ឯកឧត្តមរដ្ឋលេខាធិការ យិត បុណ្ណា ដឹកនាំកិច្ចប្រជុំពិភាក្សាលើការរៀបចំប្រព័ន្ធគ្រប់គ្រងការងារត្រួតពិនិត្យផ្លូវ (ROAD CARE Supervision) ថ្ងៃចន្ទ ១១រោច ខែអស្សុជ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី០១ ខែវិច្ឆិកា ឆ្នាំ២០២១ នៅទីស្តីការ ក្រសួង ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មការគ្រប់គ្រងការអនុវត្តកម្មវិធីថែទាំ (ROAD CARE Mobile App) បានអញ្ជើញដឹកនាំកិច្ចប្រជុំពិភាក្សាអំពីវឌ្ឍភាពការងាររៀបចំប្រព័ន្ធគ្រប់គ្រងការងារត្រួតពិនិត្យគុណភាពផ្លូវ (ROAD CARE Supervision) ដោយមានការអញ្ជើញចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីថ្នាក់ដឹកនាំក្រសួងទទួលបន្ទុក មន្ត្រីមកពីអគ្គនាយកដ្ឋានបច្ចេកទេស អគ្គនាយកដ្ឋានសាធារណការ នាយកដ្ឋានព័ត៌មានវិទ្យា និងទំនាក់ទំនងសាធារណៈ និងមន្ត្រីពាក់ព័ន្ធក្រោមឱវាទក្រសួងផងដែរ។ គួរកត់សម្គាល់ថា៖ មុខងារត្រួតពិនិត្យគុណភាពផ្លូវ (ROAD CARE Supervision) គឺជាមុខងារថ្មីមួយ នៅក្នុងកម្មវិធីថែទាំផ្លូវ (ROAD CARE Mobile App) ដែលអាចឱ្យថ្នាក់ដឹកនាំក្រសួងធ្វើការតាមដានការងារត្រួតពិនិត្យគុណភាពផ្លូវតាមរយៈរបាយការណ៍សាងសង់ របាយការណ៍ត្រួតពិនិត្យគុណភាព និងរបាយការណ៍វាយតម្លៃការងារសាងសង់ ក្នុងគោលបំណងឱ្យការអនុវត្តការងារកាន់តែមានប្រសិទ្ធភាព តម្លាភាព ពង្រឹងគុណភាពផ្លូវឱ្យកាន់តែរឹងមាំ ប្រើប្រាស់ជាប់បានយូរអង្វែង និងកាត់បន្ថយចំណាយថវិកាក្នុងការជួសជុលថែទាំ។ កិច្ចប្រជុំបានពិភាក្សាយ៉ាងផុសផុលទៅលើគំនូសប្លង់ប្រព័ន្ធរបស់មុខងារត្រួតពិនិត្យគុណភាពផ្លូវ (ROAD CARE Supervision) ក៏ដូចជាដាក់បញ្ជូលការងារជួសជុលថែទាំប្រចាំ និងសាងសង់ថ្មី និងការដាក់ចេញនូវយន្តការក្នុងគ្រប់គ្រងអនុវត្តមុខងារនេះ។ ថ្លែងទៅកាន់អង្គប្រជុំនាឱកាសនោះ ឯកឧត្តមរដ្ឋលេខាធិការ និងជាប្រធានអង្គប្រជុំបានគូសបញ្ជាក់អំពីសារៈសំខាន់ និងភាពចាំបាច់នៃការអភិវឌ្ឍមុខងារថ្មីនេះ និងបានផ្តល់អនុសាសន៍ណែនាំឱ្យអង្គភាពពាក់ព័ន្ធធ្វើការជំរុញបន្ថែមលើការអភិវឌ្ឍមុខងារត្រួតពិនិត្យគុណភាពផ្លូវ (ROAD CARE Supervision)ឱ្យកាន់ប្រសើរឡើង និងកាន់តែមានប្រសិទ្ធភាពថែមទៀត។ ជាមួយគ្នានោះផងដែរ អង្គប្រជុំបានឯកភាពគាំទ្រលើការអភិវឌ្ឍប្រព័ន្ធបច្ចេកវិទ្យានេះ និងបានសម្រេចជ្រើសយកគម្រោងអន្តជាតិមួយចំនួនធ្វើការសាកល្បងអនុវត្ត ព្រមទាំងឯកភាពលើការបង្កើតអនុក្រុមការងារសម្រាប់រៀបចំប្រព័ន្ធ ដោយការរៀបចំប្រព័ន្ធចែកជា៣ដំណាក់ ១. ពិនិត្យលើឯកសារសំណើគម្រោង និងស្នើសុំគោលការណ៍ឯកភាពពីឯកឧត្តមទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន ២.សិក្សាលើគំនូសប្លង់លម្អិតរបស់ប្រព័ន្ធ ៣.ការអភិវឌ្ឍប្រព័ន្ធ និងកម្មវិធីទូរសព្ទដៃ ដើម្បីអាចឱ្យក្រុមការងារបច្ចេកទេសនៃនាយកដ្ឋានព័ត៌មានវិទ្យា និងទំនាក់ទំនងសាធារណៈ អាចចាប់ផ្តើមធ្វើការអភិវឌ្ឍមុខងារត្រួតពិនិត្យគុណភាពផ្លូវ (ROAD CARE Supervision) នេះ៕