កាលពីម្សិលមិញ ពិធីបញ្ចុះបឋមសិលាសាងសង់ អគារមន្ទីរពិសោធន៍ដែលគ្រោងចំណាយថវិកាប្រមាណ៥៨០,០០០ ដុល្លារអាមេរិក​ ជាជំនួយឥតសំណងរបស់សាធារណរដ្ឋកូរ៉េដល់វិទ្យាស្ថានតេជោសែនត្រូវបានធ្វើឡើងក្រោយអធិបតីរដ្ឋមន្ត្រី ក្រសួងសាធារណការ និងដឹកជញ្ជូន។ពិធីបើកការដ្ឋានសាងសង់ត្រូវបានរៀបចំឡើងកាលពីម្សិលមិញដោយក្រសួងសាធារណការដើម្បីសាងសង់បន្ទប់ពិសោធន៍ចំនួន ៥៨០.០០០ ដុល្លារនៅវិទ្យាស្ថានសាធារណការនិងដឹកជញ្ជូនតេជោសែន។ អគារមន្ទីរពិសោធន៍នេះមានកម្ពស់ ២ជាន់ ក្នុងនោះ រួមមាន៖ បន្ទប់ពិសោធន៍កៅស៊ូ (Asphalt Test Lab) បន្ទប់ពិសោធន៍បេតុង (Concrete Test Lab) បន្ទប់ ថែទាំបេតុង (Curing Room) និងបន្ទប់រក្សាទុក និងបន្ទប់ការិយាល័យដែលគ្រោងនឹងបញ្ចប់នៅចុងខែមីនាឆ្នាំក្រោយ។ អគារនេះគ្រោងចំណាយថវិកាប្រមាណ៥៨០.០០០ ដុល្លារអាមេរិក ជាជំនួយឥតសំណងរបស់ក្រសួងរៀបចំដែនដី ហេដ្ឋារចនាសម្ព័ន្ធ និងដឹកជញ្ជូន (MOLIT) នៃសាធារណរដ្ឋកូរ៉េ តាមរយៈវិទ្យាស្ថានកូរ៉េសំណង់ស៊ីវិល និងបច្ចេកវិទ្យាសាងសង់-Korea Institute of Civil Engineering and Building Technology (KICT)។ លោក ស៊ុន ចាន់ថុល បានសម្តែងអំណរគុណយ៉ាងជ្រាលជ្រៅដល់ MOLIT ដែលបានផ្តល់ជាជំនួយឥតសំណងតាមរយ:គម្រោងនវានុវត្តន៍ប្រព័ន្ធសាងសង់ និងគ្រប់គ្រងផ្លូវថ្នល់ក្នុងប្រទេសកម្ពុជា និងវិទ្យាស្ថានតេជោសែនសាធារណការ និងដឹកជញ្ជូននៃក្រសួងសាធារណការផងដែរ។ លោកបានណែនាំឲ្យក្រុមប្រឹក្សាបច្ចេកទេស និងអ្នកសាងសង់ធ្វើយ៉ាងណាឲ្យសំណង់មានគុណភាពល្អ ដើម្បីទុកជាថ្នាលបណ្តុះ បណ្តាល សិក្សាស្រាវជ្រាវ និងពិសោធន៍សម្រាប់កូនខ្មែរជំនាន់ក្រោយៗទៀត។ យោងតាមក្រសួងបានឲ្យដឹងថាវិទ្យាស្ថានតេជោសែនសាធារណការ និងដឹកជញ្ជូន បានទទួលជំនួយឥតសំណង តាមរយៈគម្រោងនវានុវត្តន៍ប្រព័ន្ធសាងសង់ និងគ្រប់គ្រងផ្លូវថ្នល់ក្នុងប្រទេសកម្ពុជា ដែលមានទឹកប្រាក់សរុបប្រមាណ ជាង ៣ ២០០.០០០ ដុល្លារសហរដ្ឋអាមេរិចសម្រាប់រយៈពេល២០២០-២០២៣ ដោយផ្តោតជាសំខាន់លើជំនួយឧបករណ៍ពិសោធន៍សម្រាប់វាយតម្លៃគុណភាពផ្លូវថ្នល់ និងផ្តល់អគារមន្ទីរពិសោធន៍បច្ចេកវិទ្យាសំណង់ សម្រាប់សិក្សាស្រាវជ្រាវ និងពិសោធន៍គុណភាពវត្ថុធាតុផ្លូវថ្នល់។ ក៏ដូចជារថយន្តអង្កេតផ្លូវថ្នល់ស្វ័យប្រវត្តិ (Automatic Survey Vehicle) សម្រាប់ប្រមូលទិន្នន័យគុណភាពផ្លូវថ្នល់ កម្មវិធីគ្រប់គ្រងផ្លូវថ្នល់(Pavement Management System–SMS and Pavement Quality Managment System–PQMS) និងការបណ្តុះបណ្តាលបច្ចេកទេសហេដ្ឋារចនាសម្ព័ន្ធផ្លូវថ្នល់ ដល់មន្ត្រីជំនាញពាក់ព័ន្ធផងដែរ។ ក្រសួងបន្តថា៖ «គម្រោងនេះមានគោលដៅបង្កើនប្រសិទ្ធភាពសាងសង់ហេដ្ឋារចនាសម្ព័ន្ធផ្លូវថ្នល់កម្ពុជា តាមរយៈការពង្រឹងការគ្រប់គ្រងប្រព័ន្ធផ្លូវថ្នល់ ការបណ្តុះបណ្តាលអ្នកជំនាញជាន់ខ្ពស់ ការផ្តល់សម្ភារបច្ចេកទេស និងអគារមន្ទីរពិសោធន៍បច្ចេកវិទ្យាសំណង់ និងពង្រឹងកិច្ចសហប្រតិបត្តិការរវាងប្រទេសទាំងពីរលើវិស័យហេដ្ឋារចនាសម្ព័ន្ធផ្លូវថ្នល់»។ បច្ចុប្បន្នវិទ្យាស្ថានមាននិស្សិតជំនាន់ទី ១ ចំនួន ១៩១ នាក់បាននឹងកំពុងសិក្សាលើមុខជំនាញចំនួន ៦ ក្នុងដេប៉ាតឺម៉ង់ ចំនួន៣ រួមមាន៖ ដេប៉ាតឺម៉ង់សំណង់សាធារណការ លើជំនាញផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ និងជំនាញប្រព័ន្ធចម្រោះទឹកកខ្វក់ ដេប៉ាតឺម៉ង់គ្រប់គ្រងដឹកជញ្ជូន និងភស្តុភារកម្ម លើ មុខជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក និងជំនាញគ្រប់គ្រងភស្តុភារកម្ម និងខ្សែច្រវ៉ាក់ផ្គត់ផ្គង់ និងដេប៉ាតឺម៉ង់នាវាចរណ៍៖ លើមុខជំនាញបរិបាលនាវា និងម៉ាស៊ីននាវា។ នៅខែមករាឆ្នាំនេះ ក្រសួងបានសហការជាមួយក្រសួងអប់រំដោយបានបង្កើតវគ្គសិក្សាវិស្វកម្មថ្មីសម្រាប់ការងារសាធារណៈ និងជំនាញបច្ចេកទេសដឹកជញ្ជូន ដើម្បីកសាងហេដ្ឋារចនាសម្ព័ន្ធប្រកបដោយប្រសិទ្ធភាព និងការរីកចម្រើនបន្ថែមទៀត។ លោក ចាន់ថុល​ បានលើកឡើងថាលោកជឿជាក់ថានិស្សិតកម្ពុជានឹងមានសមត្ថភាព និងជំនាញក្នុងការកសាងហេដ្ឋារចនាសម្ព័ន្ធដឹកជញ្ជូននៅកម្ពុជាប្រកបដោយប្រសិទ្ធភាព និងគុណភាពខ្ពស់បន្ទាប់ពីបញ្ចប់ការសិក្សាពីកម្មវិធីនេះ៕