[Rasmei News] - សម្រុកជួសជុលផ្លូវជាតិលេខ៤៨ ខណៈភ្លៀងជោកជាំ
2021-10-12
ទៅកាន់ទំព័រចុះផ្សាយក្នុង Rasmei News
កោះកុង៖ អំឡុងរដូវវស្សាភ្លៀងធ្លាក់ស្ទើររាល់ថ្ងៃ បណ្តាលឱ្យកំណាត់ផ្លូវជាតិលេខ៤៨ ទទួលរងផលខូចខាតជាច្រើនកន្លែងមិននឹកស្មានដល់ តែទោះយ៉ាងក្រុមអ្នកជួសជុលក៏សម្រុកឈូសឆាយថែទាំជាបណ្តោះអាសន្នត្បិតជាព្យុះភ្លៀងក៏ដោយ។
ក្នុងចំណោមប្រវែងសរុប១៤៨នៃផ្លូវជាតិលេខ៤៨ ផលខូចខាតមានជិត៤គីឡូម៉ែត្រទៅហើយអំឡុងរដូវវស្សាឆ្នាំនេះ ពោលគឺការប៉ះពាល់ខុសប្លែកពីឆ្នាំទៅច្រើនព្រោះតែកត្តាអាកាសធាតុ កំណាត់ផ្លូវខ្លះចាស់ហួសសុពលភាពប្រើប្រាស់ និងការដឹកទំនិញធ្ងន់ៗជាដើម។
លោក អន ដាវុធ ប្រធានមន្ទីរសាធារណការ និងដឹកជញ្ចូនខេត្តកោះកុងនិយាយនៅថ្ងៃទី១២ ខែតុលានេះថា បញ្ហានេះ ក្រុមមន្ត្រីជំនាញរបស់លោកពុំបានព្រងើយកន្តើយនឹងអ្វីដែលការលំបាករបស់ប្រជាពលរដ្ឋអ្នកដំណើរនោះទេ។ ជំនួសមកវិញមានតែដាក់កម្លាំងគ្រឿងចក្រចុះជួសជុលកែសម្រួលផ្លូវដែលខូចមកជាងាយស្រួលបើកបរឡើងវិញ។ ទោះមានពេលខ្លះភ្លៀងខ្លាំងក៏ដោយ ក៏មន្ត្រីជំនាញពុះពារសម្រេចការងារនេះជាបណ្តោះអាសន្ន។
លោកប្រធានមន្ទីរសាធារណការ និងដឹកជញ្ចូនខេត្តកោះកុង ពន្យល់ថា ដំណើរការជួសជុលពេលនេះ គឺគ្រាន់តែសម្រួលការលំបាកប៉ុណ្ណោះ ទំរាំដំណើរការបើកការដ្ឋានស្ថាបនាថ្មីក្រោមហិរញ្ញប្បទានពីសាធារណរដ្ឋកូរ៉េចូលមកនាខែវិច្ឆិកាខាងមុខ។ ដូច្នេះលោកសុំការយោគយល់ពីអ្នកធ្វើដំណើរលើដងផ្លូវជាតិលេខ៤៨ចំពោះភាពលំបាកអន្តរកាលនេះ។
កំណាត់ផ្លូវជាតិ៤៨ជួបការខូចខាតមានដូចជា៖ ចំណុចឃុំបឹងព្រាវ ស្រុកស្រែអំបិល ចំណុចឃុំកណ្តោល ស្រុកបូទុមសាគរ ចំណុចចំណោទឃុំតាតៃក្រោម ស្រុកកោះកុង និងចំណោទផ្លូវក្នុងក្រុងខេមរភូមិន្ទ ជាដើម។ គម្រោងសាងសង់ និងលើកកម្រិតគុណភាពផ្លូវជាតិលេខ ៤៨ នឹងគ្រោងចំណាយថវិកាសរុបប្រមាណជាង ៧៨ លាន ៣៩៨ពាន់ដុល្លារសហរដ្ឋអាមេរិក។
តាមរយៈគម្រោងស្ថាបនាថ្មីនៃផ្លូវជាតិលេខ៤៨ ដែលមានប្រវែង ១៤៨ គីឡូម៉ែត្រ រយៈពេល៣២ខែចាប់ពីចំណុចចំការហ្លួង ស្រុកស្រែអំបិលដល់ក្រុងខេមរភូមិន្ទ ខេត្តកោះកុង មួយខ្សែនេះក្លាយទៅជាផ្នែកមួយនៃផ្លូវហាយវ៉េអាស៊ាន ១២៣ (ASEAN Highway 123) ដែលភ្ជាប់ប្រទេសកម្ពុជា ទៅព្រះរាជាណាចក្រថៃ និងភ្ជាប់ពីភាគខាងកើតនៃឧបទ្វីបឥណ្ឌូចិន ទៅភាគខាងលិចនៃឧបទ្វីប ឥណ្ឌូចិន ត្រង់ក្រុងដាវ៉េ (Dawai) ប្រទេសភូមា។ នេះបើតាមការអះអាងរបស់លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ចូន កាលពីថ្ងៃទី៧ ខែតុលា ឆ្នាំ២០២១កន្លងទៅ៕
