ភ្នំពេញ ថ្ងៃទី១៩ ខែ​សីហា ឆ្នាំ​២០២១--ឯកឧត្តម ឈួន វ៉ន់ អគ្គនាយក នៃអគ្គនាយក ដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំជាមួយសមភាគីកូរ៉េ ទាក់ទងនឹងគម្រោងរៀបចំផែនការមេ ប្រព័ន្ធដឹកជញ្ជូនឆ្លាតវៃ (ITS - Intelligent Transport System) សម្រាប់ប្រទេសកម្ពុជា ក្រោមការគាំទ្ររបស់ក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនកូរ៉េ តាមរយៈប្រព័ន្ធវីដេអូពីចម្ងាយ កាលពីថ្ងៃ១០កើត ខែស្រាពណ៍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃពុធ ទី១៨ ខែសីហា ឆ្នាំ២០២១ នៅទីស្តីការក្រសួង។ក្នុងឱកាសនោះ ឯកឧត្តម ឈួន វ៉ន់ បានមាន​ប្រសាសន៍ថ្លែងអំណរគុណ ចំពោះ រដ្ឋាភិបាលសាធារណរដ្ឋកូរ៉េ ជាពិសេសក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនកូរ៉េ និងមជ្ឈមណ្ឌលស្រាវជ្រាវកូរ៉េ ដែលបានផ្តល់ការគាំទ្រដល់ការរៀបចំផែនការមេ ប្រព័ន្ធដឹកជញ្ជូនឆ្លាតវៃ សម្រាប់ប្រទេសកម្ពុជា។ទន្ទឹមនឹងនេះ ឯកឧត្តមអគ្គនាយកបាន​គូសបញ្ជាក់ថា បច្ចុប្បន្ននេះបច្ចេកវិទ្យាទំនើបពិតជាផ្ដល់ឱកាសឱ្យយើងទាំងអស់គ្នាបានអភិវឌ្ឍន៍វិស័យដឹកជញ្ជូន ឱ្យមានការរីកចម្រើន ដូច​ជារថយន្តដើរដោយថាមពលអគ្គិសនី កំពុងមានការប្រើប្រាស់នាពេលបច្ចុប្បន្ននេះ និង​ ដើម្បីសម្របខ្លួនទៅនឹងការរីកចម្រើននៃបច្ចេកវិទ្យានេះ ក្រសួងសាធារណការ និងដឹកជញ្ជូនត្រូវការធ្វើបច្ចុប្បន្នភាព និងរៀបចំផែនការមេ ប្រព័ន្ធដឹកជញ្ជូនឆ្លាតវៃ ឱ្យមានប្រសិទ្ធភាព ដើម្បីឆ្លើយតប និងដោះស្រាយបញ្ហាទាក់ទងនឹងការដឹកជញ្ជូនដែលយើងកំពុងប្រឈមនាពេលបច្ចុប្បន្ននេះ។ ជាមួយគ្នានេះដែរ ឯកឧត្តម​អគ្គនាយក​បាន​គូសបញ្ជាក់ អំពីការប្ដេជ្ញាចិត្តរបស់ក្រសួង ក្នុងការសម្របសម្រួលជាមួយក្រសួង ស្ថាប័នពាក់ព័ន្ធ សង្គមស៊ីវិល និងភាគីពាក់ព័ន្ធទាំងឡាយ ដើម្បីអភិវឌ្ឍន៍គម្រោងនេះឱ្យបានជោគជ័យ និង​សម្តែងក្តីសង្ឃឹមយ៉ាងមុតមាំថា ការរៀបចំផែនការមេ ប្រព័ន្ធដឹកជញ្ជូនឆ្លាតវៃ (ITS - Intelligent Transport System) នេះ នឹងអាចបញ្ចប់ក្នុងរយៈពេលមួយឆ្នាំ តាមផែនការដែលបានកំណត់ ដើម្បីគ្រប់ភាគីពាក់ព័ន្ធទាំងឡាយរួមគ្នាអនុវត្តន៍ឱ្យមានបានជោគជ័យ។ សូមបញ្ជាក់ថា សាធារណរដ្ឋកូរ៉េ បានអនុម័តគម្រោងប្រព័ន្ធដឹកជញ្ជូនឆ្លាតវៃក្រោមរូបភាពជាជំនួយអភិវឌ្ឍន៍ផ្លូវការ (Official Development Assistance) ដើម្បីជួយធ្វើឱ្យប្រសើរឡើងដល់វិស័យដឹកជញ្ជូនកម្ពុជា ដោយមានការចូលរួមសហការពីក្រសួងសាធារ ណ​ការ និងដឹកជញ្ជូនកម្ពុជា ក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនកូរ៉េ និងសមាគមសាងសង់នៅបរទេសរបស់កូរ៉េផងដែរ។ ប្រព័ន្ធដឹកជញ្ជូនឆ្លាតវៃនេះ គឺជាបច្ចេកវិទ្យាទំនើបអាចប្រើប្រាស់ ដើម្បីគ្រប់គ្រងបណ្តាញផ្លូវថ្នល់ ជួយសម្រួលដល់ការងារគ្រប់ គ្រង និងត្រួតពិនិត្យមធ្យោបាយដឹកជញ្ជូន ក្នុងពេលវេលាជាក់ស្តែង ប្រមូល និងប្រើប្រាស់ព័ត៌មានចរាចរណ៍ក្នុងពេលវេលាជាក់ស្តែង មិនបង្កផលប៉ះពាល់បរិស្ថាន និងជាប្រព័ន្ធប្រមូលទិន្នន័យ និងព័ត៌មានយកមកវិភាគ និងជួយឱ្យដំណើរការចរាចរណ៍ប្រព្រឹត្តទៅដោយរលូន៕