វិទ្យាស្ថានតេជោ សែន សាធារណការ និងដឹកជញ្ជូន រៀបចំវគ្គបណ្តុះបណ្តាលស្តីពីទ្រឹស្ដី Six Sigma ជូនសិក្ខាកាមដែលជាថ្នាក់ដឹកនាំក្រសួង ដើម្បីពង្រឹងប្រសិទ្ធភាពការងារ និងបង្កើនសមត្ថភាពលើការងារដឹកនាំ និងគ្រប់គ្រងអង្គភាពឱ្យកាន់តែមានប្រសិទ្ធភាព ថ្ងៃចន្ទ ១២កើត ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៤ ខែមីនា ឆ្នាំ២០២២ នៅទីស្តីការ ក្រសួង ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពីទ្រឹស្ដី Six Sigma ដោយមានការចូលរួមពីសិក្ខាកាមដែលជាថ្នាក់ដឹកនាំក្រសួងចាប់ពីប្រធាន នាយកដ្ឋានរហូតដល់ថ្នាក់រដ្ឋលេខាធិការសរុបចំនួន១៧០រូប ក្នុងនោះរួមមាន៖ ឯកឧត្តម លោកជំទាវ រដ្ឋលេខាធិការចំនួន២៧រូប ឯកឧត្តម លោកជំទាវ អនុរដ្ឋលេខាធិការចំនួន២៦រូប ឯកឧត្តមអគ្គនាយក ចំនួន១០រូប លោក លោកស្រីអគ្គនាយករងចំនួន ៣៩ រូប លោក លោកស្រី ប្រធាននាយកដ្ឋានចំនួន ៤៣រូប និងប្រធានមន្ទីរសាធារណការ និងដឹកជញ្ជូនចំនួន២៥នាក់។ វគ្គបណ្ដុះបណ្ដាលនេះរៀបចំឡើងដោយវិទ្យាស្ថានតេជោ សែន សាធារណការ និងដឹកជញ្ជូនក្នុងគោល បំណងពង្រឹងប្រសិទ្ធភាពលើការងារដឹកនាំគ្រប់គ្រងស្ថាប័ន/អង្គភាព បង្កើនសមត្ថភាពលើការងារដឹកនាំនិងគ្រប់គ្រងស្ថាប័ន បង្កើនប្រាក់ចំណូល និងប្រាក់ចំណេញ កាត់បន្ថយពេលវេលា និងកាត់បន្ថយ ការចំណាយ និងបង្កើនជំនាញដោះស្រាយបញ្ហារបស់មន្ត្រីនៅតាមអង្គភាពនីមួយៗឱ្យកាន់តែប្រសើរឡើង ដោយមានការចូលរួមជាគ្រូបង្គោលពីឯកឧត្តមរដ្ឋលេខាធិការ រស់ វណ្ណា។ ថ្លែងក្នុងរបាយការណ៍ស្វាគមន៍ ឯកឧត្តមនាយកវិទ្យាស្ថាន ហឿន សំនៀង បានគូសបញ្ជាក់ពីលទ្ធផល រំពឹងទុកក្រោយពេលបញ្ចប់វគ្គបណ្តុះបណ្តាលនេះ ពោលគឺ៖ សិក្ខាកាមនឹងយល់ដឹងពីរបៀបនៃការបំពេញការងារតាមរបៀបទស្សនវិជ្ជាSix Sigma មានការផ្លាស់ប្តូរផ្នត់គំនិតនិងឥរិយាបទក្នុងការបំពេញការងារ ឱ្យបានល្អប្រសើរ រកឃើញឬសគល់នៃបញ្ហា ចំណុចខ្វះខាត និងនីតិវិធីការងារដែលមិនសូវមាន គុណភាពនិងចំណាយពេលវេលា និងធនធានច្រើនដែលមិនចាំបាច់ ហើយមិនបំពេញចិត្តសេចក្តីត្រូវការរបស់អតិថិជនដែលមកទទួលសេវា បង្កើតនីតិវិធីរបៀបរបបការងារ និងមានលទ្ធភាពកែលម្អ ចំណុចខ្វះខាត អនុវត្ដការងារឱ្យកាន់តែប្រសើរ និងកាត់បន្ថយវដ្តនៃនីតិវិធីការងារជាដើម។ ថ្លែងក្នុងកម្មវិធីបើកវគ្គបណ្តុះបណ្តាលនាឱកាសនោះ ឯកឧត្តមរដ្ឋលេខាធិការ រស់ វណ្ណា បានគូសបញ្ជាក់ពីសារសំខាន់នៃការគាំទ្រ និងការប្តេជ្ញាចិត្តខ្ពស់ពីថ្នាក់ដឹកនាំ ជាពិសេសការចូលរួមពីគ្រប់ភាគីពាក់ព័ន្ធ ទាំងអស់នៅក្នុងអង្គភាព/ស្ថាប័ន រាប់ចាប់តាំងពីមន្ត្រីថ្នាក់ក្រោមបំផុតរហូតទៅដល់ថ្នាក់ដឹកនាំអង្គភាព/ ស្ថាប័ននោះ ដើម្បីអនុវត្តទ្រឹស្តីទស្សនវិជ្ជាSix Sigmaនេះបានជោគជ័យ ក៏ដូចជាដើម្បីបញ្រ្ជៀបទ្រឹស្តីនេះ ឱ្យក្លាយជាវប្បធម៌មួយរបស់អង្គភាព/ស្ថាប័ននោះ។ ជាមួយគ្នានោះផងដែរ ឯកឧត្តមរដ្ឋលេខាធិការ បានសំណូមពរឱ្យសិក្ខាកាមទាំងអស់យកចិត្តទុកដាក់ ប្រកបដោយការប្ដេជ្ញាចិត្តខ្ពស់ដើម្បីក្រេបជញ្ជក់យកចំណេះដឹង និងបទពិសោធន៍ពីកម្មវិធីនេះយកទៅ អនុវត្តនៅក្នុងអង្គភាពរបស់ខ្លួនឱ្យមានប្រសិទ្ធភាពខ្ពស់ និងបានបញ្ជាក់បន្ថែមថាឯកឧត្តមនឹងខិតខំប្រឹង ប្រែងធ្វើបទបង្ហាញ ពន្យល់ឱ្យបានក្បោះក្បាយអំពីទ្រឹស្តីសំខាន់ៗជូនដល់សិក្ខាកាមទាំងអស់ ដើម្បីឱ្យ វគ្គបណ្តុះបណ្តាលនេះអាចសម្រេចបានជោគជ័យតាមការគ្រោងទុក។ សូមជម្រាបជូនថា៖ វគ្គបណ្ដុះបណ្ដាលនេះ បែងចែកជា ៣ វគ្គ សម្រាប់ក្រុមគោលដៅផ្សេងៗគ្នាក្នុងនោះ៖ វគ្គទី១ រៀបចំសម្រាប់ថ្នាក់ដឹកនាំចាប់ពីប្រធានមន្ទីរ ប្រធាននាយកដ្ឋានដល់រដ្ឋលេខាធិការ វគ្គទី២ រៀបចំ សម្រាប់អនុប្រធានមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត និងវគ្គទី៣រៀបចំសម្រាប់ ថ្នាក់អនុប្រធាននាយកដ្ឋាន៕