នៅថ្ងៃទី០៦និងថ្ងៃទី០៧ ខែមីនា ឆ្នាំ២០១៨ នៅទីរួមខេត្តសៀមរាប ឯកឧត្តម ប៉េង ពោធិ៍នា អនុរដ្ឋ លេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វ ផ្សាយស្តីពីការដាក់ឱ្យអនុវត្តចំណាត់ថ្នាក់ថវិកា និងទម្រង់របាយការណ៍អនុវត្តថវិកាប្រចាំត្រីមាស ឆមាស និងប្រចាំឆ្នាំ ដោយមានការចូលរួមពីមន្ត្រីជាន់ខ្ពស់ ក្រសួងសាធារណការ និងដឹកជញ្ជូន តំណាងក្រសួងសេដ្ឋកិច្ចនិងហិរញ្ញវត្ថុ គ្រូបង្គោល និងសិក្ខាកាមដែលជាមន្រ្តីរាជការនៃក្រសួងសាធារណការ និងដឹកជញ្ជូន និងមន្ទីរសាធារណការ និងដឹកជញ្ជូនរាជធានី-ខេត្តប្រមាណជាង ១៥០នាក់។ សិក្ខាសាលារយៈពេលពីរថ្ងៃនេះ រៀបចំឡើងដោយក្រសួងសាធារណការ និងដឹកជញ្ជូន សហការ ជាមួយក្រសួងសេដ្ឋកិច្ច និងហិរញ្ញវត្ថុ ដើម្បីបង្កើនចំណេះដឹង សមត្ថភាពបំពេញការងារឱ្យកាន់តែមានប្រសិទ្ធភាព ក៏ដូចជាការផ្សព្វផ្សាយឱ្យបានទូលំទូលាយដល់គ្រប់អង្គភាពក្រោមឱវាទក្រសួង និងមន្ត្រី រាជការនៃមន្ទីរសាធារណការ និងដឹកជញ្ជូនទូទាំងរាជធានី-ខេត្ត។ សិក្ខាសាលានេះផ្តោតជាសំខាន់លើចំណាត់ថ្នាក់ថវិកាដែលរួមមានដូចជា៖ ចំណាត់ថ្នាក់សេដ្ឋកិច្ច ចំណាត់ថ្នាក់រដ្ឋបាល ចំណាត់ថ្នាក់ភូមិសាស្ត្រ ចំណាត់ថ្នាក់មុខងារ ចំណាត់ថ្នាក់មូលនិធិ ចំណាត់ថ្នាក់កម្មវិធី និងចំណាត់ថ្នាក់គម្រោង និងទម្រង់បាយការណ៍អនុវត្តថវិកាប្រចាំត្រីមាស ឆមាស និងប្រចាំឆ្នាំផងដែរ។ ឯកឧត្តមអនុរដ្ឋលេខាធិការ ប៉េង ពោធិ៍នា បានគូសបញ្ជាក់អំពីសារសំខាន់នៃរបាយការណ៍អនុវត្ត ថវិកាដែលឆ្លុះបញ្ចាំងពីសកម្មភាពការងារ បង្ហាញឱ្យឃើញពីភាពរីកចម្រើន ក៏ដូចជាបញ្ហាប្រឈម និងកង្វះខាតក្នុងការបំពេញការងារណាមួយ ដើម្បីបង្កភាពងាយស្រួលដល់ការកែតម្រូវផែនការ សកម្មភាព និងដើម្បីឱ្យសមស្របទៅតាមការរំពឹងទុកផងដែរ។ ជាទីបញ្ចប់ ឯកឧត្តមអនុរដ្ឋលេខាធិការ បានជំរុញឱ្យអង្គសិក្ខាសាលាទាំងមូលផ្តោតការយកចិត្តទុកដាក់ស្វែងយល់ ដោយលើកជាសំណួរ ផ្លាស់ប្តូរមតិយោបល់ទៅវិញទៅមក ដើម្បីទទួលបានចំណេះដឹង ពង្រឹងសមត្ថភាពកាន់តែប្រសើរសម្រាប់យកទៅអនុវត្ត និងផ្សព្វផ្សាយនៅក្នុងអង្គភាពរបស់ខ្លួន ឱ្យកាន់តែទូលំទូលាយបន្ថែមទៀត។