យុទ្ធនាការអប់រំផ្សព្វផ្សាយច្បាប់ និងសុវត្ថិភាពស្តីពីចរាចរណ៍ផ្លូវគោក មុនឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមបណ្តោយផ្លូវជាតិលេខ ១ ក្បែរផ្សារគគីរ ស្ថិតក្នុងស្រុកកៀនស្វាយ ខេត្តកណ្តាល ក្រោមអធបិតីភាព លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ.ច. ............................................................................................ នៅថ្ងៃពុធ ១៣កើត ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី១៧ ខែវិច្ឆិកា ឆ្នាំ២០២១ នៅតាមបណ្តោយផ្លូវជាតិលេខ ១ ក្បែរផ្សារគគីរធំ ស្ថិតក្នុងស្រុកកៀនស្វាយ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ.ច. បានអញ្ជើញជាអធិបតីភាពក្នុងយុទ្ធនាការអប់រំផ្សព្វផ្សាយច្បាប់ និងសុវត្ថិភាពចរាចរណ៍ផ្លូវគោក និងមានការចូលរួមអមដំណើរដោយ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោកនៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន និងជាប្រធានផ្នែកអប់រំផ្សព្វផ្សាយ និងបណ្តុះបណ្តាល នៃ អគ្គលេខាធិការដ្ឋាន គ.ស.ច.គ. លោក ជួរ ឈុនឡេង អនុប្រធានមន្ទីរសាធារណការ និងដឹកជញ្ជូនខេត្តកណ្តាល។ យុទ្ធនាការនេះ រៀបចំឡើងដោយ អគ្គលេខាធិការដ្ឋាន នៃគណៈកម្មាធិការជាតិសុវត្ថិភាពចរាចរណ៍ផ្លូវគោក នាយកដ្ឋានសុវត្ថិភាពចរាចរណ៍ផ្លូវគោក និងចូលរួមសហការដោយ មន្ទីរសាធារណការ និងដឹកជញ្ជូនខេត្តកណ្តាល កងកម្លាំងនគរបាលចរាចរណ៍ កងកម្លាំងនគរបាលចរាចរណ៍ស្រុកកៀនស្វាយ ស.ស.យ.ក ក្នុងវិស័យសាធារណការ និងដឹកជញ្ជូន រដ្ឋបាលសាលាស្រុកកៀនស្វាយ។ យុទ្ធនាការអប់រំផ្សព្វផ្សាយច្បាប់ និងសុវត្ថិភាពស្តីពីចរាចរណ៍ផ្លូវគោកនៅមុនឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២១នេះ រៀបចំឡើង ដើម្បីអប់រំផ្សព្វផ្សាយ និងជាការពញ្ញាក់ស្មារតីដល់អ្នកប្រើប្រាស់ផ្លូវទាំងអស់ ឱ្យមានការប្រុងប្រយ័ត្ននៅពេលធ្វើដំណើរតាមដងផ្លូវ និងត្រូវចូលរួមគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួនគ្រប់ៗគ្នា ដើម្បីជៀសវាងឱ្យបាននូវគ្រោះ ថ្នាក់ចរាចរណ៍ដែលអាចកើតមានឡើងជាយថាហេតុ។ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ.ច. បានមានប្រសាសន៍ថា ខណៈពេលដែលស្ថានភាពជំងឺកូវីដ ១៩ នៅកម្ពុជាបានកំពុងធូរស្បើយ ចំនួនគ្រោះថ្នាក់ចរាចរណ៍ផ្លូវគោកមានកំនើនឡើងវិញ។ លោកជំទាវបានសំណូមពរឱ្យអ្នកប្រើប្រាស់យានជំនិះគ្រប់ប្រភេទត្រូវចូលរួមគោរពច្បាប់ចរាចរណ៍ផ្លូវគោក មិនត្រូវបើកបរលើសល្បឿនកំណត់ ត្រូវគោរពសិទ្ធិអាទិភាពក្នុងពេលធ្វើដំណើរ ជាពិសេសត្រូវបើកបរយានទៅតាមគន្លងផ្លូវរបស់ខ្លួន ត្រូវពាក់មួកសុវត្ថិភាពនៅពេលធ្វើដំណើរតាមម៉ូតូដោយមិនគិតទីជិត ឬទីឆ្ងាយឡើយ។ ក្នុងយុទ្ធនាការអប់រំផ្សព្វផ្សាយនេះ បានចែកជូនឯកសារពាក់ព័ន្ធនឹងច្បាប់ស្តីពីចរាចរណ៍ផ្លូវគោក និងមានការរៀបចំកម្មវិធីសួរ និងឆ្លើយសំណួរ សម្រាប់អ្នកចូលរួមយុទ្ធនាការផងដែរ។ ជាលទ្ធផលនៃយុទ្ធនាការនេះ បានចែកមួកសុវត្ថិភាព និងឯកសារមួយចំនួនដូចខាងក្រោម៖ ១. មួកសុវត្ថិភាព ចំនួន ១៥០មួក ២. សៀវច្បាប់ស្តីពីចរាចរណ៍ផ្លូវគោក ចំនួន ៣០០ក្បាល ៣. សៀវភៅអ្វីដែលអ្នកបើកបរម៉ូតូត្រូវយល់ដឹង ចំនួន ៣០០ក្បាល ៤. ខិតបណ្ណអ្វីដែលអ្នកបើកបរត្រូវយល់ដឹង ចំនួន ៣០០សន្លឹក ៥. ខិតបណ្ណប្រការសំខាន់ៗដែលត្រូវចងចាំចំពោះអ្នកប្រើប្រាស់ផ្លូវ ចំនួន ៣០០សន្លឹក ៦. ខិតបណ្ណសុវត្ថិភាពការធ្វើដំណើរតាមរថយន្តក្នុងរដូវកាលកូវីដ ១៩ ចំនួន ៣០០សន្លឹក ៧. ខិតបណ្ណគោរពច្បាប់ចរាចរណ៍ផ្លូវគោក ដើម្បីការពារជីវិតអ្នក គ្រួសារអ្នក និងអ្នកដទៃ ចំនួន ៣០០សន្លឹក ៨. ស្ទីកឃ័រចំណាំងផ្លាត ចំនួន ៤០០សន្លឹក។ ៩. ស្ទីកឃ័រចំណាំងផ្លាត ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍ ចំនួន ១០០សន្លឹក។