ប្រជុំពិភាក្សាបញ្ចប់ការរៀបចំគោលការណ៍ប្រតិបត្តិ (SOP) សម្រាប់គ្រប់គ្រងដំណោះស្រាយបញ្ហាបច្ចេកទេស លើការប្រើប្រាស់ទិន្នន័យ ពន្ធមធ្យោបាយដឹកជញ្ជូន ពន្ធប្រថាប់ត្រា និងផ្ទេរកម្មសិទ្ធិយានជំនិះរួមគ្នា ដើម្បីធានាឱ្យប្រជាពលរដ្ឋអ្នកមកទទួលសេវា និងអ្នកជាប់ពន្ធ អាចទទួលសេវាផ្ទេកម្មសិទ្ធិ និងបង់ពន្ធប្រប្រថាប់ត្រា កាន់តែមានភាពងាយស្រួល លឿនរហ័ស និងកាត់បន្ថយចំណាយ ថ្ងៃព្រហស្បតិ៍ ១៣រោច ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី០២ ខែធ្នូ ឆ្នាំ២០២១ ក្រុមការងារបច្ចេកទេសអន្តរក្រសួងតភ្ជាប់ប្រព័ន្ធស្វ័យប្រវត្តិកម្មដឹកជញ្ជូនផ្លូវគោក (ស.ក.ដ) និងប្រព័ន្ធទិន្នន័យអគ្គនាយកដ្ឋានពន្ធដារ (អ.ព.ដ) បានធ្វើការប្រជុំពិភាក្សាឆ្លងខ្លឹមសារគោលការណ៍ប្រតិបត្តិ (SOP) សម្រាប់គ្រប់គ្រងដំណោះស្រាយបញ្ហាបច្ចេកទេសលើការប្រើប្រាស់ទិន្នន័យពន្ធមធ្យោបាយដឹកជញ្ជូន ពន្ធប្រថាប់ត្រា និងផ្ទេរកម្មសិទ្ធិយានជំនិះរួមគ្នា រវាងក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ។ កិច្ចប្រជុំតាមរយៈប្រព័ន្ធវីដេអូពីចម្ងាយ (Zoom) នេះ ត្រូវបានដឹកនាំដោយសហប្រធាន អ.ព.ដ លោក លឹម ដឺលុច អគ្គនាយករងពន្ធដារ និង សហប្រធាន ស.ក.ដ លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ។ សមាសភាពចូលរួមមាន សមាជិកសមាជិការក្រុមការងារអន្តរក្រសួងចម្រុះ មកពីអគ្គនាយកដ្ឋានដឹកជញ្ជូនផ្លូវគោក និងនាយកដ្ឋានព័ត៌មានវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន និងអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ។ កិច្ចប្រជុំពិភាក្សានេះ មានគោលបំណង ឆ្លងយោបល់ខ្លឹមសារ ដើម្បីផ្តល់សុពលភាពលើ គោលការណ៍ប្រតិបត្តិនេះ ដើម្បីធ្វើយ៉ាងណាឱ្យប្រជាពលរដ្ឋអ្នកមកទទួលសេវា និងអ្នកជាប់ពន្ធ អាចទទួលសេវាផ្ទេកម្មសិទ្ធិ និងបង់ពន្ធប្រប្រថាប់ត្រា កាន់តែមានភាពងាយស្រួល លឿនរហ័ស និងកាត់បន្ថយចំណាយ។ គោលការណ៍ប្រតិបត្តិនេះ ក៏ជាវិធានមួយសម្រាប់ជួយដល់ក្រុមការងារអន្តរក្រសួង ក្នុងការកំណត់នូវការដោះស្រាយមួយដែលមានភាពជាក់លាក់ អាចទទួលយកបាន ព្រមទាំងបង្ហាញពីតម្លាភាព ប្រសិទ្ធភាពនៅក្នុងការដោះស្រាយ និងបង្កើននូវចំណេះដឹង និងបម្រើជាប្រភពនៃឯកសារយោងសម្រាប់ណែនាំ បង្ហាញនូវផែនការ និងការអនុវត្តនូវសកម្មភាពការងារបច្ចេកទេស។ គោលការណ៍ប្រតិបត្តិនេះ គឺនឹងអាចដោះស្រាយរាល់បញ្ហាបច្ចេកទេស ភាពមិនប្រក្រតីនានា ក្នុងការអនុវត្ត ដោយបង្ហាញផ្លូវអនុវត្តឱ្យស្របទៅតាមច្បាប់ និងលិខិតបទដ្ឋាន ព្រមទាំងស្ថានភាពជាក់ស្ដែង។ សូមបញ្ជាក់ផងដែរថា៖ ក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ បានបង្កើតក្រុមការងារបច្ចេកទេសអន្តក្រសួង ដើម្បីធ្វើការតភ្ជាប់ប្រព័ន្ធស្វយប្រវត្តិកម្មដឹកជញ្ជូនផ្លូវគោក និងប្រព័ន្ធទិន្នន័យពន្ធដារ កាលពី ថ្ងៃទី១៣ ខែមីនា ឆ្នាំ២០១៩។ រីឯប្រកាសអន្តរក្រសួង នីតិវិធីផ្ទេរកម្មសិទ្ធិ និងបង់ពន្ធប្រថាប់ត្រាត្រូវបានផ្តល់សុពលភាព កាលពីថ្ងៃ២៧ ខែសីហា ឆ្នាំ២០២០ និងបានដាក់ឱ្យដំណើរការជាផ្លូវការនូវនីតិវិធីផ្ទេរកម្មសិទ្ធិ និងបង់ពន្ធប្រថាប់ត្រារួមគ្នា តាមប្រព័ន្ធបច្ចេកវិទ្យា ក្រោមអធិបតីដ៏ខ្ពង់ខ្ពស់របស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន កាលពីថ្ងៃទី៣០ ខែកញ្ញា ឆ្នាំ២០២០។ អនុវត្តវិធីថ្មីដែលបានដាក់ដំណើរការរយៈពេលប្រមាណ ១៣ខែ បានចួលរួមសម្រួលដល់ការផ្ទេកម្មសិទ្ធិរថយន្ត ប្រមាណ ជាង ៤៣ ០០០ គ្រឿង។ ក្រុមការងារអន្តរក្រសួង ក៏បានពិភាក្សា និងដាក់ទិសដៅ ពេលវេលាជាក់លាក់ ក្នុងការដោះស្រាយបញ្ហាប្រឈម និងការដែលនៅសេសសល់កន្លងមក ដើម្បីធានាការងារកិច្ចសហប្រតិបត្តិការកាន់តែប្រសើរ រវាងស្ថាប័នទាំងពីរ ព្រមទាំងបង្កភាពងាយស្រួល ចំណេញពេលវេលា និងធានានូវប្រសិទ្ធភាព និងតម្លាភាព ជូនបងប្អូនប្រជាពលរដ្ឋ ដែលមកទទួលសេវាសាធារណៈ និងបំពេញកាតព្វកិច្ចបង់ពន្ធ៕