[Rasmei Kampuchea Daily News] - វិទ្យាស្ថានតេជោសែន សាធារណការ និងសាលាភូមិន្ទរដ្ឋបាល រួមគ្នាបណ្តុះបណ្តាល ធនធានមនុស្ស និងលើកកម្ពស់ កិច្ចសហប្រតិបត្តិការ សិក្សាអប់រំ
ភ្នំពេញ៖ វិទ្យាស្ថានតេជោសែន សាធារណការ និងដឹកជញ្ជូន និង សាលាភូមិន្ទរដ្ឋបាល បានចុះហត្ថលេខា លើអនុស្សរណៈ នៃការយោគយល់គ្នា ដើម្បីរួមគ្នាបណ្តុះបណ្តាល ធនធានមនុស្ស និងលើកកម្ពស់វិស័យសិក្សាអប់រំ។
ពិធីចុះហត្ថលេខា នាថ្ងៃទី២០ ខែតុលា ឆ្នាំ២០២១ នៅទីស្តីការក្រសួងសាធារណការ និង ដឹកជញ្ជូន មានការអញ្ជើញចូលរួមពី លោកស្រី ឥម នីថារ៉ា រដ្ឋលេខាធិការ និងជាតំណាង លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និង លោក យក់ ប៊ុនណា រដ្ឋលេខាធិការ ប្រចាំការ នៃក្រសួងមុខងារសាធារណៈ និងជានាយកសាលា ភូមិន្ទរដ្ឋបាល។
តាមរយៈអនុស្សរណៈយោគយល់គ្នានេះ ភាគីទាំងពីរ បានឯកភាពគ្នា លើគោលការណ៍ ដូចជា៖ ផ្លាស់ប្តូរសិស្ស និស្សិត កម្មសិក្សាការី មន្ត្រី សាស្ត្រាចារ្យ អ្នកស្រាវជ្រាវ និង បុគ្គលិក, អនុវត្តគម្រោងសហប្រតិបត្តិការ ស្រាវជ្រាវរួមគ្នា, ការចូលរួម និងរៀបចំសន្និសីទ សិក្ខាសាលា និងព្រឹត្តិការណ៍នានា, ផ្លាស់ប្តូរព័ត៌មាន និងសម្ភារបរិក្ខារ ផ្នែកសិក្សាអប់រំ ផ្សេងៗ សហការបណ្តុះបណ្តាល រួមគ្នា និងលើកកម្ពស់កិច្ចសហប្រតិបត្តិការ សិក្សាអប់រំ ផ្សេងទៀត តាមការឯកភាពគ្នា។
លោក ហឿន សំនៀង នាយកវិទ្យាស្ថាន និងជាតំណាងភាគីហត្ថលេខី នៃវិទ្យាស្ថានតេជោ សែន សាធារណការ និងដឹកជញ្ជូន បានមានប្រសាសន៍ថាៈ វិទ្យាស្ថានតេជោសែន សាធារណការ និងដឹកជញ្ជូន ត្រូវបានបង្កើតឡើង ក្នុងគោលបំណង បណ្តុះបណ្តាលកូនខ្មែរ ឱ្យមានជំនាញច្បាស់លាស់ ចំណេះដឹងទូលំទូលាយ និងមានសីលធម៌ អត្តចរិក ចរិយា សម្បតិ្តត្រឹមត្រូវ ដើម្បីដោះស្រាយវិបត្តិ កង្វះអ្នកជំនាញបច្ចេកទេស នាពេលបច្ចុប្បន្ន ផង និងបង្កើតឱ្យមានអ្នកបន្តវេន របស់កម្ពុជា ដ៏មានសក្តានុពល និងស្មារតីទទួលខុសត្រូវ លើវិស័យសាធារណការ និងដឹកជញ្ជូន នាពេលអនាគត រួមចំណែកអភិវឌ្ឍសេដ្ឋកិច្ច និងសង្គមជាតិ។
លោក យក់ ប៊ុនណា បានលើកឡើង អំពីប្រវត្តិរបស់សាលា ភូមិន្ទរដ្ឋបាលមាន ដូចជា ការបណ្ដុះបណ្តាលសិស្សមន្ត្រីក្រមការ និងសិស្សមន្ត្រីជាន់ខ្ពស់ ក៏ដូចជា មន្ត្រីថ្មី ដែលបានជ្រើសរើស នៅតាមក្រសួងស្ថាប័ន ដើម្បីបម្រើការងារ ក្នុងវិស័យរដ្ឋបាល។
ទន្ទឹមនឹងនេះ សាលាភូមិន្ទរដ្ឋបាល ក៏កំពុងបន្តការស្រាវជ្រាវ និងចងក្រងករណីសិក្សា ដើម្បីចែករំលែកចំណេះដឹង នៅក្នុងវិស័យសាធារណៈ និងបានចុះកិច្ចព្រមព្រៀងជាដៃគូ ជាមួយមជ្ឈមណ្ឌលអូស្ត្រាលី សម្រាប់ការបណ្តុះបណ្តាល នៅក្នុងក្របខណ្ឌ ផ្តល់ អាហារូបករណ៍ បណ្តុះបណ្តាល ភាសាអង់គ្លេស សម្រាប់មន្ត្រីរាជការ។
តាមរយៈការចុះអនុស្សរណៈនៃការយោគយល់គ្នានេះ លោក យក់ ប៊ុនណា សង្ឃឹមថា នឹងអាចផ្តល់ជាប្រយោជន៍ ដល់មន្ត្រីរាជការ ដែលបម្រើការងារ នៅក្នុងវិស័យសាធារណការ និងដឹកជញ្ជូន ក៏ដូចជា វិស័យផ្សេងៗទៀត។
ថ្លែងសំណេះសំណាល ក្នុងអង្គពិធី លោកស្រី ឥម នីថារ៉ា បានមានប្រសាសន៍ថាៈ វិទ្យាស្ថានតេជោសែន សាធារណការ និងដឹកជញ្ជូន មានគោលបំណងពង្រីកវិសាលភាព ផ្តល់ការបណ្តុះបណ្តាលធនធានមនុស្ស ទាំងកម្រិតមធ្យមបច្ចេកទេស ឧត្តមសិក្សា និងក្រោយឧត្តមសិក្សា លើជំនាញបច្ចេកទេស ក្នុងវិស័យសាធារណការ និងដឹកជញ្ជូន។
លោកស្រី រដ្ឋលេខាធិការ បានកត់សម្គាល់ថាៈ កិច្ចសហប្រតិបត្តិការ រវាងភាគីទាំងពីរ នឹងបង្កើតកិច្ចសហប្រតិបត្តិការ និងលើកកម្ពស់ការគាំទ្រគ្នា ទៅវិញទៅមក ពាក់ព័ន្ធនឹងការ សិក្សាអប់រំ ស្រាវជ្រាវ ព្រមទាំងគម្រោងកម្មវិធីផ្សេងៗ ដោយផ្អែកលើគោលការណ៍ ពិគ្រោះយោបល់ ឯកភាព សមភាព យុត្តិធម៌ និងផ្ដល់អត្ថប្រយោជន៍ ដល់គូភាគី ទៅវិញទៅមក។
គួរបញ្ជាក់ផងដែរថា បច្ចុប្បន្ន និស្សិតជំនាន់ទី១ របស់វិទ្យាស្ថាន មានចំនួន ១៩១នាក់ បាននិងកំពុងសិក្សាតាម ប្រព័ន្ធអនឡាញ លើជំនាញចំនួន ៦ ក្នុងដេប៉ាតឺម៉ង់ ចំនួន ៣ រួមមាន ១) ដេប៉ាតឺម៉ង់ សំណង់សាធារណការ៖ លើជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ និងជំនាញប្រព័ន្ធចម្រោះទឹកកខ្វក់, ២) ដេប៉ាតឺម៉ង់គ្រប់គ្រងដឹកជញ្ជូន និងភស្តុភារកម្ម៖ លើជំនាញសេដ្ឋកិច្ច និងគ្រប់គ្រងដឹកជញ្ជូន ផ្លូវគោក ជំនាញគ្រប់គ្រងភស្តុភារកម្ម និងខ្សែច្រវ៉ាក់ផ្គត់ផ្គង់, និង ៣) ដេប៉ាតឺម៉ង់នាវា ចរណ៍៖ លើជំនាញបរិបាលនាវា និងម៉ាស៊ីននាវា។ កម្មវិធីសិក្សារបស់វិទ្យាស្ថាន គឺសិក្សា ពេញមួយថ្ងៃ (ព្រឹក/រសៀល) ៥ ថ្ងៃក្នុងមួយសប្តាហ៍ (ចន្ទ-សុក្រ) ពេលព្រឹកចាប់ពីម៉ោង ៧:០០ ព្រឹក ដល់ម៉ោង ១១:០០ ថ្ងៃត្រង់ និងពេលរសៀល ចាប់ពីម៉ោង ១:០០ រសៀល ដល់ម៉ោង ៥:០០ ល្ងាច ហើយការសិក្សា នៅឆមាសទី២ របស់និស្សិតជំនាន់ទី១នេះ ក៏បានចាប់ផ្ដើម កាលពីថ្ងៃទី៣០ ខែសីហា ឆ្នាំ២០២១ ផងដែរ។
វិទ្យាស្ថាន គ្រោងនឹងរៀបចំការប្រឡង ជ្រើសរើសនិស្សិត ជំនាន់ទី២ នៅចុងខែវិច្ឆិកា ឆ្នាំ២០២១ ខាងមុខនេះ៕
