កម្ពុជា បានចាប់ផ្តើមសាងសង់អគារមន្ទីរពិសោធន៍​វត្ថុធាតុដើមផ្លូវថ្នល់ ដែលគ្រោងចំ​ណាយថវិកាប្រមាណ ​៥៨ម៉ឺនដុល្លារ។ ការសាងសង់អគារមន្ទីរពិសោធន៍នេះ ជាផ្នែកមួយនៃ​គម្រោងនវានុវត្តន៍ប្រព័ន្ធសាងសង់ និងគ្រប់គ្រងផ្លូវថ្នល់ក្នុងប្រទេសកម្ពុជា ដែលជាជំនួយ​របស់សាធារណរដ្ឋកូរ៉េ។ក្រសួងសាធារណការ និងដឹកជញ្ជូន បានបញ្ជាក់ថា អគារពិសោនធ៍នេះ មានកម្ពស់២ជាន់ ​ទំហំ​១៨ម៉ែត្រ គុណនឹង២៥ម៉ែត្រ ដែលនឹងចំណាយ​​​ពេលសាង​សង់ប្រមាណ៧ខែ ពោលគឺគ្រោងបញ្ចប់នៅខែមីនា ឆ្នាំ២០២២។ ប្រភពដដែលបញ្ជាក់ទៀតថា អគារ​នេះ​ មាន​បន្ទប់ពិសោធន៍កៅស៊ូ​ បេតុង ​ បន្ទប់ថែទាំបេតុង និងរក្សាទុក រួមទាំងការិយាល័យជាដើម។ ថ្លែងក្នុងពិធីបញ្ចុះបឋមសិលាសាងសង់អគារមន្ទីរពិសោធន៍ នៅថ្ងៃទី១៦ ខែសីហា​ លោក ស៊ុន ចាន់ថុល បានសង្កត់ធ្ងន់ថា អគារនេះ នឹងបម្រើដល់ការសិក្សាស្រាវជ្រាវ និងពិសោធន៍វត្ថុធាតុដើមផ្លូវថ្នល់ រួមទាំងបណ្តុះបណ្តាលធនធានវិស្វករ និងមន្ត្រីបច្ចេកទេសជាន់ខ្ពស់របស់វិទ្យាស្ថានតេជោសែនសាធារណការ និងដឹកជញ្ជូន ដែលបច្ចុប្បន្នមាននិស្សិតចំនួន១៩១នាក់។ ពួកគេ​ទាំងនោះ កំពុង​សិក្សាលើមុខជំនាញចំនួន៦ រួមមានជំនាញផ្លូវថ្នល់ ផ្លូវល្បឿនលឿន ស្ពាន ផ្លូវដែក និង​កំពង់ផែ, ជំនាញប្រព័ន្ធចម្រោះទឹកកខ្វក់, ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក, ជំនាញគ្រប់គ្រងភស្តុភារកម្ម និងខ្សែច្រវ៉ាក់ផ្គត់ផ្គង់ និង ជំនាញបរិបាលនាវា និងម៉ាស៊ីននាវា។ នេះបើតាមលោក ស៊ុន ចាន់ថុល។ ​សូមបញ្ជាក់ថា​ វិទ្យាស្ថានតេជោសែនសាធារណការ និងដឹកជញ្ជូន បានទទួលជំនួយឥតសំណង ដែលមានទឹកប្រាក់ចំនួន៣.៩២០​ លានវ៉ុន ​ស្មើនឹងជាង៣.២លានដុល្លារអាមេរិក ​ ពីក្រសួងរៀបចំដែនដីហេដ្ឋារចនាសម្ព័ន្ធ និងដឹកជញ្ជូន (MOLIT) នៃសាធារណរដ្ឋកូរ៉េ តាមរយៈវិទ្យាស្ថានកូរ៉េសំណងស៊ីវិល និងបច្ចេកវិទ្យាសាងសង់ (KICT) នៃ«គម្រោងនវានុវត្តន៍ប្រព័ន្ធសាងសង់ និងគ្រប់គ្រងផ្លូវថ្នល់ក្នុងប្រទេសកម្ពុជា»​។ គម្រោងនេះ ចាប់ផ្តើមពី​ ​២០២០ ដល់ឆ្នាំ២០២៣ ដោយផ្តោត​សំខាន់លើការផ្តល់​ជំនួយឧបករណ៍ពិសោធន៍ សម្រាប់វាយតម្លៃគុណភាពផ្លូវថ្នល់។ ផ្តល់អគារមន្ទីរពិសោធន៍បច្ចេកវិទ្យាសំណង់ សម្រាប់សិក្សាស្រាវជ្រាវ និងពិសោធន៍គុណភាពវត្ថុធាតុផ្លូវថ្នល់។ រថយន្តអង្កេតផ្លូវថ្នល់ស្វ័យប្រវត្តិ ​ សម្រាប់ប្រមូលទិន្នន័យគុណភាពផ្លូវថ្នល់។ កម្មវិធីគ្រប់គ្រងផ្លូវថ្នល់ និង ​ការបណ្តុះបណ្តាលបច្ចេកទេសហេដ្ឋារចនាសម្ព័ន្ធផ្លូវថ្នល់ ដល់មន្ត្រីជំនាញពាក់ព័ន្ធ៕