ថ្ងៃពុធ ៨រោច ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៩ ខែកញ្ញា ឆ្នាំ២០២១ នៅទីស្ដីការ ក្រសួង ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ច ប្រជុំស្តីពីការពិនិត្យវឌ្ឍនភាពប្រចាំខែនៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោម ហិរញ្ញប្បទានឥណទានរបស់ធនាគារពិភពលោក ដែលមានការចូលរួមដោយផ្ទាល់ និងតាមប្រព័ន្ធពី ចម្ងាយ ពីថ្នាក់ដឹកនាំក្រសួងទទួលបន្ទុក មន្ត្រីជំនាញក្រុមការងារបច្ចេកទេស ទីប្រឹក្សាគម្រោង និងភាគី ពាក់ព័ន្ធផងដែរ។ សូមជម្រាបជូនថា៖ ក្រសួងសាធារណការ និងដឹកជញ្ជូន ក៏ដូចជារាជរដ្ឋាភិបាលកម្ពុជាកំពុងបង្កើនការ យកចិត្តទុកដាក់លើការសាងសង់បណ្តាញលូនៅទូទាំងទីក្រុងដោយសហការជាមួយដៃគូអភិវឌ្ឍន៍នានា ដើម្បីចូលរួមចំណែកក្នុងការលើកកម្ពស់ការផ្គត់ផ្គង់ទឹកស្អាត និងអនាម័យ និងលើកកម្ពស់ជីវភាពរស់ជូនប្រជាពលរដ្ឋឱ្យកាន់តែប្រសើរឡើង ធ្វើឱ្យទីក្រុងមានសោភ័ណភាព សណ្ដាប់ធ្នាប់ល្អដែលអាចទាក់ទាញ ភ្ញៀវទេសចរណ៍ និងវិនិយោគិនជាតិ និងអន្តរជាតិឱ្យមកទស្សនា និងដាក់ទុនវិនិយោគបង្កើតការងារធ្វើជូន បងប្អូនប្រជាពលរដ្ឋផងដែរ។ អង្គប្រជុំបានផ្តោតការពិភាក្សាជាសំខាន់លើរបាយការណ៍វឌ្ឍនភាពនៃការអនុវត្តគម្រោងសំខាន់ៗមួយ ចំនួនរួមមាន៖ ការងារគ្រប់គ្រងហិរញ្ញវត្ថុរបស់គម្រោង ការងារគ្រប់គ្រងបណ្តាញលូទឹកកខ្វក់ ការងារស្តារ ប្រឡាយ ដើម្បីរំដោះទឹកភ្លៀងដែលបង្កការរជន់លិចផ្ទះបងប្អូនប្រជាពលរដ្ឋ សកម្មភាពការងារគ្រប់គ្រង ធនធានមនុស្ស ការងារតាមដានវាយតម្លៃការអនុវត្តគម្រោង និងបានពិភាក្សាផងដែរអំពីការងារបច្ចេក ទេស និងជម្រើសទីតាំងសាងសង់ស្ថានីយបូម និងការតភ្ជាប់បណ្តាញលូទឹកស្អាត ទឹកកខ្វក់ និងលូទឹក ភ្លៀងទៅកាន់ខ្នងផ្ទះរបស់ប្រជាពលរដ្ឋ។ គួរកត់សម្គាស់ថា៖ ធនាគារពិភពលោកផ្តល់ជូនឥណទានទឹកស្អាត និងអនាម័យ ដើម្បីជួយធ្វើឱ្យប្រសើរ ឡើងនូវសុខុមាលភាពក្រុមគ្រួសារ និងសហគមន៍របស់បងប្អូនប្រជាពលរដ្ឋ ព្រមទាំងជួយដល់ការពង្រីក អាជីវកម្មផ្នែកប្រព័ន្ធទឹកស្អាត និងអនាម័យផងដែរ។ ការរស់នៅដោយប្រកាន់ភ្ជាប់នូវអនាម័យ និងប្រើ ប្រាស់ទឹកស្អាតជាប្រចាំ គឺជាមូលដ្ឋានគ្រឹះដ៏សំខាន់សម្រាប់សុខុមាលភាពរបស់ប្រជាពលរដ្ឋ។ ថ្លែងទៅកាន់អង្គប្រជុំនាឱកាសនោះ ឯកឧត្តមអនុរដ្ឋលេខាធិការ បានមានមតិណែនាំឱ្យក្រុមការងារអនុវត្ត គម្រោងពាក់ព័ន្ធធ្វើរបាយការណ៍ជាលាយលក្ខណ៍អក្សរឱ្យបានច្បាស់លាស់អំពីសកម្មភាពការងាររបស់ ខ្លួន ជាពិសេសសកម្មភាពការងារទាក់ទងនឹងការតភ្ជាប់បណ្តាញលូទឹកស្អាត ទឹកកខ្វក់ និងលូទឹកភ្លៀងទៅកាន់ខ្នងផ្ទះរបស់ប្រជាពលរដ្ឋ ដើម្បីធ្វើជាមូលដ្ឋានក្នុងការវាយតម្លៃ និងតាមដានការអនុវត្តគម្រោងឱ្យ មានប្រសិទ្ធភាព និងឈានទៅបញ្ចប់ការអនុវត្តគម្រោងប្រកបដោយជោគជ័យតាមការគ្រោងទុក៕