[Rasmei Kampuchea Daily News] - រដ្ឋមន្ត្រីក្រសួងសាធារណការ ស្នើអូស្ត្រាលី ជួយរៀបចំផែនការមេ សម្រាប់ការគ្រប់គ្រង ទឹកកខ្វក់ នៅកម្ពុជា និងសំណើសំខាន់ៗ មួយចំនួនទៀត
ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានស្នើសុំប្រទេសអូស្ត្រាលី ជួយរៀបចំផែនការមេ សម្រាប់ការគ្រប់គ្រង ទឹកកខ្វក់ នៅក្រុងព្រះសីហនុ ខេត្តព្រះសីហនុ ក៏ដូចជា ជួយរៀបចំផែនការមេ គ្រប់គ្រងទឹក កខ្វក់ ទូទាំងប្រទេស ដោយហេតុថា កំណើនប្រជាជន និងកំណើន នៃការអភិវឌ្ឍសេដ្ឋកិច្ច កាន់តែខ្លាំង ដែលធ្វើឱ្យ ទឹកកខ្វក់ ត្រូវបានបង្ហូរចេញទៅសមុទ្រ ដោយផ្ទាល់ ឬគ្មានការចម្រោះ មុនបង្ហូរចូលសមុទ្រ។
លោកទេសរដ្ឋមន្ត្រី បានស្នើឡើងដូច្នេះ ក្នុងពេលជួបពិភាក្សាការងារទ្វេភាគី ជាមួយលោក Pablo Kang ឯកអគ្គរដ្ឋទូតអូស្ត្រាលី ប្រចាំព្រះរាជាណាចក្រកម្ពុជា នៅសណ្ឋាគារ ឡឺរ៉ូយ៉ាល់ ថ្ងៃទី១៧ ខែវិច្ឆិកា ឆ្នាំ២០២១។
ជាមួយគ្នានោះផងដែរ លោកទេសរដ្ឋមន្ត្រី ក៏បានស្នើឱ្យភាគីអូស្ត្រាលី ពិនិត្យ និងធ្វើបច្ចុប្បន្នភាព ស្តង់ដាបច្ចេកទេស សាងសង់ផ្លូវ និងស្ពានរបស់ប្រទេសអូស្ត្រាលី (P4i) ដើម្បីឱ្យស្របតាមការរីកចម្រើន ផ្នែកបច្ចេកវិទ្យា និងប្រែប្រួលអាកាសធាតុ។ កម្ពុជាបានអនុវត្ត តាមស្តង់ដានេះ អស់រយៈពេលជាង ១០ ឆ្នាំ កន្លងទៅហើយ។
បន្ថែមពីលើនេះ លោកទេសរដ្ឋមន្ត្រី បានស្នើឱ្យភាគីអូស្ត្រាលី ពិនិត្យលទ្ធភាព លើការជួយ គាំទ្រ ដល់ការបណ្តុះបណ្តាល នៅវិទ្យាស្ថានតេជោ សែន សាធារណការ និងដឹកជញ្ជូន ដើម្បីពង្រឹងសមត្ថភាព វិស្វករកម្ពុជា ឱ្យមានសមត្ថភាព អាចសាងសង់ហេដ្ឋារចនាសម្ព័ន្ធ ប្រកបដោយគុណភាព និងការរៀបចំគោល នយោបាយ សម្រាប់ការដឹកជញ្ជូនបៃតង និងបានគូសបញ្ជាក់ ពីតួនាទីចម្បង នៃវិស័យឯកជន ក្នុងការអភិវឌ្ឍហេដ្ឋារចនាសម្ព័ន្ធ ទាំងមូល សម្រាប់គាំទ្រ ដល់ការដឹកជញ្ជូនបៃតង ហើយក្រសួង នឹងខិតខំ ប្រឹងប្រែងពន្លឿន និងលើកទឹកចិត្ត ឱ្យមានការប្រើប្រាស់ យានយន្តដើរដោយ ថាមពលអគ្គិសនី កាន់តែទូលំទូលាយ។
ឆ្លៀតក្នុងឱកាសនៃជំនួបទ្វេភាគីនេះ លោកទេសរដ្ឋមន្ត្រី បានលើកឡើងផងដែរថា៖ កម្ពុជា ត្រូវការថវិកា ប្រមាណ ៤៨ ពាន់លានដុល្លារអាមេរិក ដើម្បីអនុវត្តគម្រោង ចំនួន ៣៣០ ដែលត្រូវបានកំណត់ នៅក្នុងផែនការមេ ប្រព័ន្ធដឹកជញ្ជូន ពហុមធ្យោបាយ និងការតភ្ជាប់ ក្នុងរយៈពេល ១០ ឆ្នាំខាងមុខ។
ទាក់ទងនឹងការអភិវឌ្ឍហេដ្ឋារចនាសម្ព័ន្ធ លោកទេសរដ្ឋមន្ត្រី ក៏បានលើកឡើង ទាក់ទងនឹង គម្រោងស្ថាបនាកំពង់ផែ នៅស្រុកដងទង់ ខេត្តកោះកុង ដោយប្រើប្រាស់ថវិកាជាតិ កំពង់ផែ ខេត្តកំពត និងខេត្តកែប គម្រោងពង្រីកនិងលើកកម្ពស់ គុណភាពផ្លូវជាតិសំខាន់ៗ ពីពីរគន្លង ទៅបួនគន្លង ពីកៅស៊ូពីរ ស្រទាប់ស្តើង (DBST) ទៅបេតុងកៅស៊ូ(AC) ដើម្បីឱ្យសម ស្របនឹងកំណើនសេដ្ឋកិច្ច និងកំណើនដឹកជញ្ជូន។
ជាការឆ្លើយតប លោកឯកអគ្គរដ្ឋទូតអូស្ត្រាលី បានធ្វើការកត់សម្គាល់ សំណើទាំងឡាយ ដែលបានលើកឡើង ដោយលោកទេសរដ្ឋមន្ត្រី និងសន្យាឆ្លើយតប ប្រកបដោយវិជ្ជមាន។ បន្ថែមពីលើនេះ លោកឯកអគ្គរដ្ឋទូត បានសម្តែងនូវចំណាប់អារម្មណ៍ របស់ខ្លួន លើការអភិវឌ្ឍ វិស័យដឹកជញ្ជូនបៃតង ដើម្បីកាត់បន្ថយ បម្រែបម្រួលអាកាសធាតុ និងការអភិវឌ្ឍ ហេដ្ឋារចនាសម្ព័ន្ធផ្លូវថ្នល់ នៅកម្ពុជា។
លោកទេសរដ្ឋមន្ត្រី បានថ្លែងអំណរគុណ យ៉ាងជ្រាលជ្រៅ ដល់រដ្ឋាភិបាលអូស្ត្រាលី ដែលបានផ្ដល់ការគាំទ្រ និងទំនាក់ទំនងល្អ លើការងារស្ដារ និងអភិវឌ្ឍហេដ្ឋារចនាសម្ព័ន្ធរូបវន្ត នៅកម្ពុជា ឱ្យមានការរីកចម្រើន ព្រមទាំងថ្លែងអំណរគុណ ចំពោះលោកឯកអគ្គរដ្ឋទូតអូស្ត្រាលី ដែលបានសន្យាឆ្លើយតប ចំពោះសំណើ របស់កម្ពុជា៕
