ក្រុមការងារ ស.ស.យ.ក វិស័យសាធារណការ និងដឹកជញ្ជូន តាំងបង្ហាញសកម្មភាពការងារ និងចែកជូនអត្ថបទសុវត្ថិភាពចរាចរណ៍ ជូនដល់អ្នកចូលរួមនៅក្នុងកម្មវិធីសង្ក្រាន្តTSI ថ្ងៃពុធ ៥កើត ខែចេត្រ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី០៦ ខែមេសា ឆ្នាំ២០២២ ក្រុមការងាររបស់ ស.ស.យ.ក វិស័យសាធារណការ និងដឹកជញ្ជូន បានធ្វើការដាក់តាំងបង្ហាញនូវលទ្ធផលការងារដែលក្រុមការងារក្នុងវិស័យ សម្រេចបានក្នុងពេលកន្លងមកមានដូចជា ម៉ូតកាតជូនពរដែលធ្វើដោយដៃ របស់ក្រុមអាជីវកម្ម ព្រមទាំងពានរង្វាន់បាល់ទាត់ ដែលក្រុមការងារធ្លាប់បានទទួលនាពេលកន្លងមក។ ក្រៅពីនេះ ដើម្បីចូលរួមផ្សព្វផ្សាយការយល់ដឹងអំពីបញ្ហាគ្រោះថ្នាក់ចរាចរណ៍ ក្រុមងារក៏បានចែកជូនផងដែរនូវអត្ថបទ ច្បាប់ស្តីពីចរាចរណ៍ផ្លូវគោក សៀវភៅដែលអ្នកបើកបរត្រូវយល់ដឹង ខិត្តបណ្ណស្តីពីសុវត្ថិភាពចរាចរណ៍ផ្លូវគោក និងមានការចាក់វីដេអូ អប់រំស្តីពីគ្រោះថ្នាក់ចរាចរណ៍ ជូនដល់បងប្អូនដែលបានអញ្ជើញមកទស្សនា និងមានកម្មវិធីសំណួរ ចម្លើយ ដើម្បីទទួលបានរង្វាន់មួកសុវត្ថិភាពថែមទៀតផង។ សូមជម្រាបជូនផងដែរថាព្រឹត្តិការណ៍ «សង្ក្រាន្ត TSI» នេះត្រូវបានរៀបចំឡើងដោយវិទ្យាស្ថានតេជោសែន សាធារណការ និងដឹកជញ្ជូន ក្នុងគោលបំណងដើម្បីអបអរសាទរ ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំខាល ចត្វាស័ក ដែលនឹងឈានចូលមកដល់នាពេលខាងមុខនេះ និងដើម្បីចូលរួមអភិរក្ស-លើកតម្កើងវប្បធម៌ជាតិ ព្រមទាំងបំផុសស្មារតីយុវជនឱ្យមានមោទកភាព ស្រលាញ់វប្បធម៌ អរិយធម៌ ប្រពៃណី ទំនៀមទម្លាប់ ដែលជាអត្តសញ្ញាណដ៏ផូរផង់របស់ជាតិ ជាពិសេសដើម្បីប្រមូលថវិកាសប្បុរសធម៌ ជួយទ្រទ្រង់ដល់មន្ទីរពេទ្យ គន្ធបុប្ផាផងដែរ៕