សេចក្តីប្រកាសព័ត៌មាន ៖ ករណីគណនីហ្វេសប៊ុកឈ្មោះ Ratana Ratana Pol បានបង្ហោះសារ ពាក់ព័ន្ធការជួសជុលអគារមន្ទីរពិសោធន៍ មិនទាន់ទទួលបានប្រាក់ ២៥% ចុងក្រោយ និងប្រាក់ឧបត្ថម្ភការងារក្រៅនៅឡើយ ដែលបានធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់ក្រសួង ក្រសួងសាធារណការ និងដឹកជញ្ជូន មានកិត្តិយស សូមធ្វើសេចក្តីប្រកាសព័ត៌មាន ជម្រាបជូនដល់សាធារណជនឱ្យបានជ្រាបថា កាលពីថ្ងៃព្រហស្បតិ៍ ១កើត ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៧ ខែតុលា ឆ្នាំ២០២១ មានគណនីហ្វេសប៊ុកមួយឈ្មោះថា Ratana Ratana Pol បានបង្ហោះសារដែលមានខ្លឹមសារថា " សូមគោរពសម្តេចពុក សូមជួយកូនផង កូនគ្មានលទ្ធភាពសងថ្លៃពលកម្ម ជាង កម្មករ និងឥវ៉ាន់ទេ ព្រោះកូនទទួលជួសជុលអគារមន្ទីរពិសោធន៍មិនទាន់ទទួលបានប្រាក់២៥%ចុងក្រោយ និងប្រាក់ឧបត្ថម្ភការងារក្រៅនៅឡើយទេ មកដល់ពេលនេះ សូមសម្តេចពុកជួយកូនផង" ចូលក្នុងទំព័រហ្វេសប៊ុក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងទំព័រហ្វេសប៊ុករបស់ក្រសួងសាធារណការ និងដឹកជញ្ជូន ដែលបានធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់ក្រសួងយ៉ាងធ្ងន់ធ្ងរ។ ក្រសួងសូមបញ្ជាក់ជូនថា៖ ម្ចាស់គណនីដែលបានបង្ហោះសារនេះមានឈ្មោះថា ប៉ុល រតនា ជាប្រធានក្រុមម៉ៅការសំណង់បន្តពីក្រុមហ៊ុនមួយ ដែលទទួលម៉ៅការសាងសង់មន្ទីរពិសោធន៍សំណង់ និងសាធារណការ នៃក្រសួងសាធារណការ និងដឹកជញ្ជូន។ នេះជាលើកទី៣ហើយ ដែលក្រសួងទទួលបានបណ្តឹងលើករណីមិនទាន់ទូទាត់ថវិកាគម្រោងសាងសង់មន្ទីរពិសោធន៍សំណង់ និងសាធារណការ។ ករណីនេះបណ្តាលមកពីការមិនបានអនុវត្តត្រឹមត្រូវតាមកិច្ចសន្យាសាងសង់ រវាងប្រធានក្រុមម៉ៅការសំណង់ និងក្រុមហ៊ុនទទួលម៉ៅការសាងសង់មន្ទីរពិសោធន៍សំណង់ និងសាធារណការ។ ករណីនេះ ក្រសួងសូមស្នើឱ្យភាគីទាំងពីរគឺ លោក ប៉ុល រតនា និងក្រុមហ៊ុនទទួលម៉ៅការសាងសង់មន្ទីរពិសោធន៍សំណង់ និងសាធារណការ ដោះស្រាយបញ្ហានេះឱ្យបានសមស្របតាមលក្ខខណ្ឌ ដែលមានចែងនៅក្នុងកិច្ចសន្យាសាងសង់ ហើយមិនពាក់ព័ន្ធនឹងមន្ទីរពិសោធន៍សំណង់ និងសាធារណការ នៃក្រសួងសាធារណការ និងដឹកជញ្ជូនឡើយ៕