ភ្នំពេញ ៖ ឯកឧត្តមទេសរដ្ឋមន្រ្តី ស៊ុន ចាន់ថុល បានមានប្រសាសន៍ថា តាមពិតកម្ពុជាក៏ចង់បានដែរផ្លូវបេតុង ឬផ្លូវAC ដែលជា ប្រភេទផ្លូវជាប់បានយូរ តែបើសិនជាយើងរង់ចាំថវិកាសម្រាប់សាងសង់ផ្លូវទាំងនេះ យើងមិនមានថវិកាសាងសង់ផ្លូវកៅស៊ូ ឬ ផ្លូវផ្សេងៗ បានទៀតទេ។ ឯកឧត្តមបានថ្លែងដូច្នេះ គឺឆ្លើយ តបទៅនឹងចម្ងល់របស់ប្រជាពលរដ្ឋដែលបានលើកឡើងថា ការសាងសង់ផ្លូវនៅក្នុង ប្រទេស ដោយធ្វើទៅមុខខូចខាងក្រោយ ហើយធ្វើមិនទាន់បានប៉ុន្មានឆ្នាំផង ក៏ចាប់ផ្ដើមខូចជាបណ្ដើរ ហើយពួកគាត់លើកជាចម្ងល់ថា ហេតុអ្វីកម្ពុជាមិនសាងសង់ផ្លូវដែលមានគុណភាព ជាប់បានយូរនៅទូទាំងប្រទេសឬឱ្យបានច្រើនទៅ? ។ ថ្លែងក្នុងកម្មវិធី MPWT LIVE SHOW ក្រោមប្រធានបទ សមិទ្ធផលហេដ្ឋារចនាសម្ព័ន្ធផ្លូវថ្នល់ ចាប់ពីចុងឆ្នាំ២០១៨ ដល់ពេលបច្ចុប្បន្ន និងផែនការកំពុងបន្តរហូតដល់ឆ្នាំ ២០២៣ តាមប្រព័ន្ធអនឡាញ ឆ្លើយតបនឹងសំណួររបស់ប្រជាពលរដ្ឋ ឯកឧត្តម ទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានមានប្រសាសន៍ថា កម្ពុជាក៏មានសមត្ថភាពក្នុងការធ្វើផ្លូវឱ្យរឹងមាំដូចជា ចាក់បេតុងកម្រាស់កន្លះម៉ែត្រ ប៉ុន្តែត្រូវសួរថា យើងយកថវិកាមកពីណាមកសាងសង់ បើកម្ពុជាមានតម្រូវការសាងសង់ផ្លូវច្រើន ដើម្បីស្រួលធ្វើដំណើរឆ្លងកាត់ ។ បន្ថែមពីនោះទៀត ឯកឧត្តមទេសរដ្ឋមន្រ្តីបានបញ្ជាក់ថា តាមពិតផ្លូវដែលកម្ពុជាបានសាងសង់ ក៏មាន អាយុកាលយូរដែរ ប៉ុន្តែដោយសារតែការដឹកលើសទម្ងន់ខ្លាំងពេក ធ្វើឱ្យផ្លូវត្រូវបន្ថយអាយុកាលដែលប្រើប្រាស់ឆាប់ខូចមុនពេលកំណត់។ សំឡេង«ការធ្វើសមហរណកម្មផ្ទៃក្នុងនិងប្រទេសជិតខាង យើងចង់ធ្វើសមហរណកម្មឱ្យមានភាពងាយស្រួលទៅតាមផ្លូវកៅស៊ូ ពីដើមយើងមានតែផ្លូវដីមានផ្លូវកៅស៊ូតិចណាស់ ប៉ុន្តែដោយសារនយោបាយរបស់សម្តេចតេជោហ៊ុន សែន គឺការតភ្ជាប់រវាងរាជធានីភ្នំពេញ ទៅទីរួមខេត្ត ដោយពីទីរួមខេត្តមួយទៅទីរួមខេត្តទៀតដោយផ្លូវកៅស៊ូ ដូច្នេះពេលនោះយើងមិនទាន់មានថវិកាគ្រប់គ្រាន់ ក្នុងការសាងសង់ ផ្លូវប្រភេទAC ឬផ្លូវប្រភេទបេតុងទេ ដោយយើងធ្វើម៉េចចាក់កៅស៊ូសិន ដើម្បីបង្កភាពងាយស្រួលដល់បងប្អូនប្រជាពលរដ្ឋ ដូច្នេះយើងប្រើ ប្រភេទBDSTគឺកៅស៊ូ២ស្រទាប់ស្តើង ។ ដោយសារចំនួនរថយន្តនៅកម្ពុជាពីមុនក៏មិនសូវមានច្រើន ដូច្នេះយើងធ្វើតាមប្រភេទលក្ខណៈ ទៅតាមចំនួនយាន ប៉ុន្តែឥឡូវនេះដោយសារប្រទេសជាតិមានការរីកចម្រើន មានឡានច្រើន សេដ្ឋកិច្ចមានការរីកចម្រើន ដូច្នេះយើងចូល ដល់ដំណាក់កាលទី២ ក្នុងការធ្វើផ្លូវរបស់យើង »។ ឯកឧត្តម ទេសរដ្ឋមន្រ្តី ស៊ុន ចាន់ថុលបញ្ជាក់ថា កម្ពុជានៅតែបន្តសាងសង់ផ្លូវសំខាន់ៗ ឆ្លងកាត់ខេត្តមួយចំនួន ដើម្បីសម្រួលដល់ការ ធ្វើដំណើរនិងដឹកជញ្ជូន ខណៈកម្ពុជាក៏មិវិស៧នរើសអើង ប្រភពថវិកាមកពីបណ្ដាប្រទេសដទៃ ដែលចង់ជួយកម្ពុជានោះឡើយ ដើម្បីយកមក អភិវឌ្ឍហេដ្ឋារចនាសម្ព័ន្ធ ឱ្យតែមានលក្ខខណ្ឌងាយៗ និងឆាប់រហ័ស ព្រោះកម្ពុជាត្រូវការអភិវឌ្ឍជាបន្តបន្ទាប់ ដោយមិនរង់ចាំយូរឆ្នាំ ឡើយ៕