កិច្ចពិភាក្សាពី ត្រៀមដាក់ឱ្យប្រើប្រាស់ ប្រព័ន្ធស្វ័យប្រវត្តិកម្មដាក់ពាក្យស្នើសុំត្រួតពិនិត្យលក្ខណៈបច្ចេកទេសយាន្តជំនិះ(ឆៀក) ជំនាន់ទី២ និងវិធានការនានា ដើម្បីបង្កើនប្រសិទ្ធភាពដល់ការងារគ្រប់គ្រង និងការអនុវត្តការងារ និងផ្តល់សេវាជូនប្រជាពលរដ្ឋ ឱ្យកាន់តែប្រសើរឡើងថែមទៀត ថ្ងៃព្រហស្បតិ៍ ៨កើត ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៤ ខែតុលា ឆ្នាំ២០២១ នៅ ទីស្តីការក្រសួង អគ្គនាយកដ្ឋានដឹកជញ្ជូនផ្លូវគោក ដឹកនាំដោយ ឯកឧត្តម អគ្គនាយក ឈួន វ៉ន់ និង នាយកដ្ឋានព័ត៌មវិទ្យា និងទំនាក់ទំនងសាធារណៈ ដឹកនាំដោយ លោក ហ៊ាង សុទ្ធាយុត្តិ បានជួយ ពិភាក្សាពី ត្រៀមដាក់ឱ្យប្រើប្រាស់ប្រព័ន្ធស្វ័យប្រវត្តិកម្មដាក់ពាក្យស្នើសុំត្រួតពិនិត្យលក្ខណៈបច្ចេកទេសយាន្តជំនិះ(ឆៀក) ជំនាន់ទី២ និងការងារប្រព័ន្ធបច្ចេកវិទ្យាសម្រាប់ការផ្តល់សេវាសាធារណៈ ក្នុងវិស័យដឹកជញ្ជូនផ្លូវគោក។ ឯកឧត្តមអគ្គនាយកបានថ្លែងអំណរគុណយ៉ាងជ្រាលជ្រៅដល់ក្រុម ការងារពាក់ព័ន្ធទាំងអស់ ដែលបានខិតខំប្រឹងប្រែងធ្វើឱ្យប្រសើរឡើងមុខងារក្នុងប្រព័ន្ធស្វ័យប្រវត្តិកម្មដាក់ ពាក្យស្នើសុំត្រួតពិនិត្យលក្ខណៈបច្ចេកទេសយានជំនិះ ជំនាន់ទី២ ព្រមទាំងធ្វើបច្ចុប្បន្នភាពទៅលើមុខងារ មួយចំនួនបន្ថែមទៀតនៅក្នុងប្រព័ន្ធស្វ័យប្រវត្តិកម្ម ដើម្បីកៀងគរចំណូលបន្ថែមជូនក្រសួង។ ឯកឧត្តម សង្ឃឹមយ៉ាងមុតមាំ ថាប្រព័ន្ធថ្មីនេះ នឹងចូលរួមដោះស្រាយបញ្ហាប្រឈម នានា និងធ្វើឱ្យការផ្តល់សេវាកាន់តែមានភាពប្រសើរឡើង។ ជាមួយគ្នានេះផងដែរ លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនង សាធារណៈរបស់ក្រសួង បានលើកឡើងអំពីកិច្ចខិតខំប្រឹងប្រែង យ៉ាង សស្រាក់សស្រាំរបស់ក្រុមការងារ ព័ត៌មានវិទ្យាក្នុងការចូលរួមចំណែកលើការធ្វើកំណែទម្រង់សេវាសាធារណៈ ឱ្យតែកាន់ប្រសើរឡើងប្រកបដោយប្រសិទ្ធភាព និងតម្លាភាពជូនបងប្អូនប្រជាពលរដ្ឋ។ លោកបានបន្ថែមថា ក្រុមការងារ បច្ចេកវិទ្យា របស់នាយកដ្ឋាន បានត្រៀមខ្លួនជាស្រេចក្នុងការដាក់ឱ្យប្រើប្រាស់ប្រព័ន្ធថ្មីនេះ ឱ្យស្របតាមផែនការដែលបានគ្រោងទុក។ លោកប្រធាននាយកដ្ឋាន ក៏បានលើកឡើងអំពី បទពិសោធន៍ ជាមេរៀន ចំពោះការផ្តល់សិទ្ធប្រទានទៅក្រុមហ៊ុនឯកជន ដើម្បីចូលរួម អភិវឌ្ឍប្រព័ន្ធបច្ចេកវិទ្យា ដែលខ្វះការទទួលខុសត្រូវ បានបង្កជាផលលំបាក បញ្ហាស្មុគស្មាញ ដែលប៉ះពាល់ដល់ផលប្រយោជន៍សាធារណៈ និងសន្តិសុខផ្ទៃក្នុងជាតិ ដែលត្រូវមានវិធានការ គ្រប់គ្រងទប់ស្តាក់ក្នុងពេលអនាគត។ នាយកដ្ឋានក៏កំពុងធ្វើការបញ្ចប់ការរៀបចំ គោលការណ៍ សុវត្ថិភាព សន្តិសុខបច្ចេកវិទ្យា ក្នុងក្របខណ្ឌការងារ វិស័យសាធារណការ និងដឹកជញ្ជូន ដើម្បីដាក់ចេញឱ្យប្រើប្រាស់ ចូលរួមធានា សន្តិសុខទិន្នន័យក្នុងវិស័យ និរន្តរភាពការងារគ្រង់គ្រងដោយប្រើប្រាស់បច្ចេកវិទ្យា និងការការពារ អ្នកប្រើប្រាស់ រួមជាមួយវិធានការនានាផងដែរ៕