ឯកឧត្តមទេសរដ្ឋមន្ត្រី ស៊ុនចាន់ថុល កាលពីពេលថ្មីៗនេះបានបង្ហើបពីគម្រោងរៀបចំសេចក្តីព្រាងគោលនយោបាយដឹកជញ្ជូនផ្លូវគោកដើម្បីលើកទឹកចិត្តឲ្យប្រជាជនកម្ពុជាប្រើប្រាស់រថយន្ដអគ្គសនី ជាពិសេសកាត់បន្ថយអត្រាពន្ធឲ្យបាន ៥០% ។ ការលើកឡើងនេះត្រូវបានធ្វើឡើងកាលពីថ្ងៃទី ១២ខែ ខែវិច្ឆិកា កន្លងទៅនេះ តាមរយៈកិច្ចប្រជុំរដ្ឋមន្ដ្រីក្រសួងដឹកជញ្ជូនអាស៊ាន ។ ខណៈដែលក្រសួងសាធារណៈការនិងដឹកជញ្ជូនកំពុងលើកទឹកចិត្តប្រជាពលរដ្ឋប្រើប្រាស់ឡានអគ្គិសនីនៅកម្ពុជា ប៉ុន្ដែហាក់មានការលំបាកបញ្ចុះបញ្ចូលបន្ដិចដោយសារតែ សព្វថ្ងៃកម្ពុជានៅមិនទាន់មានស្ថានីយ៍សាកឡានអគ្គិសនីយ៍បានត្រឹមត្រូវនៅឡើយ តែទោះជាយ៉ាងណាក៏ដោយពេលនេះរដ្ឋាភិបាលកំពុងស្វែងរកអ្នកវិនិយោគមកបោះទុនវិនិយោគសាងសង់​ស្ថានីយ៍សាកអាគុយនៅកម្ពុជាហើយ។ ឯកឧត្តមក៏បានបន្ថែមទៀតថា រដ្ឋាភិបាលនឹងធ្វើការរួមគ្នាជាមួយនឹងវិស័យឯកជន លើគោលការណ៍ភាពជាដៃគូរដ្ឋ និងឯកជន​ ​(PPP) ដើម្បីធានាការដំឡើងស្ថានីយ៍សាកថ្មឲ្យបានគ្រប់គ្រាន់ និងការបោះចោលអាគុយចាស់ៗបានត្រឹមត្រូវ ។ គួរបញ្ជាក់ផងដែរថា បច្ចុប្បន្ននេះក្រសួងសាធារណការ និងដឹកជញ្ជូនកំពុងតែធ្វើការសហការជាមួយនឹងក្រសូង សេដ្ឋកិច្ច និងហិរញ្ញវត្ថុដើម្បីកាត់បន្ថយអត្រាពន្ធសម្រាប់រថយន្ដអគ្គសនីឲ្យបាន ៥០%។