គណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការរបស់ក្រសួងសាធារណការ និងដឹកជញ្ជូន បានបើកសិក្ខាសាលាផ្សព្វផ្សាយសេចក្តីណែនាំស្តីបែបបទ និងនីតិវិធីនៃការគ្រប់គ្រង និងការផ្តល់សេវារដ្ឋបាលក្នុងវិស័យដឹកជញ្ជូនផ្លូវគោកនៅរដ្ឋបាលក្រុង ស្រុក ខណ្ឌ ដល់មន្រ្តីអនុវត្តមុខងារនៅរដ្ឋបាលក្រុង ស្រុក ខណ្ឌ នៅថ្ងៃអង្គារ ១២រោច ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០២ ខែវិច្ឆិកា ឆ្នាំ២០២១ នៅសាលសាលាខេត្តត្បូងឃ្មុំ ឯកឧត្តម មាស ម៉ូនីកា អនុរដ្ឋលេខាធិការ និងជាអនុប្រធានគណៈកម្មការ តំណាងដ៏ខ្ពង់ខ្ពស់ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តី និងជាប្រធានគណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការរបស់ក្រសួង បានបើកសិក្ខាសាលាផ្សព្វផ្សាយសេចក្តីណែនាំស្តីបែបបទ និងនីតិវិធីនៃការគ្រប់គ្រង និងការផ្តល់សេវារដ្ឋបាលក្នុងវិស័យដឹកជញ្ជូនផ្លូវគោកនៅរដ្ឋបាលក្រុង ស្រុក ខណ្ឌ រយៈពេល២ថ្ងៃ ថ្ងៃទី២-៣ ខែវិច្ឋិកា ឆ្នាំ២០២១ ដែលមានការអញ្ជើញចូលរួមអភិបាលនៃគណៈអភិបាលខេត្ត-ស្រុក ក្រុមប្រឹក្សាខេត្ត-ស្រុក មន្ទីរសាធារណការ និងដឹកជញ្ជូន ប្រធាន និងមន្រ្តីអនុវត្តមុខងារការិយាល័យច្រកចេញចូលតែមួយស្រុក របស់រដ្ឋបាលខេត្តចំនួន៣(ខេត្តត្បូងឃ្មុំ ខេត្តកំពង់ចាម និងខេត្តព្រៃវែង) ហើយមានរដ្ឋបាលស្រុកចំនួន២១ ដែលមិនទាន់បានទទួលបានការផ្សព្វផ្សាយ និងបណ្តុះបណ្តាលដល់មន្រ្តីអនុវត្តមុខងារលើបែបបទ និងនីតិវិធីនៃការគ្រប់គ្រង និងការផ្តល់សេវារដ្ឋបាលក្នុងវិស័យដឹកជញ្ជូនផ្លូវគោក នៅថ្នាក់ក្រុង ស្រុក ខណ្ឌ មានសមាសភាពសរុប ១២០នាក់(ស្រី២០នាក់)។ ការផ្សព្វផ្សាយលើបែបបទ និងនីតិវិធីការគ្រប់គ្រងលើការអនុវត្តមុខងារក្នុងវិស័យដឹកជញ្ជូនគោក នាពេលនេះ មានមុខងារចំនួន៤ រួមមាន៖ (១)ការគ្រប់គ្រងការចុះបញ្ជី និងការផ្តល់លិខិតអនុញ្ញាតធ្វើអាជីវកម្មយានដ្ឋានជួសជុល កែច្នៃដំឡើងទោចក្រយានយន្ត (២)សេវាចុះបញ្ជីទោចក្រយានយន្ត (ចុះបញ្ជី ប្តូរទុតិយតា និងតតិយតាបណ្ណសម្គាល់ ប្តូរ ទុតិយតា និងតតិយតាផ្លាកលេខ) (៣)សេវាចុះបញ្ជីត្រីចក្រយានយន្ត និងរ៉ឺម៉កទោចក្រយានយន្ត(ចុះបញ្ជីត្រីចក្រយានយន្ត ចុះបញ្ជីរ៉ឺម៉កទោចក្រយានយន្ត ប្តូរ ទុតិយតា និង តតិយតាបណ្ណសម្គាល់ត្រីចក្រយានយន្ត ប្តូរ ទុតិយតា និងតតិយតាផ្លាកលេខសម្គាល់ត្រីចក្រយានយន្ត និងរ៉ឺម៉កទោចក្រយានយន្ត) និង(៤)ការត្រួតពិនិត្យលក្ខណៈបច្ចេកទេសត្រីចក្រយានយន្ត និងទោចក្រយានយន្ត សណ្តោងរ៉ឺម៉ក(ប្រគល់ ទុតិយតា និងតតិយតា វិញ្ញាបនបត្រត្រួតពិនិត្យបច្ចេកទេស)៕