[Rasmei Kampuchea Daily News] - ក្រសួងសាធារណការ និងក្រសួងមហាផ្ទៃ ឆ្មក់ពិនិត្យស្វែងរក ផ្លាកលេខ ក្លែងក្លាយ
ដោយៈ សុផល / ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន រួមជាមួយនាយឧត្តមសេនីយ៍ ហ៊ឹម យ៉ាន អគ្គស្នងការរង នគរបាលជាតិ បានដឹកនាំកម្លាំងនគរបាលចរាចរណ៍ ឆ្មក់ពិនិត្យស្វែងរកផ្លាកលេខក្លែងក្លាយ លើរថយន្ត ដែលធ្វើដំណើរ នៅលើផ្លូវជាតិលេខ១។
កម្លាំងនគរបាលចរាចរណ៍ ត្រូវបានពង្រាយ និងស្នើសុំការសហការ ពីម្ចាស់ រថយន្ត ដើម្បីត្រួតពិនិត្យផ្លាកលេខ។ កម្លាំងនគរបាលជំនាញ បានប្រើទូរស័ព្ទ ដែលភ្ជាប់ជាមួយ ប្រព័ន្ធផ្តល់ជូន ដោយក្រសួងសាធារណការ និងដឹកជញ្ជូន ស្កេនលើផ្លាកលេខរថយន្តនីមួយៗ ដើម្បីផ្ទៀងផ្ទាត់ ពីភាពត្រឹមត្រូវ រវាងរថយន្ត និងផ្លាកលេខ ដែលបានបំពាក់។
រថយន្តត្រូវជាច្រើន ត្រូវកម្លាំងនគរបាលចរាចរណ៍ហៅ ដើម្បីត្រួតពិនិត្យ តែគេរកមិនឃើញ មានរថយន្តបំពាក់ផ្លាកលេខក្លែងក្លាយ ឬបំពាក់ខុសរថយន្ត នោះឡើយ។ ក្នុងប្រតិបត្តិការនោះ ក៏បានរកឃើញ រថយន្តមួយគ្រឿង ដែលយកទៅបិទស្កុតពណ៌ ខុសពីពណ៌រថយន្ត ដែលបានចុះបញ្ជី។ ការបិទស្កុតពណ៌ ឬបាញ់ពណ៌ ឱ្យខុសពីពណ៌ដើម នៃរថយន្តចុះបញ្ជី ជាសកម្មភាព ដែលច្បាប់បានហាមឃាត់។
នាយឧត្តមសេនីយ៍ ហ៊ឹម យ៉ាន បានឱ្យដឹងថាៈ ចាប់តាំងពីក្រសួងសារធាណការ និងដឹកជញ្ជូន ដាក់ចេញវិធានការតឹងរឹង លើការគ្រប់គ្រងរថយន្ត ដោយការ បំពាក់ QR Code លើរថយន្ត បានធ្វើឱ្យការប្រើប្រាស់ ផ្លាកលេខក្លែងក្លាយ ធ្លាក់ចុះជាអតិបរមា។ មិនតែប៉ុណ្ណោះ ប្រព័ន្ធនេះ ក៏បានជួយដល់កម្លាំងនគរបាល ក្នុងគ្រប់គ្រងសុវត្ថិភាពចរាចរណ៍ រក្សាសន្តិសុខសណ្តាប់ធ្នាប់ និងប្រឆាំងបទ ល្មើសផ្សេងៗផងដែរ។
នាយឧត្តមសេនីយ៍ ហឹម យ៉ាន បានបញ្ជាក់ថាៈ ប្រព័ន្ធនេះ បានជួយឱ្យ យើងគ្រប់គ្រង បានយានយន្ត។ យើងគ្រប់គ្រងបានយានយន្ត គឺយើងអាច គ្រប់គ្រងបាន នូវសុវត្ថិភាព បញ្ហាសុវត្ថិភាព ទាំងបញ្ហាសន្តិសុខ ទាំងបញ្ហា ចរាចរណ៍។ លោកនាយឧត្តមសេនីយ៍ បានអះអាងថាៈ កងកម្លាំងនគរបាល នៅតែបន្តធ្វើសកម្មភាព ដូចភ្លៀងរលឹម ដោយឆ្មក់ចុះតាមដងផ្លូវ ដើម្បីស្វែងរកផ្លាកលេខ រថយន្តក្លែងក្លាយ។
លោកទេសរដ្ឋមន្ត្រី ស៊ុន ចាន់ថុល បានគូសបញ្ជាក់ថាៈ ការប្រើប្រាស់ QR Code លើផ្លាកលេខរថយន្តនេះ បានជួយកាត់បន្ថយ ការក្លែងបន្លំផ្លាកលេខ ជួយសមត្ថកិច្ចគយ ស្វែងរករថយន្តគេចពន្ធ ហើយក៏បានរួមចំណែក ក្នុងប្រមូលចំណូលជូនរដ្ឋផងដែរ។
លោកទេសរដ្ឋមន្ត្រី ស៊ុន ចាន់ថុល បានឱ្យដឹងថាៈ ប្រទេសកម្ពុជា បានប្រើប្រាស់ QR Code លើផ្លាកលេខរថយន្តនេះមុនគេ ហើយបច្ចុប្បន្ន មានប្រទេសមួយចំនួន ក៏បានសិក្សាពីកម្ពុជា ប្រើប្រាស់ QR Code លើផ្លាកលេខរថយន្តផងដែរ៕/V-PC
