ភ្នំពេញ៖ ឯកឧត្តម ហឿន សំនៀង នាយកវិទ្យាស្ថានតេជោសែនសាធារណការ និងដឹកជញ្ជូន និងជាអគ្គលេខាធិការក្លឹបហែលទឹកនៃក្រសួងសាធារណការ និងដឹកជញ្ជូន តំណាងឯកឧត្តមរដ្ឋលេខាធិការប្រធានក្លឹប រស់ វណ្ណា កាលពីថ្ងៃព្រហស្បតិ៍ ទី១៥ ខែកក្កដា ឆ្នាំ២០២១កន្លងទៅថ្មីៗនេះ បានជួបសំណេះសំណាលជាមួយកីឡាការិនីហែលទឹក ឃឿន ប៊ុនពេជ្រមរកត មកពីក្លឹបហែលទឹកក្រសួងសាធារណការ និងដឹកជញ្ជូន ដែលត្រូវបានជ្រើសរើសដោយសហព័ន្ធហែលទឹកអន្តរជាតិឱ្យទៅចូលរួមការប្រកួតក្នុងព្រឹត្តិការណ៍កីឡាអូឡាំពិកនៅប្រទេសជប៉ុន ដឹកនាំដោយគ្រូបង្វឹក ហែម ពន្លឺ គ្រោងនឹងចេញដំណើរនៅថ្ងៃទី២០ ខែកក្កដា ឆ្នាំ២០២១ នឹងវិលត្រឡប់មកវិញនៅដើមខែសីហា ឆ្នាំ២០២១ ខាងមុខ។ នឆឱកាសនោះ ឯកឧត្តមអគ្គលេខាធិការ បានណែនាំឱ្យកីឡាការិនីអនុវត្តតាមគោលការណ៍ណែនាំរបស់ក្លឹបឱ្យបានខ្ជាប់ខ្ជួន ដូចជាការហូបចុកចំណីអាហារឱ្យបានត្រឹមត្រូវតាមក្បួនខ្នាត គេងឱ្យបានគ្រប់គ្រាន់ រក្សាអត្តចរិតល្អក្នុងភាពជាកីឡាការិនី ដើម្បីនាំយកនូវកិត្តិយសជូនជាតិ។ ឯកឧត្តម ហឿន សំនៀង បានជូនពរដល់កីឡាការិនីឱ្យទទួលបានជ័យជម្នះនៅក្នុងការប្រកួត និងបានឧបត្ថម្ភថវិកាលើកទឹកចិត្តមួយចំនួនជូនដល់កីឡាការិនីមួយចំនួន និងគ្រូបង្វឹកផងដែរ។ សូមជម្រាបជូនថា ព្រឹត្តិការណ៍កីឡាអូឡាំពិកនេះ នឹងមានបេក្ខភាពប្រទេសចំនួប្រមាណ២០៦ប្រទេសមកពីជុំវិញពិភពលោក ចូលរួមការប្រកួត ហើយទាក់ទងនឹងវិញ្ញាសាហែលទឹក ព្រឹត្តិការណ៍កីឡានេះមានចំនួន៣៨វិញ្ញាសាដោយក្នុងនោះ កីឡាការិនីកម្ពុជានឹងចូលរួមប្រកួតលើវិញ្ញាសាហែលសេរីចម្ងាយ៥០ម៉ែត្រ ដែលមានកីឡាករកីឡាការិនីអន្តរជាតិចូលរួមប្រកួតប្រមាណ១០០រូប។ គួរកត់សម្គាល់ផងដែរថា ក្លឹបហែលទឹកក្រសួងសាធារណការ និងដឹកជញ្ជូនមានកីឡាករ កីឡាការិនីចូលរួមហ្វឹកហាត់ចំនួន១២រូប និងគ្រូបង្វឹកចំនួន៣រូប មានរបបហ្វឹកហាត់ចំនួន ៦ ថ្ងៃក្នុងមួយសប្តាហ៍ ចាប់ពីថ្ងៃច័ន្ទ ដល់ថ្ងៃសៅរ៍ ពីរលើកក្នុងមួយថ្ងៃ ពេលព្រឹក និងពេលរសៀល៕