[Rasmei Kampuchea Daily News] - ផ្លូវសម្រាប់កង់ មិនអនុញ្ញាតឱ្យយានយន្តធ្វើចរាចរ ចត ឈប់ ឬប្រើប្រាស់សម្រាប់តែប្រយោជន៍បុគ្គលផ្ទាល់ខ្លួនឡើយ
ដោយៈសុផល/ភ្នំពេញៈផ្លូវសម្រាប់ទោចក្រយាន (កង់)ត្រូវបានសិក្សាសាងសង់ឡើងដើម្បីចូលរួមចំណែកក្នុងការសម្រួលចរាចរណ៍ក្នុងទីក្រុង ក៏ដូចជាដើម្បីទាក់ទាញភ្ញៀវទេសចរចូលមកលំហែរកម្សាន្ដផងដែរ។
ផ្លូវដែលមានគំនូសសញ្ញាសម្រាប់កង់នេះ មិនអនុញ្ញាតឱ្យយានយន្តធ្វើចរាចរ ចត ឈប់ ឬប្រើប្រាស់សម្រាប់តែប្រយោជន៍បុគ្គលផ្ទាល់ខ្លួនឡើយ។
គេសង្កេតឃើញថា៖ នាពេលកន្លងមក និងបច្ចុប្បន្ន គំនូសសញ្ញាសម្រាប់កង់ស្ថិតនៅក្រុងសៀមរាប នៃខេត្តសៀមរាបនេះ បានត្រូវរថយន្ត ម៉ូតូ និងយានជំនិះផ្សេងៗ បានចតនិងឈប់ នៅតាមផ្លូវសម្រាប់កង់ធ្វើដំណើរ ដែលធ្វើឱ្យមានការរិះគន់យ៉ាងខ្លាំងពីអ្នកនិយមជិះកង់ហាត់ប្រាណ។
សូមជម្រាបថា៖ការបែងចែកឱ្យមានផ្លូវសម្រាប់ទោចក្រយាន (កង់) គឺជាគំនិតផ្ដួចផ្ដើមរបស់រាជរដ្ឋាភិបាលក្នុងការលើកកម្ពស់គុណភាពនៃការរស់នៅរបស់ប្រជាពលរដ្ឋ ស្របតាមការអភិវឌ្ឍរបស់សង្គមជាតិ។
ក្រសួងសាធារណការ និងដឹកជញ្ជូន បានស្នើសុំដល់បងប្អូនប្រជាពលរដ្ឋ ចូលរួមគោរពច្បាប់ចរាចរណ៍ ព្រមទាំងចូលរួមថែរក្សាផ្លូវថ្នល់ និងប្រើប្រាស់ដីចំណីផ្លូវតាមគន្លងឱ្យបានត្រឹមត្រូវ។
ជាមួយគ្នានេះដែរ ក្រសួងបានស្នើសុំការសហការពីបងប្អូនប្រជាពលរដ្ឋក្នុងការរាយការណ៍ពីបញ្ហាផ្លូវថ្នល់ដែលត្រូវជួសជុលថែទាំ ក៏ដូចជាករណីឃើញមានគំនូសសញ្ញាចរាចរណ៍រលុប ឬផ្លាកសញ្ញាមានការបាក់បែក ដោយធ្វើការរាយការណ៍រយៈកម្មវិធីថែទាំផ្លូវ (ROAD CARE Mobile App) ដើម្បីអាចឱ្យមន្ត្រីជំនាញចាត់វិធានការទាន់ពេលវេលា៕
