[Rasmei Kampuchea Daily News] - អន្តរក្រសួង ប្រជុំពិនិត្យនិងពិភាក្សា លើសេចក្តីព្រាងអនុក្រឹត្យ ស្តីពីការគ្រប់គ្រងផ្លូវឆ្លងកាត់ និងដីចំណីផ្លូវដែក
ដោយៈ សុផល / ភ្នំពេញៈ អន្តរក្រសួង កាលពីថ្ងៃទី២៨ ខែកុម្ភៈ ឆ្នាំ២០២២ បានប្រជុំពិនិត្យ និងពិភាក្សា លើសេចក្តីព្រាងអនុក្រឹត្យ ស្តីពីការគ្រប់គ្រងផ្លូវឆ្លងកាត់ និងដីចំណីផ្លូវដែក ។
សេចក្តីព្រាងអនុក្រឹត្យនេះ មានគោលបំណង៖ កំណត់យន្តការ លើការគ្រប់គ្រងផ្លូវឆ្លងកាត់ និងដីចំណីផ្លូវដែក ដាក់ចេញនូវវិធានការគត្តិយុត្តចាំបាច់ ដើម្បីបង្កើនប្រសិទ្ធភាព ក្នុងការគ្រប់គ្រង ការពារ និងលុបបំបាត់ បាតុភាពអនីត្យានុកូលនានា នៅតាមផ្លូវឆ្លងកាត់ និងដីចំណីផ្លូវដែក បង្កលក្ខណៈងាយស្រួល ដល់សមត្ថកិច្ចពាក់ព័ន្ធ និងរដ្ឋបាលថ្នាក់ ក្រោមជាតិ ក្នុងការគ្រប់គ្រង និងផ្តល់ភាពស្របច្បាប់ ដល់ពលរដ្ឋ ដែលជាម្ចាស់កម្មសិទ្ធិ អចលនទ្រព្យ នៅតាមដីចំណីផ្លូវដែក រួមចំណែកទប់ស្កាត់ ឧបទ្ទវហេតុគ្រោះថ្នាក់ និងបង្កលក្ខណៈងាយស្រួល ដល់ការធ្វើចរាចរណ៍ តាមផ្លូវដែក ថែរក្សាបាននូវ គុណភាព ផ្លូវដែក ឱ្យស្របតាមកម្រិតស្តង់ដាបច្ចេកទេស ដើម្បីធានាបាននូវ អាយុកាលប្រើប្រាស់ ផ្លូវដែក រក្សាសណ្តាប់ធ្នាប់សាធារណៈ និង បង្កើនសោភ័ណភាព នៅតាមផ្លូវដែក។
លោក ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន បានជម្រាបជូន អង្គប្រជុំថាៈ តំណាងក្រសួងសេដ្ឋកិច្ច និងហិរញ្ញវត្ថុ បានស្នើសុំចូលរួម ក្នុងកិច្ចប្រជុំ លើកក្រោយ និងស្នើសុំឱ្យមាន ការពិនិត្យផ្តល់យោបល់ និងធាតុចូលពាក់ព័ន្ធ ដល់ការគ្រប់គ្រង ដីចំណីផ្លូវថ្នល់ និងផ្លូវដែក ការដោះស្រាយផលប៉ះពាល់ និងបទពិសោធន៍ នៃការអនុវត្តកន្លងមក សម្រាប់រៀបចំសេចក្តីព្រាងអនុក្រឹត្យទាំងពីរ ទាំងការគ្រប់គ្រង ដីចំណីផ្លូវថ្នល់ និងដីចំណីផ្លូវដែក ឱ្យបានទូលំទូលាយ និងស៊ីជម្រៅថែមទៀត។
លោករដ្ឋលេខាធិការ ប្រធានអង្គប្រជុំ បានណែនាំក្រុមការងាររៀបចំសេចក្តីព្រាងអនុក្រឹត្យ ស្តីពីការគ្រប់គ្រងផ្លូវឆ្លងកាត់ និងដីចំណីផ្លូវដែក ឱ្យយកខ្លឹមសារ និងមតិទាំងឡាយ ដែលបានលើកឡើង ក្នុងអង្គប្រជុំលើកនេះ ទៅសិក្សាលម្អិតបន្ថែមទៀត និងរៀបចំកែសម្រួល សេចក្តីព្រាងឡើងវិញ ដើម្បីដាក់ជូនអង្គប្រជុំលើកក្រោយទៀត ពិនិត្យពិភាក្សាបន្ត៕/V
