ការស្ថាបនាបណ្តាញផ្លូវថ្នល់ ការធ្វើឱ្យប្រសើរឡើងនូវផ្លូវដែកភាគខាងត្បូង និងខាងជើងភ្ជាប់ទៅនឹងបណ្តាប្រទេសអាស៊ាន និងសក្កានុពលផ្លូវដែករវាងទីក្រុងភ្នំពេញ ទៅកាន់ទីក្រុងហូជីមិញ។ ជាមួយគ្នានេះ លោកទេសរដ្ឋមន្ត្រី ក៏បានគូសបញ្ជាក់ផងដែរ អំពីគម្រោងនានានៅក្រុងព្រះសីហនុរួមមាន៖ គម្រោងផ្លូវល្បឿនលឿន ការពង្រីកកំពង់ផែសមុទ្រទឹកជ្រៅ ការអភិវឌ្ឍតំបន់សេដ្ឋកិច្ចតំបន់ឆ្នេរសមុទ្រ និងការអភិវឌ្ឍព្រលានយន្តហោះថ្មីនៅរាជធានីភ្នំពេញ និងខេត្តសៀមរាប។ លោកទេសរដ្ឋមន្រ្តី ស៊ុន ចាន់ថុល បានសម្តែងនូវការគាំទ្រ និងការប្តេជ្ញាចិត្តយ៉ាងមុតមាំ ក្នុងការជួយសម្របសម្រួលដល់វិនិយោគិនហុងកុង ដែលមានចំណាប់អារម្មណ៍ក្នុងការវិនិយោគនៅកម្ពុជា។ យោងតាមរបាយការណ៍ពីក្រុមប្រឹក្សាអភិវឌ្ឍន៍កម្ពុជា (CDC) បានបង្ហាញថា ការវិនិយោគរបស់ហុងកុងនៅកម្ពុជា ចាប់ពីឆ្នាំ១៩៩៤ ដល់ឆ្នាំ២០១៧ មានចំនួន២៥៧គម្រោង គិតជាទុនវិនិយោគសរុបប្រមាណ១,៣៣ពាន់លានដុល្លារអាមេរិក ស្មើនឹង២,១៤ភាគរយ នៃទុនវិនិយោគសរុប។ ដោយឡែក ការវិនិយោគរបស់ហុងកុង ក្នុងឆ្នាំ២០១៧ គឺមានចំនួន១៣គម្រោង ក្នុងវិស័យ កាត់ដេរសម្លៀកបំពាក់ ស្បែកជើង កាបូប និងឧស្សាហកម្មដ៏ទៃទៀត ក្នុងទឹកប្រាក់ប្រមាណ៨៥លានដុល្លារ ស្មើនឹង១,៦៤ភាគរយ នៃទុនវិនិយោគសរុបប្រចាំឆ្នាំ២០១៧៕