[Raksmey News] - ប្រទេសចិន បានក្លាយជាដៃគូយុទ្ធសាស្ត្រ ដ៏សំខាន់ កាន់តែខ្លាំងឡើង សម្រាប់អាស៊ាន ក្នុងទិដ្ឋភាពជាច្រើន
2021-11-12
ទៅកាន់ទំព័រចុះផ្សាយក្នុង Raksmey News
ដោយៈ សុផល / ភ្នំពេញៈ កិច្ចប្រជុំរដ្ឋមន្ត្រីដឹកជញ្ជូនអាស៊ាន-ចិន លើកទី២០ ត្រូវបានដឹកនាំ ដោយលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន នៃព្រះរាជាណាចក្រកម្ពុជា និងជាប្រធានកិច្ចប្រជុំ រដ្ឋមន្ត្រីដឹកជញ្ជូនអាស៊ាន និងសមភាគីចិន លោក ZHAO CHONGJIU អនុរដ្ឋមន្ត្រី ក្រសួងដឹកជញ្ជូន នៃសាធារណរដ្ឋប្រជាមានិតចិន តាមរយៈប្រព័ន្ធ វីដេអូពីចម្ងាយ កាលពីថ្ងៃទី១១ ខែវិច្ឆិកា ឆ្នាំ២០២១។
កិច្ចប្រជុំនេះ ក៏មានការចូលរួមពី រដ្ឋមន្ត្រីដឹកជញ្ជូនអាស៊ាន លោក LIM JOCK HOI និងអគ្គលេខាធិការ អាស៊ាន និងគណៈប្រតិភូ អមដំណើរ។
ថ្លែងនៅក្នុងសុន្ទរកថាបើកកិច្ចប្រជុំ លោក ទេសរដ្ឋមន្ត្រី ស៊ុន ចាន់ថុល បានកត់ សម្គាល់ថាៈ ឆ្នាំនេះ គឺជាខួបលើកទី២០ នៃកិច្ចសហប្រតិបត្តិការដឹកជញ្ជូន អាស៊ាន-ចិន ។ ប្រទេសចិន បានក្លាយជា ដៃគូយុទ្ធសាស្ត្រដ៏សំខាន់ កាន់តែខ្លាំងឡើង សម្រាប់អាស៊ាន ក្នុងទិដ្ឋភាពជាច្រើន ជាពិសេស ក្នុងទិដ្ឋភាពពាណិជ្ជកម្ម ដែលក្នុងនោះ ពាណិជ្ជកម្មទ្វេភាគីរបស់យើង បានឈានដល់ដំណាក់ កាល ជាប្រវត្តិសាស្ត្រមួយ។
ឆ្លៀតក្នុងឱកាសនោះដែរ លោកទេសរដ្ឋមន្ត្រី បានផ្តាំផ្ញើនូវការសាកសួរសុខទុក្ខ និងក្តីគោរព តាមរយៈលោក ZHAO CHONGJIU ជូនចំពោះលោក Li XIAOPENG រដ្ឋមន្ត្រីក្រសួងដឹកជញ្ជូន នៃសាធារណរដ្ឋប្រជាមានិតចិន។
លោកទេសរដ្ឋមន្ត្រី ស៊ុន ចាន់ថុល បានលើកឡើងថាៈ ក្នុងអំឡុងពេលជំងឺរាត ត្បាតកូវីដ-១៩ នាពេលនេះ រដ្ឋាភិបាល នៃសាធារណរដ្ឋប្រជាមានិតចិនបានផ្តល់ ការគាំទ្រយ៉ាងខ្លាំង ដល់អាស៊ាន ក្នុងនោះរួមមាន៖ ការផ្តល់វ៉ាក់សាំងបង្ការមេរោគ កូវីដ-១៩ និងជំនួយបច្ចេកទេស ផ្នែកសុខាភិបាល ផងដែរ។ ជាងនេះទៅទៀត ប្រទេសចិន បានប្តេជ្ញាផ្តល់ការគាំទ្រ ដល់អាស៊ាន នៅក្នុងការស្តារ សេដ្ឋកិច្ច ឡើងវិញ ក្រោយវិបត្តិជំងឺរាតត្បាតកូវីដ-១៩។ ក្នុងនាមរដ្ឋសមាជិកអាស៊ាន លោកទេសរដ្ឋមន្ត្រី បានថ្លែងអំណរគុណ យ៉ាងជ្រាលជ្រៅ ជូនចំពោះរដ្ឋាភិបាល និងប្រជាជនចិន ដែលបានប្តេជ្ញាចិត្ត ផ្តល់ការគាំទ្ររបស់ខ្លួន។
លោកទេសរដ្ឋមន្ត្រី បានជម្រាបជូនអង្គប្រជុំថាៈ ក្នុងវិស័យដឹកជញ្ជូន ទំនាក់ទំនង រវាងអាស៊ាន និងចិន កាន់តែមានភាពរឹងមាំ ក្នុងរយៈពេលប៉ុន្មានឆ្នាំ កន្លងមកនេះ តាមរយៈការអនុវត្តកម្មវិធី និងគម្រោងជាច្រើន ប្រកបដោយជោគជ័យក្រោមផែនការ សកម្មភាព សម្រាប់កិច្ចសហប្រតិបត្តិ ការ ដឹកជញ្ជូនអាស៊ាន-ចិន។ ក្នុងនាមជាដៃគូ យូរអង្វែង ប្រទេសចិន បានគាំទ្រយ៉ាងសកម្ម លើការអភិវឌ្ឍ និងការផ្តល់ហិរញ្ញ ប្បទាន ដល់គម្រោងហេដ្ឋារចនាសម្ព័ន្ធអាស៊ាន និងបានជំរុញកិច្ចសហប្រតិបត្តិការ តភ្ជាប់ ក្នុងវិស័យទាំងឡាយ ដូចជា ផ្លូវដែក ផ្លូវហាយវេ កំពង់ផែ និងអាកាស យានដ្ឋាន ដែលបានពន្លឿន ដល់ការអភិវឌ្ឍសេដ្ឋកិច្ចសង្គម ក្នុងតំបន់។
លោកបានបន្ថែមថាៈ រដ្ឋជាសមាជិកអាស៊ាន គាំទ្រគំនិតផ្តួចផ្តើមជាច្រើនដែលដឹកនាំ ដោយ ប្រទេសចិន ដូចជា ខ្សែក្រវាត់និងផ្លូវ មូលនិធិផ្លូវសូត្រ ផ្លូវសូត្រសមុទ្រ សតវត្សរ៍ទី២១ និងធនាគារវិនិយោគ ហេដ្ឋារចនាសម្ព័ន្ធអាស៊ាន (AIIB) ដែលផ្តល់ ការគាំទ្រ និងកៀងគរមូលនិធិ សម្រាប់ការអភិវឌ្ឍហេដ្ឋារចនាសម្ព័ន្ធ ចាំបាច់ជាច្រើន ដែលអាចជំរុញ ដល់ទំនាក់ទំនងផ្ទាល់ និងការតភ្ជាប់ រវាងប្រជាជន និងប្រជាជន សំដៅលើកកម្ពស់កម្រិតជីវភាពរស់នៅ របស់ប្រជាពលរដ្ឋយើង រៀងៗខ្លួន។
លោកទេសរដ្ឋមន្ត្រី បានថ្លែងអំណរគុណ និងការកោតសរសើរ យ៉ាងជ្រាលជ្រៅ ចំពោះមិត្តចិន ដែលបានផ្តល់ការគាំទ្រ លើការកសាងសមត្ថភាព របស់មន្ត្រីក្រសួង សាធារណការ និងដឹកជញ្ជូន កម្ពុជា តាមរយៈកិច្ចសហប្រតិបត្តិការរបស់ខ្លួន ជាមួយវិទ្យាស្ថានតេជោ សែន សាធារណការ និងដឹកជញ្ជូនរបស់ក្រសួង។
លោកទេសរដ្ឋមន្ត្រី បានជម្រាបជូនអង្គប្រជុំផងដែរ អំពីផែនការអនុម័តសេចក្តីព្រាង កម្មវិធី សកម្មភាព ឆ្នាំ ២០២១-២០២៥ នៃផែនការយុទ្ធសាស្ត្រ កែសម្រួល សម្រាប់ កិច្ចសហប្រតិបត្តិការ ដឹកជញ្ជូនអាស៊ាន-ចិន ក្នុងគោលបំណង ដើម្បីជំរុញគម្រោង កិច្ចសហប្រតិបត្តិការ សាងសង់ ហេដ្ឋារចនាសម្ព័ន្ធដឹកជញ្ជូនការរៀបចំកិច្ចសម្រួល ដឹកជញ្ជូន កិច្ចសហប្រតិបត្តិការសមុទ្រ ការបណ្តុះបណ្តាលបុគ្គលិក និងការផ្លាស់ប្តូរ បច្ចេកទេស។
ថ្លែងនៅក្នុងសុន្ទរកថាបិទ លោកទេសរដ្ឋមន្ត្រី បានបញ្ជាក់ថាៈ អាស៊ាន បានពិនិត្យ និងអនុម័ត ឯកសារសំខាន់ៗ ដែលត្រូវបានលើកឡើង នៅក្នុងរបៀបវារៈ នៃកិច្ចប្រជុំ ថ្ងៃនេះ និងបានបង្ហាញ ជំនឿថា ផែនការនេះ នឹងត្រូវបានអនុវត្ត ដោយជោគជ័យ និងទាន់ពេលវេលា ជាមួយនឹងកិច្ចខិតខំ ប្រឹងប្រែងរួមគ្នា និងកិច្ចសហប្រតិបត្តិការ ដ៏រឹងមាំរបស់យើង៕/V-PC
