ជំនន់ទឹកភ្លៀងបានជនលិចកំណាត់ផ្លូវជាតិលេខ៤ចំនុចភូមិរលាំងសង្កែ សង្កាត់សុព័រទេពក្រុងច្បារមននៃខេត្តកំពង់ស្ពឺរយៈពេលបីថ្ងៃជាប់គ្នា ហើយបានបន្សល់ទុកនូវជង្រុកតូចធំក្រោយពីជំនន់ទឹកភ្លៀងបានស្រកទៅវិញវិញ។មន្ទីរសាធារណការនិងដឹកជញ្ជូនខេត្តបានបញ្ចេញគ្រឿងចក្ររបស់ខ្លួនភ្លាមៗដើម្បីជួសជុលចំនុចរងគ្រោះសម្រួលដល់ការធ្វើដំណើរ។ លោក ស៊ូ ស៊ុន្ធរ៉ា ប្រធានមន្ទីរសាធារណការនិងដឹកជញ្ជូនខេត្តកំពង់ស្ពឺបានប្រាប់នៅថ្ងៃទី២ខែកញ្ញាឆ្នាំ២០២១នេះថាមន្ទីរបានដាក់គ្រឿងចក្រកាយបិទនៅតាមខ្នងប្រឡាយមួយចំនួនដែលបានបាក់ធ្លាយនិងស្តារមុខទឹកតាមប្រឡាយធនធានទឹក ហើយបានធ្វើឱ្យទឹកស្រកមួយផ្នែកធំលែងហូរមកផ្តុំគ្នាបង្កការជនលិចផ្លូវជាតិលេខ៤បន្ថែមទៀត ហើយ ទឹកប្រឡាយក៏ស្រកអស់លឿនធ្វើឱ្យទឹកដែលស្ថិតលើផ្លូវជាតិលេខ៤នៅចំនុចខាងលើបានស្រកអស់ពីផ្លូវ តែបានបន្សល់ទុកនូវជង្ហុកតូចធំដែលទឹកបានហូរផ្តាច់។ហើយដើម្បីបង្កការងាយស្រួលក្នុងការធ្វើដំណើររបស់បងប្អូនប្រជាពលរដ្ឋអ្នកប្រើប្រាស់ផ្លូវនេះជំហានដំបូងមន្ទីរជំនាញត្រូវជួសជុលគ្រលុកសិន បន្ទាប់មកកាយរកលូកាត់ទទឹងផ្លូវដែលបានបិទតាំងពីយូរមកនិងបន្តកាយបើកមុខទឹកអោយធំជាងមុន។ លោក ស៊ូ ស៊ុន្ធរ៉ា រំពឹងថាទឹកភ្លៀងលែងបង្កការជនលិចរំខានដល់ការធ្វើដំណើរទៀតហើយនៅពេលដែលមន្ទីរជំនាញរកឃើញនិងកាយបើកមុខប្រពន្ធ័លូបង្ហូរកាត់ទទឹងផ្លូវបានរួចរាល់ ហើយពិសេសពេលដែលប្រឡាយបង្ហូរបើកបានធំជាងមុន។ សូមបញ្ជាក់ថាខេត្តកំពង់ស្ពឺជាខេត្តមានការអភិវឌ្ឍន៍ខ្លាំងលើវិស័យរោងចក្រ សហគ្រាសនិងអចលនទ្រព្យ ដូច្នេះបឹងបួរជាច្រើនដែលស្ថិតនៅអមសងខាងផ្លូវត្រូវបានចាក់បំពេញដើម្បីសាងសង់ ធ្វើឱ្យទឹកគ្មានកន្លែងស្តុកដូចមុន ហើយផ្លូវទឹកជាច្រើនក៏ត្រូវចាក់លុប ធ្វើឱ្យទឹកគ្មានកន្លែងហូរទៅ។អ្នកសាងសង់នៅអមផ្លូវមួយចំនួនក៏បានចាក់ដីខ្ពស់ជាងផ្លូវនិងគ្មានប្រពន្ធ័លូបង្ហូររំដោះទឹក ទើបធ្វើឱ្យផ្លូវក្លាយជាទីទំនាបសម្រាប់ទឹកហូរលើដែលងាយរងការខូចខាតផងដែរ។ប្រជាពលរដ្ឋបានសំណូមពរយ៉ាងទទូចដល់អាជ្ញាធរមេត្តាពន្លឿនដោះស្រាយបញ្ហានេះផងព្រោះនេះជារដូវវស្សា ភ្លៀងនិងអាចបន្តធ្លាក់ជារៀងរាល់ថ្ងៃហើយជំនន់និងអាចកើតឡើងជាថ្មីប្រសិនដោះបញ្ហានេះមិនទាន់ទេនោះ។