ឯកឧត្តមរដ្ឋលេខាធិការ ប៉េង ពោធិ៍នា ទទួលជួបពិភាក្សាការងារជាមួយគណៈប្រតិភូអធិការកិច្ចក្រសួង សេដ្ឋកិច្ច និងហិរញ្ញវត្ថុ ដើម្បីពិភាក្សាការងារទាក់ទងនឹងការចុះធ្វើអធិការកិច្ចហិរញ្ញវត្ថុលើការគ្រប់គ្រងអនុវត្តចំណូល-ចំណាយថវិការដ្ឋ ការគ្រប់គ្រងទ្រព្យសម្បត្តិរដ្ឋក្នុងការិយបរិច្ឆេទ២០២០ និងឆ្នាំពាក់ព័ន្ធ ថ្ងៃចន្ទ ៤កើត ខែកត្តិក ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០៨ ខែវិច្ឆិកា ឆ្នាំ២០២១ នៅទីស្ដីការ ក្រសួង ឯកឧត្តម ប៉េង ពោធិ៍នា រដ្ឋលេខាធិការក្រសួងសាធារណការ និងដឹកជញ្ជូន បានទទួលជួប ពិភាក្សាការងារជាមួយគណៈប្រតិភូអធិការកិច្ចក្រសួងសេដ្ឋកិច្ច និងហិរញ្ញវត្ថុ ដែលដឹកនាំដោយឯកឧត្តម ស្តើង សុខុម រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ទាក់ទងនឹងការគ្រប់គ្រងអនុវត្តចំណូល-ចំណាយថវិការដ្ឋ ការគ្រប់គ្រងទ្រព្យសម្បត្តិរដ្ឋក្នុងការិយបរិច្ឆេទ២០២០ និងឆ្នាំពាក់ព័ន្ធ និងត្រួតពិនិត្យ សារឡើងវិញនូវបណ្តាវិធានការរបស់គណៈប្រតិភូអធិការកិច្ចហិរញ្ញវត្ថុ ដែលបានលើកឡើងក្នុងការត្រួតពិនិត្យការិយបរិច្ឆេទ២០១៩ ដោយមានការចូលរួមពីថ្នាក់ដឹកនាំក្រសួងទទួលបន្ទុក មន្ត្រីជំនាញមកពី អង្គភាពនានាក្រោមឱក្រសួង។ ថ្លែងក្នុងជំនួបមុនចាប់ផ្តើមការចុះធ្វើអធិការកិច្ច ឯកឧត្ដមរដ្ឋលេខាធិការ បានសម្ដែងនូវការស្វាគមន៍យ៉ាង កក់ក្តៅចំពោះគណៈប្រតិភូដែលបានអញ្ជើញមកធ្វើអធិការកិច្ចនៅក្រសួងសាធារណការ និងដឹកជញ្ជូន នា ពេលនេះ និងបានជំរុញលើកទឹកចិត្តឱ្យថ្នាក់ដឹកនាំគ្រប់អង្គភាពក្រោមឱវាទទីស្ដីការក្រសួងសហការឱ្យ បានជិតស្និទ្ធជាមួយគណៈប្រតិភូអធិការកិច្ច ដើម្បីបង្កលក្ខណៈងាយស្រួលឱ្យការចុះធ្វើអធិការកិច្ចនេះ ទទួលបានជោគជ័យ និងទទួលបានលទ្ធផលតាមការគ្រោងទុក។ ជាការឆ្លើយតប ឯកឧត្តមស្តើង សុខុម រដ្ឋលេខាធិការ និងជាប្រធានគណៈប្រតិភូក្រសួងសេដ្ឋកិច្ច និង ហិរញ្ញវត្ថុបានសម្តែងនូវសេចក្តីរីករាយ និងបានពាំនាំនូវការកោតសរសើររបស់ថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុជូនចំពោះថ្នាក់ដឹកនាំ និងមន្រ្តីរាជការក្រសួងសាធារណការ និងដឹកជញ្ជូន ដែលបានខិតខំប្រឹងប្រែងសម្រេចបានស្នាដៃល្អក្នុងការសាងសង់ហេដ្ឋារចនាសម្ព័ន្ធដឹកជញ្ជូន និងផ្តល់សេវាសាធារណៈ ល្អប្រសើរ និងប្រមូលចំណូលបានច្រើនជូនថវិការដ្ឋ។ ឯកឧត្តម ក៏បានលើកឡើងផងដែរនូវសំណូមពរការងារមួយចំនួនទាក់ទងទៅនឹងរបាយការណ៍អធិការ កិច្ចក្នុងឆ្នាំ២០១៩ និង២០២០ និងឆ្នាំកន្លងទៅ ដែលមានការងារខ្លះពាក់ព័ន្ធនឹងការគ្រប់គ្រងបំណុលទាមទាររយៈពេលច្រើនឆ្នាំ ការចុះបញ្ជីទ្រព្យសម្បត្តិអចលនវត្ថុរបស់ក្រសួងច្រើនកន្លែង កាតព្វកិច្ចលទ្ធកម្មរបស់អង្គភាពពាក់ព័ន្ធមួយចំនួនដែលនៅមិនទាន់អនុវត្តបាន និងបានស្នើឱ្យមានកិច្ចសហការបន្ថែម ដើម្បី ជំរុញការងារនេះឱ្យចប់សព្វគ្រប់តាមសណូមពរ ស្របតាមរបាយការណ៍ និងនីតិវិធីអធិការកិច្ច។ អង្គប្រជុំ បានប្រព្រឹត្តទៅចប់សព្វគ្រប់នៅវេលាម៉ាង១០ និង៣០នាទី៕