ក្រសួងសាធារណការ និងដឹកជញ្ជូន នឹងនាំចូលម៉ាស៊ីនទំនើបៗ បន្ថែមទៀត ដើម្បីពិនិត្យគុណភាពផ្លូវ តាមរយៈការប្រើវិទ្យុសកម្ម និងRadar ជំនួសឱ្យការខួងចោះផ្លូវដើម្បីពិសោធកម្រាស់ និងគុណភាព។ ឯកឧត្តម ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានឱ្យដឹងក្នុងកិច្ចចុះពិនិត្យការដ្ឋានផ្លូវជាតិលេខ ១៤៦B កាលពីថ្ងៃទី ២៨ មីនា នេះថា ជាក់ស្ដែង បច្ចុប្បន្នកម្ពុជាមានម៉ាស៊ុនពិនិត្យភាពហាប់នៃផ្លូវដោយប្រើវិទ្យុសកម្ម ២ គ្រឿងហើយ ដែលនាំចូលពីអាមេរិក ខណៈកំពុងត្រៀមនាំចូលបន្ថែមទៀត។ «នេះជាលើកទីមួយដែលក្រសួងសាធារណការ និងដឹកជញ្ជូន បានទិញ បាន២ គ្រឿងនេះ ដើម្បីយកមកដាក់ពីលើផ្លូវ ដោយប្រើវិទ្យុសកម្ម បាញ់មើលថា ការបង្ហាប់ហ្នឹង បានល្អ ឬមិនល្អ យើងមិនបាច់ខូងទេ គឺគ្រាន់តែយកម៉ាស៊ីនដាក់ពីលើ វាប្រាប់យើងតែម្តង» ឯកឧត្តមបានបន្ដ។ លើសពីនេះ ក្រសួងក៏បានបញ្ជាទិញម៉ាស៊ីនស្កេនកម្រាស់ផ្លូវដោយប្រើ Radar មកបន្ថែមផងដែរ។ ម៉ាស៊ីននឹងបំពាក់ភ្ជាប់នឹងរថយន្ត ហើយឱ្យរថយន្តនោះបើកបរកាត់ផ្លូវ ដើម្បីវាស់កម្រាស់ផ្លូវ ដោយវាស់ម្ដង បានប្រវែង ៣០ គីឡូម៉ែត្រ។ សូមបញ្ជាក់ថា ផ្លូវជាតិលេខ១៤៦B ដែលតភ្ជាប់ពីវាលរិញ ទៅកាន់រង្វង់មូលស្រុកស្ទឹងហាវ និងតភ្ជាប់ពីកំពង់ផែព្រះសីហនុ សម្រេចការសាងសង់ជិត១០០% ដោយរំពឹងថា នៅខែក្រោយនេះ នឹងបញ្ចប់ការសាងសង់។