នៅថ្ងៃព្រហស្បតិ៍ ១រោច ខែផល្គុន ឆ្នាំរកា នព្វស័ក ព.ស.២៥៦១ ថ្ងៃទី០១ ខែកុម្ភៈ ឆ្នាំ២០១៨ នៅសណ្ឋាគារខេមរាបាត់ដំបង១ ឯកឧត្តម ជួប សុភក្តិ អនុរដ្ឋលេខាធិការក្រសួងសាធារណការ និងដឹកជញ្ជូនបានអញ្ជើញជាអធិបតីក្នុងពិធីបើកសិក្ខាសាលាស្តីអំពីការផ្សព្វផ្សាយបន្តអំពីវិធាន និងនីតិវិធីនៃការគ្រប់គ្រងបញ្ជីសារពើភ័ណ្ឌទ្រព្យសម្បត្តិរដ្ឋ និងការផ្សព្វផ្សាយពង្រាងអង្គភាពថវិកា ដោយមានការចូលរួមពីមន្ត្រីជាន់ខ្ពស់ក្រសួងសាធារណការ និងដឹកជញ្ជូនតំណាងក្រសួងសេដ្ឋកិច្ច និងហិរញ្ញវត្ថុ គ្រូបង្គោល សិក្ខាកាមដែលជាមន្ត្រីមកពីមន្ទីរក្រោមឱវាទក្រសួងសាធារណការ និងដឹក ជញ្ជូន សិក្ខាសាលានេះមានរយៈពេលពីរថ្ងៃ រៀបចំឡើងដោយក្រសួងសាធារណការនិងដឹកជញ្ជូន សហការ ជាមួយក្រសួងសេដ្ឋកិច្ច និងហិរញ្ញវត្ថុក្នុងគោលបំណងផ្សព្វផ្សាយឱ្យបានទូលំទូលាយ បង្កើនការ យល់ដឹង ការគាំទ្រ និងការចូលរួមចំណែកយ៉ាងសកម្មពីគ្រប់អង្គភាពក្រោមឱវាទក្រសួង ដើម្បីឱ្យសិក្ខា កាមទទួលបានចំណេះដឹងអំពីនីតិវិធីនៃការគ្រប់គ្រងបញ្ជីសារពើភ័ណ្ឌទ្រព្យសម្បត្តិរដ្ឋ និងពង្រាង អង្គភាពថវិកា។ អង្គសិក្ខាកាមបានពិភាក្សាលើខ្លឹមសារគន្លឹះនៃអនុក្រឹត្យលេខ៦៦ អនក្រ.បក ដែលចែងអំពីការកំណត់ គោលបំណង ដើម្បីធានាដល់ការគ្រប់គ្រងបញ្ជីសារពើភ័ណ្ឌទ្រព្យសម្បត្តិរដ្ឋ ឱ្យមានប្រសិទ្ធភាព តម្លាភាព គណនេយ្យភាព និងបូរណភាព និងការកំណត់នូវវិធាននិងនីតិវិធីនៃការគ្រប់គ្រងបញ្ជីសារពើ ភ័ណ្ឌទ្រព្យសម្បត្តិរដ្ឋ។ ក្នុងសុន្ទរកថាថ្លែងទៅកាន់អង្គសិក្ខាកាមនាឱកាសនោះ ឯកឧត្តម ជួប សុភក្តិ បានលើកឡើងថា៖ ការងារគ្រប់គ្រងបញ្ជីសារពើភ័ណ្ឌទ្រព្យសម្បត្តិរដ្ឋ ជាការងារមួយមានភាពចាំបាច់ ដែលមន្ត្រីទទួល បន្ទុក ត្រូវផ្តោតការយកចិត្តទុកដាក់ខ្ពស់ និងផែនការសកម្មភាពច្បាស់លាស់ ប្រកបដោយគុណភាព ការទទួលខុសត្រូវ និងអាចជឿទុកចិត្តបាន ដើម្បីឆ្លើយតបដោយភាពវិជ្ជមានទៅនឹងកំណែទម្រង់រចនា សម្ព័ន្ធគ្រប់គ្រងថ្មីរបស់ក្រសួងនាពេលបច្ចុប្បន្ននេះ។ គួរកត់សម្គាល់ផងដែរថា៖ អង្គភាពថវិកាគឺជាអង្គភាពដែលត្រូវបានទទួលអាណត្តិកិច្ចច្បាស់លាស់ក្នុង ការអនុវត្តសកម្មភាពការងារ ដើម្បីបង្កើតបានជាលទ្ធផលជាក់លាក់ និងអាចវាស់វែងបាន ព្រមទាំងរួម ចំណែកដល់ការសម្រេចបាននូវគោលបំណងគោលនយោបាយអាទិភាពរបស់ក្រសួង-ស្ថាប័ន។