[Angrut] - ប៉ូលិសចរាចរណ៍និងមន្រ្តីសាធារណការឆ្លើយដាក់គ្នារឿងភ្លើងស្តុប
2018-03-21
ទៅកាន់ទំព័រចុះផ្សាយក្នុង Angrut
ភ្លើងស្តុបជារង្វង់មូលពណ៌ក្រហម អ្នកបើកបរនៅតែអាចបន្តយានថយន្តបត់ស្តាំបានប្រសិនបើពុំមានឧបសគ្គនៅពីមុខ។ តែមិនអាចបត់ស្តាំបានទេ ប្រសិនបើភ្លើងស្តុបនោះមានសញ្ញាព្រួញចង្អុលទិស។ជារឿយៗបង្ហាញទំនាស់រវាងអ្នកបើកបរនិងនគរបាល គឺមកពីភ្លើងស្តុប។
ទំនាស់ភ្លើងស្តុបរវាងនគរបាលចរាចរនិងអ្នកបើកបរ នៅក្នុងទីក្រុងភ្នំពេញនារយៈពេលចុងក្រោយនេះកើតមានច្រើន ដោយសារម្នាក់ៗជជែកយកត្រូវរាងខ្លួនរហូតមានពេលខ្លះកើតមានអំពើហិង្សាឬជេប្រមាថគ្នា ដោយសារតែភ្លើងស្តុបថ្មីគ្មានសញ្ញាព្រួញ គ្មានរយៈពេលកំណត់ដូចភ្លើងស្តុបនាពេលមុន។
ភ្លើងស្តុបដែលដំឡើងថ្មីរាជធានីភ្នំពេញ ពោលទើបនឹងដាក់ចុងក្រោយនេះកន្លែងខ្លះគ្មានលេខកំណត់រយៈពេលទេ គឺពីខៀវទៅលឿងរួចក្រហមភ្លាមៗ។កន្លែងខ្លះសញ្ញាភ្លើងស្តុបពណ៌ក្រហមមានជារង្វង់មូល និង កន្លែងខ្លះទៀត មានជាសញ្ញាព្រួញចង្អុលប្រាប់ទិសត្រូវឈប់និងត្រូវទៅ។
នៅតាមភ្លើងស្តុបមានសញ្ញាព្រួញចង្អុលទិស បញ្ហាទំនាស់រវាងអ្នកបើកបរនិងនគរបាលចរាចរមិនសូវកើតមានទេតែនៅតាមគោលដៅស្តុបដែលភ្លើងក្រហមគ្មានសញ្ញាព្រួញ បញ្ហាបានកើតមានរាល់ថ្ងៃ។ ភាគច្រើនបង្កឡើងដោយនគរបាលចរាចរមួយចំនួនដែលមិនសូវយល់ពីច្បាប់ឬដឹងដែលតែបំពានច្បាប់ដោយឃាត់អ្នកបើកបរបត់ស្តាំដើម្បីទារប្រាក់។
សញ្ញាស្តុបពណ៌ក្រហមដែលគ្មានសញ្ញាព្រួញហាមបត់ស្តាំ មាននៅស្តុបជលផល, ណាជីន, សន្ធរមុក, រង្វង់មូលកាំកូស៊ីធី និង មាននៅកន្លែងផ្សេងទៀតជាច្រើនក្នុងទីក្រុងភ្នំពេញដែលគេបានដាក់ដោយទំនងជាខ្វះការសិក្សា។ កន្លែងខ្លះដាក់ភ្លើងស្តុបមិនមែនជួយសម្រួលការកកស្ទះទេ តែបែរជាធ្វើឲ្យកកស្ទះលើសដើមទៅវិញក៏មាន។
លោក ព្រាប ចន្ទ័វិបុល អ្នកសម្របសម្រួលផ្នែកផ្សព្វផ្សាយច្បាប់ចរាចរផ្លូវគោកនៃគណៈកម្មាធិការជាតិសុវត្ថិភាពផ្លូវគោកនិងជាអគ្គនាយករងនៃអគ្គនាយកដ្ឋានដឹកជញ្ជូនផ្លូវទឹកក្រសួងសាធារណការបានប្រាប់រស្មីកម្ពុជានៅថ្ងៃទី២០ខែមីនាឆ្នាំ២០១៨ថា បើសិនសញ្ញាភ្លើងស្តុបជារង្វង់មូលពណ៌ក្រហម អ្នកបើកបរដែលត្រូវបត់ស្តាំនៅអាចបន្តដំណើរទៅបាននៅពេលគ្មានឧបសគ្គនៅពីមុខ។
លោក បញ្ជាក់ទៀតថា បើភ្លើងស្តុបមានសញ្ញាព្រួញចង្អុលទិសទៅមុខនិងបត់ស្តាំពេលសញ្ញានេះពណ៌ក្រហម អ្នកបើកបរមិនអាចបត់ស្តាំបានទេ។ នៅលើផ្លូវអក្សរតេ( T )បើសិនជាភ្លើងស្តុបពណ៌ក្រហមហើយ ទោះគ្មានអ្វីនៅពីមុខក៏អ្នកបើកបរនៅតែមិនអាចបញ្ជាយានទៅមុខបានដែរ។
លោកវរៈសេនីយ៍ឯក សែម គុន្ធា ប្រធានការិយាលយ័ចរាចរណ៍ជើងគោកនៃស្នងការនគរបាលរាជភ្នំពេញបានប្រាប់រស្មីកម្ពុជានៅថ្ងៃទី២០ខែមីនាថា ភ្លើងស្តុបដែលគ្មានសញ្ញាព្រួញចង្អុលទិស(ព្រួញ)អ្នកបើកបរដែលត្រូវបត់ស្តាំ នៅតែអាចបត់បានពេលគ្មានឧបស័គ្គពីមុខ ទោះបីជាភ្លើងពណ៌ក្រហមក៏ដោយ។
លោកប្រធានការិយាលយ័បានទទួលស្គាល់ថា កន្លងទៅនេះនគរបាលនៅតាមគោលដៅមួយចំនួនពិតជាបានបំពានក្នុងការហៅអ្នកបើកបរបត់ស្តាំបង្កឲ្យមានទំនាស់ ។ យើង(សែមគុន្ធា)បានធ្វើការអប់រំណែនាំដល់មន្ត្រីនគរបាល នៅតាមគោលដៅអំពីបញ្ហានេះរាល់ថ្ងៃតែបញ្ហានៅតែមានមិនចេះចប់។ចំពោះបញ្ហាភ្លើងស្តុបដែលបានដាក់ថ្មីដោយមន្ទីរសាធារណការរាជធានីភ្នំពេញសព្វថ្ងៃនេះ គឺពិតជាមិនបានសមស្របទេនៅកន្លែងខ្លះ ។ យើងបានលើកនៅក្នុងអង្គប្រជុំជាមួយអភិបាលរាជធានីភ្នំពេញ ដោយបានឯកភាពគ្នាធ្វើការកែលម្អ តែខាងសាធារណការ ដូចជាមិនសូវចាប់អារម្មណ៍បញ្ហានេះទេ។ ភ្លើងស្តុបដើរមិនប្រក្រតី ភ្លើងស្តុបដាច់ ភ្លើងស្តុបគ្មានលេខកំណត់រយៈពេល គ្មានសញ្ញាព្រួញ សុទ្ធតែជាដើមហេតុនាំឲ្យមានទំនាស់រវាងអ្នកបើកបរនិងនគរបាលនៅតាមគោលដៅ៕
