នៅថ្ងៃអង្គារ ១២រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១៣ ខែមីនា ឆ្នាំ២០១៨ ឯកឧត្តម ទេសរដ្ឋមន្ត្រី ស៊ុន ចាន់ថុល បានអញ្ជើញអមដំណើរសម្ដេចអគ្គមហាសេនាបតីតេជោ ហ៊ុន សែន នាយករដ្ឋ មន្ត្រី នៃព្រះរាជាណាចក្រកម្ពុជា អញ្ជើញចូលរួមជាអធិបតីក្នុងពិធីសម្ពោធបើកឲ្យប្រើប្រាស់កំណាត់ផ្លូវជាតិ លេខ ១ (ដំណាក់កាលទី៤)។ គម្រោងសាងសង់កំណាត់ផ្លូវនេះ មានប្រវែងសរុប ៤ គីឡូម៉ែត្រ គិតចាប់ពីទីប្រជុំជន ត្រង់ចំណុចគល់ស្ពានព្រះមុនីវង្ស (ច្បារអំពៅ) ត្រើយខាងកើត គីឡូម៉ែត្រ លេខ០+០០០ ដល់គីឡួម៉ែត្រ ៤+០០០ ក្នុងសង្កាត់វាលស្បូវ ខណ្ឌច្បារ អំពៅរាជធានីភ្នំពេញ ចំណាយថវិកាសរុបជាង ២៣ លានដុល្លារអាមេរិក ក្នុងនោះថវិកាប្រមាណ ជា១៦លាន ដុល្លារអាមេរិក ជាជំនួយឥតសំណងរបស់រដ្ឋាភិបាលជប៉ុន និងថវិកា៧,៨៧លានដុល្លារអាមេរិក ជាថវិកាបដិភាគរបស់រាជរដ្ឋាភិបាលកម្ពុជា សម្រាប់ ដោះស្រាយគោលនយោបាយ និងផលប៉ះពាល់។ គម្រោងផ្លូវនេះអនុវត្តការសាងសង់ដោយក្រុមហ៊ុនសាជីវកម្ម HAZANA-ANDO CORPORATION និង ត្រួតពិនិត្យលក្ខណៈបច្ចេកទេសសាងសង់ដោយក្រុមហ៊ុនប្រឹក្សាបច្ចេកទេស Katahira & Engineers International ចំណាយរយៈពេលសាងសង់ប្រមាណ២៧ខែចាប់ផ្តើមពីខែមេសា ឆ្នាំ២០១៥ និងបាន បញ្ចប់នៅ ខែកក្កដា ឆ្នាំ២០១៧កន្លងទៅ។ កំណាត់ផ្លូវនេះ ជាផ្លូវយុទ្ធសាស្រ្តសេដ្ឋកិច្ចយ៉ាងសំខាន់ ជាផ្នែកមួយនៃផ្លូវអាស៊ានហាយវ៉េ(AH1) ឆ្លតកាត់ តំបន់ទំនាបនៃមហាអនុតំបន់មេគង្គ(GMS) បម្រើឱ្យកិច្ចសហប្រតិបត្តិការ ការប្រកួតប្រជែង ការរួមគ្នារស់ នៅជាសហគមន៍ ការតភ្ជាប់ ការធ្វើសមាហរណកម្មតំបន់ និងសកលភាវូបនីយកម្ម ពិសេសការដឹកជញ្ជូន ឆ្លងកាត់ ព្រំដែន ការផ្គត់ផ្គង់ភស្តុភារ លំហូរពាណិជ្ជកម្ម និងទេសចរណ៍ជាតិ-អន្តរជាតិ ដែលឆ្លងកាត់តាមច្រកទ្វារ អន្តរជាតិ នានារបស់កម្ពុជា ។ ឯកឧត្តមទេសរដ្ឋមន្ត្រី បានសំណូមពរដល់បងប្អូនប្រជាពលរដ្ឋ អ្នកប្រើប្រាស់ផ្លូវថ្នល់ សូមគោរពច្បាប់ ចរាចរណ៍ទាំងអស់គ្នា សូមពាក់មួកសុវត្ថិភាពនៅពេលជិះម៉ូតូ ពាក់ខ្សែក្រវាត់សុវត្ថិភាពឲ្យបានត្រឹមត្រូវពេល ជិះរថយន្ដ គប្បីប្រុងប្រយ័ត្នជាប់ជានិច្ចក្នុងពេលបើកបរ កុំបើកបរហួសល្បឿនកំណត់ កុំបើកបរពេលស្រវឹង ឬងងុយគេង កុំដឹកជញ្ជូនលើសទម្ងន់កម្រិតកំណត់ និងសូមកុំកែឆ្នៃយានយន្តខុសលក្ខណៈបច្ចេកទេសជា ដាច់ខាត ព្រោះអាចបង្កឲ្យមានគ្រោះថ្នាក់ចរាចរណ៍ផង និងធ្វើឲ្យផ្លូវឆាប់ខូចផង។ ឯកឧត្តមទេសរដ្ឋមន្ត្រី ស៊ុន ចាន់ថុល បានថ្លែងអំណរគុណយ៉ាងជ្រាលជ្រៅដល់អង្គការJICA ក្រុមហ៊ុន សាងសង់ និងក្រុមហ៊ុនប្រឹក្សាបច្ចេកទេស ក្រសួង ស្ថាប័នពាក់ព័ន្ធ ជាពិសេសក្រសួងសេដ្ឋកិច្ចនិងហិរញ្ញវត្ថុ អាជ្ញាធរដែនដី និងបងប្អូនប្រជាពលរដ្ឋ ដែលមានដីធ្លី ភូមិស្ថាន និងផ្ទះសម្បែង ស្ថិតនៅលើការដ្ឋានសាង សង់លើកំណាត់ផ្លូវនេះ ដែលបានចូលរួមបង្កលក្ខណៈងាយស្រួល និងផ្តល់កិច្ចសហការយ៉ាងល្អប្រសើរធ្វើឱ្យការងារសាងសង់ឲ្យដំណើរការទៅដោយរលូន និងជោគជ័យ។ ថ្លែងទៅកាន់អង្គពិធីទាំងមូល សម្តេចអគ្គមហាសេនាបតីតេជោបតី ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា បានបញ្ជាឱ្យសមត្ថកិច្ចពាក់ព័ន្ធគ្រប់រាជធានីខេត្តទាំងអស់ ត្រូវអនុវត្តនីតិវិធីបិទយានដ្ឋាន កែច្នៃខុសលក្ខណៈបច្ចេកទេស ដែលជាប្រភពនៃការកែច្នៃយានយន្ត ដឹកជញ្ជូនលើសទម្ងន់កម្រិតកំណត់នាំ ឱ្យខូចខាតផ្លូវថ្នល់ ស្ពាន និងបង្កគ្រោះថ្នាក់ចរាចរណ៍ផងដែរ។ ជាមួយគ្នានេះផងដែរ សម្តេចក៏បានលើកឡើងជាថ្មីម្តងទៀត អំពីវិធានការដែលត្រូវអនុវត្តឱ្យបានម៉ឺងម៉ាត់ទាក់ ទងនឹងការកាត់ទ្រុងរថយន្តដែលតលើសប្រវែង១៦ម៉ែត្រ ដោយលោកបានបញ្ជាក់ថា៖ តាមលក្ខណៈបច្ចេក ទេស រថយន្តដែលតទ្រុងមានប្រវែងលើស១៦ម៉ែត្រ មិនអាចបើកបរលើដងផ្លូវស្រុកខ្មែរបានទេ ព្រោះពេល បត់អាចទើស បង្កការគ្រោះថ្នាក់ ហើយការតទ្រុងនេះក៏ជាហេតុផលនៃការដឹកជញ្ជូនលើសទម្ងន់កម្រិត កំណត់ធ្វើឱ្យខូចផ្លូវថ្នល់ផងដែរ។ សម្តេចបានមានប្រសាសន៍តាមខ្លឹមសារដើមបញ្ជាក់ថា៖ “សូមបញ្ជាឱ្យកាត់ឡានទាំងអស់ កាត់ហ្នឹង អត់មានថយទេ សូមបញ្ជាក់ លើកនេះ ត្រូវធ្វើអោយច្បាស់លាស់ មិនធ្វើម្តងហើយឈប់ទេ ហើយនាយក រដ្ឋមន្ត្រីឈប់និយាយ ទេ ឡានតទ្រុងវាកើតចេញមកពីណា? ឥឡូវហ្នឹងដើរបិទឱ្យអស់ទៅ ហ្គារ៉ាសឡានណា ដែលហ៊ានតទ្រុង បិទ អាហ្នឹងក្រវាត់ចោលទៀត កុំអោយវារកស៊ីមើល ហេតុអីក៏វាតទ្រុង ឡានគេផលិតតែ ម៉ែត្រប៉ុន្មានទេ ឯងមក តទ្រុង បិទអាហ្នឹងក្រវាត់ចោលទៀត ហើយមិនឱ្យធ្វើចរាចរណ៍លើផ្លូវទេ រួចហើយចេះ តែយកហេតុផលនេះ ហេតុផលនោះ ប្រទេសគេផ្សេង ប្រទេសយើងផ្សឹង។ ប្រទេសយើងច្បាប់អនុញ្ញាតតែ ១៦ម៉ែត្រទេ ព្រោះផ្លូវ របស់យើងវាតូច បើទៅឆ្ងាយលើសពីហ្នឹងបត់វាអត់កើត វាទៅប៉ះពាល់នេះ ប៉ះពាល់នោះ ច្រើនណាស់”។