ភ្នំពេញ៖ ការថ្លែងបែបនេះរបស់ ឯកឧត្តម ហឿន សំនៀង នាយកវិទ្យាស្ថានតេជោសែនសាធារណការនិងដឹកជញ្ជូន ក្នុងពិធីបិទវគ្គសិក្ខាសាលា ស្តីពី “ការត្រៀមខ្លួនយកអាហារូបករណ៍ ទៅសិក្សានៅប្រទេសជប៉ុន>> នៅព្រឹកថ្ងៃទី១២ ខែកញ្ញា ឆ្នាំ២០២១នេះដោយបានរៀបចំឡើង ដោយក្រុមយុវជនស្មគ្រចិត្ត ដើម្បីអភិវឌ្ឍសង្គម និងវិទ្យាស្ថានតេជោសាន សាធារណការ និងដឹកជញ្ជូន។ នាឱកាសនោះ ឯកឧត្តមនាយកវិទ្យាស្ថានបានចែករំលែកដល់អង្គពិធីក្នុងនាមដែលឯកឧត្ដមធ្លាប់ទទួលបានឱកាសទៅសិក្សានៅក្រៅប្រទេស ចំនួន៣ដង៖ ទី១-ឆ្នាំ២០០៧-២០១០ អាហារូបករណ៍ទៅអាមេរិក ថ្នាក់បរិញ្ញាបត្រ គ្រប់គ្រងធុរកិច្ច។ ទី២-ឆ្នាំ២០១១ ទទួលបានអាហារូបករណ៍ទៅសិក្សាថ្នាក់បរិញ្ញាបត្រជាន់ខ្ពស់ នៅប្រទេសអូស្ត្រាលី តែមិនបានទៅ ដោយហេតុផលសំខាន់ជាងខ្លួន ក៏បោះបង់ចោល។ ទី៣-ឆ្នាំ២០១២ អាហារូបករណ៍ទៅសកលវិទ្យាល័យហាវឺដ ថ្នាក់បរិញ្ញបត្រជាន់ខ្ពស់ ផ្នែករដ្ឋបាលសាធារណ:។ ឯកឧត្តមបន្តថា៖តាមរយៈបទពិសោធន៍ខាងលើ ឯកឧត្តមក៏បានចែករំលែកនូវចំណុចសំខាន់ៗ ចំនួន២ជ្រុងដូចខាង្រោម៖ *ទី១-ការត្រៀមប្រឡងយកអាហារូបករណ៍ ទៅសិក្សានៅក្រៅប្រទេស រួមមាន៖១. ចំណេះដឹងទូទៅ (ចំណេះដឹងមូលដ្ឋាន និងចំណេះដឹងសកល ដែលអាចកំណត់គោលដៅខ្លួនឯងបានថា តើយើងមានអ្វី និងគេចង់បានអ្វីពីយើង ជាដើម), ២.ចេះភាសារដែលគេប្រើ (ភាសាអង់គ្លេស) ជាស្ពានដ៏សំខាន់បំផុត និងជំនាញសកលផង, ៣. មានជំនាញ និងបទពិសោធន៍ពាក់ព័ន្ធជាមួយជំនាញដែលខ្លួនចង់សិក្សា (ហេតុផលជាក់លាក់ ដោយផ្អែកលើបទពិសោធន៍ នឹងក្លាយជាភស្តុតាងដ៏រឹងមាំក្នុងការឈ្នះ),៤. មានសមត្ថភាពបង្ហាញពីហេតុផលច្បាស់លាស់ (ហេតុផលដែលសំខាន់ ជាងប្រយោជន៍ផ្ទាល់ខ្លួន) ពោលគឺ ការចេះធ្វើបទបង្ហាញ និងចេះបកស្រាយពេញលេង, និង៥. ដាក់ពាក្យត្រឹមត្រូវ ទាំងបច្ចេកទេស ឯកសារពាក់ព័ន្ធ និងពេលវេលា។ ក្នុងន័យនេះ ឯកឧត្តមនាយកវិទ្យាស្ថានតេជោសែន មានបំណ​ងធ្វើឲ្យនិស្សិតយើងក្លាយជាមនុស្សសកល មានសមត្ថភាពចាប់ឱកាសផ្សេងៗ ដូច្នេះ ហើយទើបការបង្កើតថ្នាក់បំប៉នភាសារអង់គ្លេស និងកម្មវិធីចំណេះដឹងផ្សេងៗជាច្រើន ដល់និស្សិត។ *ទី២៖យុវជនដែលទទួលបានអាហារូបករណ៍ទៅសិក្សានៅក្រៅប្រទេស នឹងក្លាយជាបញ្ញវន្តតំណាងពូជសាសន៍ខ្មែរ ដូច្នេះ និស្សិតគួរត្រៀមខ្លួនផងដែរ និងគួរបំពាក់ខ្លួនឯងនូវចំណេះដឹង ស្តីពី ជំនឿ ទំនៀមទំលាប់ វប្បធម៌ សាសនា ប្រពៃណី សិល្បៈ និងគុណតម្លៃ ផ្សេងៗទៀត ដែលតំណាងឲ្យពូជសាសន៍ខ្មែរពិតៗ។ ធ្វើយ៉ាងណា កុំភ្លេចថា ខ្លួនជាខ្មែរ គប្បីធ្វើខ្លួនជាប្រតិភូដំណាងជាតិដ៏ពេញលេង និងគួរជាទីមោទនភាពបំផុតសម្រាប់ពូជខ្មែរ និងកុំវង្វែង កុំស្រវឹងជាមួយវប្បធម៌បរទេស កុំយកខួក្បាលបរទេសមកពាក់ហើយតាំងខ្លួនឯងអស្ចារ្យ ជាងពូជសាសន៍ខ្មែរខ្លួនឯងឲ្យសោះ យើងអស្ចារ្យ យើងខ្លាំង ព្រោះយើងជាពូជខ្មែរ។ ក្នុងគ្រានោះដែរ ឯកឧត្តម ហឿន សំនៀង បានថ្លែងឲ្យដឹងបន្ថែមថា៖ កុំបានទៅរៀននៅបរទេស ត្រឡប់មកខ្មែរវិញ ចេញឬកចេញរាងជាបរទេស ភ្លេចអស់វប្បធម៌ ទំនៀមទំលាប់ សាសនា និងគុណតម្លៃដ៏ល្អរបស់ខ្លួនឯងជាខ្មែរ សម្ញែងសំដែងឬទ្ធិបរទេសដាក់ពូជត្រកូលខ្លួនឯង មិនចេះខ្មាសអៀន។ សូមទៅរៀនឯបរទេស ដើម្បីបានចំណេះដឹង និងបទពិសោធន៍ល្អៗពីគេ តែត្រូវបន្តតម្លភាវៈនៃខ្លួនក្នុងនាមខ្មែរ ជាប្រតិភូតំណាងពូជខ្មែរ ដែលមានទាំងអត្តចរិត ទំនៀមទំលាប់ វប្បធម៌ សាសនាជាដើម។ ឯកឧត្តមនាយកបានបញ្ជាក់ឲ្យដឹងដែរថា ឯកឧត្តមផ្ទាល់មិនដែលមានមោទនភាពហួសពេកនោះឡើយ ទោះបីបានទៅសិក្សានៅសាលាដ៏ល្បីល្បាញមួយលើភពផែនដីនេះក៏ដោយ តែឯកឧត្ដមពិតជាមានមោទនភាព ដែលឯកឧត្ដមបានកើតជាខ្មែរ និងមានឱកាសទៅសិក្សានៅបរទេស ហើយត្រឡប់វិញធ្វើការបម្រើប្រទេសជាតិ ក្នុងនាមកូនខ្មែរ ដ៏ពេញលេង និងជឿជាក់។ សូមបញ្ជាក់ថា ក្នុងវេទិកាខាងលើ ឯកឧត្តមបណ្ឌិត វុទ្ធី មុនីរ័ត្ន ជាវាគ្មិនកិត្តិយស បានចែករំលែកនូវចំណុចសំខាន់ ដល់សិស្ស-និស្សិត ដូចខាងក្រោម៖ ១.ការរៀបចំខ្លួនដើម្បីទទួលបានអាហារូបករណ៍ (ព័ត៌មាននានា ពីអាហារូបករណ៍)។ ២.ការរស់នៅនៅប្រទេសជប៉ុន (មានលក្ខណៈល្អប្រសើរ)។ ៣.បញ្ហាប្រឈមរបស់និស្សិត រាងពិបាកចំពោះអ្នកមិនធ្លាប់ទៅក្រៅប្រទេស។ ៤.ក្រោយការបញ្ចប់ការសិក្សាពីប្រទេសជប៉ុន ភាគច្រើនមានឱកាសការងារច្រើន ព្រោះអ្នកដែលបានបញ្ចប់ពីប្រទេសនេះ គឺមានភាពជាអ្នកដឹកនាំ មានគុណធម៌ សីលធម៌ល្អ ក្នុងការធ្វើការងារជាមួយមនុស្ស៕