លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានប្រកាសថា នាពេលថ្មីនេះ រាជរដ្ឋាភិបាលកំពុងធ្វើការលើគម្រោងកែលម្អផ្លូវជាតិលេខ៣១, ៣៣ និង៤១។លោកទេសរដ្ឋមន្ត្រី ស៊ុន ចាន់ថុល ថ្លែងបែបនេះ ក្នុងពិធីសម្ពោធកំពង់ផែទេសចរណ៍ក្រុងកែប កាលពីថ្ងៃទី១៩ ខែមករា។ លោកបានបញ្ជាក់ថា ការកែលម្អផ្លូវជាតិទាំងនេះ គឺដើម្បីសម្រួលដល់ការធ្វើដំណើរ និងការដឹកជញ្ជូនកសិផល ក៏ដូចជាទាក់ទាញភ្ញៀវទេសចរណ៍ជាតិ និងអន្តរជាតិ ឱ្យមកទស្សនាខេត្តកែប កាន់តែច្រើន។ ការកែលម្អផ្លូវទាំងនេះ ក៏នឹងធ្វើឱ្យកំពង់ផែថ្មីកាន់តែសកម្មផងដែរ។លោកបានថ្លែងអំណរគុណចំពោះអគ្គនាយកដ្ឋានផ្លូវទឹក និងកំពង់ផែ នៃក្រសួងសាធារណការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ អាជ្ញាធរខេត្តកែប ក្រសួងស្ថាប័នពាក់ព័ន្ធ កងកម្លាំងប្រដាប់អាវុធ និងអ្នកពាក់ព័ន្ធទាំងអស់ ដែល​បាន​ខិតខំ​សម្រេច​បាន​នូវ​ការ​សាងសង់​កំពង់ផែ​ថ្មីនេះ។ ដោយឡែក លោកទេសរដ្ឋមន្រ្តីក៏បានស្នើឲ្យមានការគ្រប់គ្រងកំពង់ផែថ្មីនេះ ដើម្បីធានាបាននូវការប្រុងប្រយ័ត្នសុវត្ថិភាព និងការថែទាំកំពង់ផែឱ្យបានត្រឹមត្រូវផងដែរ៕