[Raksmey News] - ទេសរដ្ឋមន្ត្រី ស៊ុន ចាន់ថុល៖ កម្ពុជាត្រូវការថវិកា ប្រមាណ ៤៨ ពាន់លានដុល្លារ អាមេរិក ដើម្បី អនុវត្តគម្រោងចំនួន ៣៣០ ក្នុងផែនការមេ ប្រព័ន្ធដឹកជញ្ជូន ពហុមធ្យោបាយ និងការតភ្ជាប់ ក្នុងរយៈពេល ១០ ឆ្នាំខាងមុខ
2021-11-12
ទៅកាន់ទំព័រចុះផ្សាយក្នុង Raksmey News
ដោយៈ សុផល / ភ្នំពេញ៖ បញ្ហាគ្រោះថ្នាក់ចរាចរណ៍ ដែលកើតមានជារៀងរាល់ឆ្នាំ នៅក្នុងតំបន់ អាស៊ាន ទាមទារឱ្យមានការចូលរួម ពីវិស័យឯកជន ក្នុងការរៀបចំកម្មវិធី ប្រកបដោយនិរន្តរភាព ដើម្បីកាត់បន្ថយអត្រាគ្រោះថ្នាក់។ តាមការប៉ាន់ប្រមាណ បង្ហាញថា អាស៊ាន ត្រូវការថវិកា ប្រមាណ ២១០ ពាន់លានដុល្លារ ក្នុងមួយឆ្នាំ រហូតដល់ឆ្នាំ២០៣០ សម្រាប់ការវិនិយោគ លើហេដ្ឋារចនាសម្ព័ន្ធ ប្រកបដោយ គុណភាព ដើម្បីបង្កើនប្រសិទ្ធភាព នៃការដឹកជញ្ជូនតំបន់ ភស្តុភារកម្ម និងខ្សែសង្វាក់ ផ្គត់ផ្គង់។
ចំពោះកម្ពុជា ត្រូវការថវិកាប្រមាណ ៤៨ពាន់លានដុល្លារអាមេរិកដើម្បីអនុវត្ត គម្រោង ចំនួន ៣៣០ ដែលត្រូវបានកំណត់ នៅក្នុងផែនការមេ ប្រព័ន្ធដឹកជញ្ជូន ពហុមធ្យោបាយ និងការតភ្ជាប់ ក្នុងរយៈពេល ១០ ឆ្នាំខាងមុខ។
ទាំងនេះ ជាការលើកឡើងរបស់លោក ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន នៃព្រះរាជាណាចក្រកម្ពុជា និងជាប្រធានកិច្ចប្រជុំ រដ្ឋមន្ត្រី ដឹកជញ្ជូនអាស៊ាន ក្នុងពេលដឹកនាំកិច្ចប្រជុំ រដ្ឋមន្ត្រីដឹកជញ្ជូនអាស៊ាន លើកទី២៧ ជាមួយក្រុមប្រឹក្សាធុរកិច្ច អាស៊ាន-សហរដ្ឋអាមេរិក (US-ABC) តាមរយៈប្រព័ន្ធវីដេអូពីចម្ងាយ កាលពីថ្ងៃទី១១ ខែវិច្ឆិកា ឆ្នាំ២០២១។
សូមជម្រាបថា កម្ពុជាធ្វើជាម្ចាស់ផ្ទះ ប្រជុំរដ្ឋមន្ត្រីដឹកជញ្ជូនអាស៊ាន លើកទី២៧ តាមរយៈប្រព័ន្ធវីដេអូពីចម្ងាយ នៅថ្ងៃទី១១ និង ១២ ខែវិច្ឆិកា ឆ្នាំ២០២១៕/V-PC
