វឌ្ឍនភាពការងារស្ដីពីការសុំជំនួយបច្ចេកទេសក្នុងការសិក្សាគម្រោងផ្លូវចំនួន៦ខ្សែសម្រាប់ស្នើសុំកម្ចីឥណទានពីព្រះរាជាណាចក្រថៃឡង់ ត្រូវបានពិភាក្សារវាងឯកឧត្តមរដ្ឋលេខាធិការប្រចាំការ តូច ចាន់ កុសល និងលោក Col Saranyu Viriyavejakul D. Sc អនុប្រធានទីភ្នាក់ងារសហប្រតិបត្តិការដើម្បីអភិវឌ្ឍន៍ សេដ្ឋកិច្ចនៃប្រទេសជិតខាងនៃព្រះរាជាណាចក្រថៃឡង់ដ៏(NEDA) ថ្ងៃចន្ទ ៣រោច ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី២២ ខែវិច្ឆិកា ឆ្នាំ២០២១ នៅទីស្តីការ ក្រសួង ឯកឧត្តម តូច ចាន់ កុសល រដ្ឋលេខាធិការប្រចាំការក្រសួងសាធារណការ និងដឹកជញ្ជូន បាន អញ្ជើញជួបពិភាក្សាការងារជាមួយលោក Col Saranyu Viriyavejakul D. Sc អនុប្រធានទីភ្នាក់ងារNEDAនិងក្រុមការងារ ដោយមានការចូលរួមតាមប្រព័ន្ធវីដេអូពីចម្ងាយ និងការចូលរួមដោយផ្ទាល់ពីថ្នាក់ ដឹកនាំក្រសួងទទួលបន្ទុក និងមន្ត្រីជំនាញពាក់ព័ន្ធ ដើម្បីពិនិត្យវឌ្ឍនភាពការងារស្ដីពីការសុំជំនួយបច្ចេក ទេសក្នុងការសិក្សាគម្រោងផ្លូវចំនួន៦ខ្សែសម្រាប់ស្នើសុំកម្ចីឥណទានពីព្រះរាជាណាចក្រថៃឡង់។ ជាលទ្ធផលនៃកិច្ចប្រជុំ ក្រសួងសាធារណការ និងដឹកជញ្ជូននៃកម្ពុជា បានស្នើសុំឱ្យទីភ្នាក់ងារNEDA ជួយសិក្សាលើខ្សែផ្លូវចំនួន៦ខ្សែ ឋិតនៅក្នុងភូមិសាស្រ្តទឹកដីខេត្តសៀមរាប ខេត្តឧត្តរមានជ័យ ខេត្តបន្ទាយ មានជ័យ និងខេត្តបាត់ដំបងដើម្បីតភ្ជាប់ការដឹកជញ្ជូន និងជំរុញកំណើនសេដ្ឋកិច្ចនៃប្រទេសទាំងពីរ៕