ការសាងសង់ផ្លូវជាតិលេខ២និងលេខ២២ នឹងសម្រេចនៅពាក់កណ្តាលឆ្នាំ២០២២ ដើម្បីសម្រួលដល់ការដឹក ជញ្ជូន និងការធ្វើដំណើរឆ្លង កាត់របស់ប្រជាពលរដ្ឋឱ្យកាន់ តែមានភាពងាយស្រួល ។ នេះបើតាមការបញ្ជាក់របស់ឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដីក្រសួងសាធារណការ និងដឹកជញ្ជូន នៅក្នុងកម្មវិធី MPWT LIVE SHOW ក្រោមប្រធានបទ៖ “សមិទ្ធផលហេដ្ឋារចនាសម្ព័ន្ធផ្លូវថ្នល់ចាប់ពីចុងឆ្នាំ២០១៨ ដល់ពេលបច្ចុប្បន្ន និងផែនការ កំពុងបន្តរហូតដល់ឆ្នាំ២០២៣” ដែលបានរៀបចំឡើងកាលពីថ្ងៃទី៣០​ ខែសីហា ឆ្នាំ២០២១។ ឯកឧត្តមទេសរដ្ឋមន្ត្រី ស៊ុន ចាន់ថុល បានមានប្រសាសន៍ថា គម្រោងស្ថាបនាផ្លូវជាតិលេខ២និងផ្លូវជាតិលេខ២២នេះ ត្រូវពង្រីកពី២គន្លង ទៅ ៤គន្លង ដើម្បីបង្កលក្ខណៈងាយស្រួល ក្នុងការធ្វើដំណើរទៅវិញទៅ មកប្រកបដោយសុវត្ថិភាព ។ ហើយក្រសួងនឹងពន្លឿនការសាង សង់ផ្លូវនេះ ដើម្បីជួយកាត់ បន្ថយគ្រោះថ្នាក់ចរាចរណ៍ ឱ្យកាន់តែល្អប្រសើរ ស្របតាមកំណើនប្រជាពលរដ្ឋ និងកំណើនយានយន្តនាពេលបច្ចុប្បន្ននេះ ថែមទាំងបានជំរុញកំណើនវិស័យសេដ្ឋកិច្ច នៅកម្ពុជា ផងដែរ។ ឯកឧត្ដមបន្ដថា ការសាងសង់ផ្លូវ ជាតិលេខ២និងលេខ២២នេះ តាំងពីថ្ងៃយើងបើកការដ្ឋាន មកដល់ពេលយើងសាងសង់បាន៤៥ភាគរយ តាមការគ្រោងទុក ផ្លូវនេះត្រូវបានបញ្ចប់នៅខែមេសាឆ្នាំ២០២២ ។ ដូច្នេះយើងខ្ញុំនឹងខិតខំ ជំរុញតាមដានក្រុមហ៊ុនសាង សង់នេះ ឱ្យរកគ្រឿងចាក់បន្ថែមនិងបុលិ្គកបន្ថែម ដើម្បីជំរុញយ៉ាងណាឱ្យការងារសាងសង់នេះចប់ជាស្ថាពរតាមការគ្រោងទុក ។ ដូច្នេះយើងនឹងខិតខំបន្តទៀត ជំរុញតាមដាន ពិនិត្យលើគុណភាពសាងសង់ផ្លូវ លេខ២ និងលេខ២២នេះ ឱ្យបានដិតដល់និងញឹកញាប់បំផុត សូមបញ្ជាក់ថា កំណាត់ផ្លូវជាតិលេខ ២ និងផ្លូវជាតិលេខ ២២ នេះ បានបើកការដ្ឋានសាងសង់កាលថ្ងៃទី ១១ ខែ កុម្ភៈ ឆ្នាំ ២០២០ ដែលគ្រោងបញ្ចប់នៅថ្ងៃទី ១៦ ខែមេសា ឆ្នាំ២០២២។ គម្រោងស្ថាបនាផ្លូវនេះមានប្រវែងសរុបជាង ៧២គីឡូម៉ែត្រ ដែលក្នុងនោះកំណាត់ផ្លូវជាតិលេខ ២ ចាប់ ពីរង្វង់មូលតាខ្មៅដល់អូរចំបក់មានប្រវែងជាង ៦២ គីឡូ ម៉ែត្រ និងផ្លូវជាតិលេខ ២២ ពីអូរចំបក់ដល់អង្គតាសោមមានប្រវែងជាង ៩ គីឡូម៉ែត្រ ស្ថិតក្នុងភូមិសាស្ត្រខេត្តតាកែវ៕