លោក ឈួន វិន ប្រធាន ស.ស.យ.ក វិស័យសាធារណការ និងដឹកជញ្ជូន អញ្ជើញចូលរួមកិច្ចប្រជុំតាមអនឡាញ ស្តីពីការត្រួតពិនិត្យវឌ្ឍនភាពការងារ និងទិសដៅអនុវត្តបន្ត របស់ ស.ស.យ.ក តាមបណ្តាវិស័យ ស្ថាប័ន នៅថ្ងៃទី១៤ ខែតុលា ឆ្នាំ២០២១ លោក ឈួន វិន ប្រធានសហភាពសហព័ន្ធយុវជនកម្ពុជា វិស័យសាធារណការ និងដឹកជញ្ជូន រួមទាំង លោក ហេង រត្នពិសិដ្ឋ និងលោក ច្រៀង ផល័ក្ខ អនុប្រធាន ស.ស.យ.ក វិស័យសាធារណការ និងដឹកជញ្ចូន បានអញ្ជើញចូលរួមកិច្ចប្រជុំតាមប្រព័ន្ធអនឡាញ (ZOOM ) ស្តីពីការត្រួតពិនិត្យវឌ្ឍនភាពការងារ និងទិសដៅអនុវត្តបន្តរបស់សហភាពសហព័ន្ធយុវជនកម្ពុជា តាមបណ្តាវិស័យ ស្ថាប័ន ក្រោមអធិបតីភាព ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដោយមានការចូលរួមពីគ្រប់គ្រប់ផ្នែកពាក់ព័ន្ធបានចូលរួមផងដែរ។ កិច្ចប្រជុំនេះ មានគោលបំណងជួបជុំសំណេះសំណាលជាមួយសមាជិក សមាជិកា ស.ស.យ.ក. ដែលកំពុងបំពេញភារកិច្ចក្នុងវិស័យនានាតាមក្រសួង ស្ថាប័ន បានស្តាប់ និងចែករំលែកនូវបទពិសោធន៍ការងារដែលក្រុមការងារនិមួយៗ បាននឹងកំពុងអនុវត្តក្នុងក្របខ័ណ្ឌនៃការងារយុវជននៅក្នុងអង្គភាពរបស់ខ្លួន។ នាឱកាសនោះដែរ ឯកឧត្តម ប្រធាន សហភាពសហព័ន្ធយុវជនកម្ពុជា បានថ្លែងអំណរគុណដល់សមាជិក សមាជិកាគ្រប់ផ្នែកទាំងអស់ដែលបានខិតខំលះបង់នូវកម្លាំងកាយ ចិត្ត ក្នុងការបំពេញកិច្ចការងារសង្គម និងបានធ្វើការកត់សម្គាល់នូវរាល់ការចូលរួមចំណែករបស់សមាជិក សមាជិកា ស.ស.យ.ក. តាមបណ្តាវិស័យស្ថាប័ននីមួយៗ ដែលបានប្រើប្រាស់អ្វីដែលជាចំណេះ ជំនាញផ្ទាល់ខ្លួន និងការច្នៃប្រឌិតក្នុងការបំពេញបេសកកម្មរបស់ខ្លួន បើទោះបីជាសមាជិក សមាជិកាម្នាក់ៗមានការមមាញឹក ក្នុងការងារភារកិច្ចប្រចាំថ្ងៃរបស់ខ្លួនក្តី៕