ភ្នំពេញ៖ ក្រុមការងារចល័តចម្រុះ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានឆ្មក់ចុះត្រួតពិនិត្យ និងឃាត់យានយន្តដឹកលើសទម្ងន់កម្រិតកំណត់ចំនួន ២០គ្រឿង ក្នុងខេត្តសៀមរាប កណ្តាល និងខេត្តកំពង់ស្ពឺ ក្នុងប្រតិបត្តិការរយៈពេល ២ថ្ងៃ គឺថ្ងៃទី១២-១៣ ខែកក្កដា ឆ្នាំ២០២១។យោងតាមរបាយការណ៍ បានឱ្យដឹងនៅព្រឹកថ្ងៃទី១៤ ខែកក្កដា ឆ្នាំ២០២១ ថា ក្នុងប្រតិបត្តិការ នៅខេត្តសៀមរាប ក្នុងសង្កាត់គោកចក ក្រុងសៀមរាប ក្រុមការងារបានត្រួតពិនិត្យយានយន្តដឹកជញ្ជូនចំនួន ១៣គ្រឿង ដោយលើសទម្ងន់កម្រិតកំណត់ចាប់ពី ៥តោន ដល់ ២៨តោន មានចំនួន៧គ្រឿង ក្នុងនោះយានយន្តចំនួន ៣គ្រឿង ដែលលើសចាប់ពី ២០ភាគរយនៃទម្ងន់អនុញ្ញាត ត្រូវឃាត់ទុករយៈពេល១ឆ្នាំ។ នៅខេត្តកណ្តាល លើផ្លូវជាតិលេខ២០ ក្រុមការងារ បានត្រួតពិនិត្យយានយន្តដឹកជញ្ជូនចំនួន ៧គ្រឿង ដោយលើសទម្ងន់កម្រិតកំណត់ចាប់ពី១០តោន ដល់ ២២តោន ទាំង ៧គ្រឿង ដែលលើសទម្ងន់ចាប់ពី ២០ភាគរយ នៃទម្ងន់អនុញ្ញាត ត្រូវឃាត់ទុករយៈពេល១ឆ្នាំ។ដោយឡែក ក្នុងប្រតិបត្តិការចុងក្រោយលើផ្លូវជាតិលេខ៤១ ស្រុកគងពិសី ខេត្តកំពង់ស្ពឺ ក្រុមការងារ បានត្រួតពិនិត្យយានយន្តដឹកជញ្ជូនចំនួន ៦គ្រឿង ដោយដឹកលើសទម្ងន់កម្រិតកំណត់ចាប់ពី ១៥តោន ដល់២០តោន ចំនួន ៦គ្រឿង ក្នុងនោះយានយន្តចំនួន ៤គ្រឿង ដែលដឹកលើសទម្ងន់ចាប់ពី ២០ភាគរយ នៃទម្ងន់អនុញ្ញាតត្រូវឃាត់ទុក១ឆ្នាំ។ របាយការណ៍បានបញ្ជាក់ទៀតថា ក្នុងចំណោមយានយន្តចំនួន ២០គ្រឿង ដែលចាប់ឃាត់ ក្នុងនោះ យានយន្តចំនួន ១៤គ្រឿង នឹងត្រូវឃាត់ទុកចំនួន ១ឆ្នាំ ដោយអនុលោមតាមច្បាប់ស្តីពីផ្លូវថ្នល់ មាត្រា៦០ និងសេចក្ដីជូនដំណឹង លេខ០៤៩ សជណ សក. គតលទ ស្តីពី ការពង្រឹងវិធានការយ៉ាងតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់។ ក្រសួងសាធារណការ និងដឹកជញ្ជូន ក៏បានបន្តក្រើនរំលឹកជូនដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ទាំងអស់ ថា ក្រសួងនឹងបន្តអនុវត្តតាមច្បាប់ និងសេចក្ដីជូនដំណឹងយ៉ាងតឹងបំផុតដោយគ្មានការលើកលែងឡើយ៕