ស្ទឹងត្រែង៖ ប្រជាពលរដ្ឋមានផ្ទះនៅតាមដងផ្លូវលេខ៦៤នឹងចៀសផុតពីភាពអាប់អួរនៃលំអងធូលីដោយសារសកម្មភាពធ្វើផ្លូវ ព្រោះក្រុមការងារស្ថាបនាបាន ពន្លឿនការអ៊ុតកៅស៊ូផ្លូវនេះឱ្យហើយនៅក្នុងខែកក្កដា ២០២១នេះតែម្តង ។ ក្នុងសកម្មភាពចាក់កៅស៊ូលើផ្លូវជាតិលេខ៦៤នៅក្នុងក្រុងស្ទឹងត្រែង ថ្ងៃទី០២ ខែកក្កដានេះ លោកស គឹមណាត ប្រធានមន្ទីរសាធារណការនិងដឹកជញ្ជូនខេត្តស្ទឹងត្រែង បានបញ្ជាក់ថា៖ ក្រុមការងារកំពុងធ្វើសកម្មភាព ពន្លឿនការស្ថាបនាផ្លូវនេះឱ្យហើយនៅក្នុងខែកក្កដា ដើម្បីប្រជាពលរដ្ឋស្រួលធ្វើចរាចរណ៍ទៅមក និងចៀសវាងបាន ពីភាពលំបាក ដែលពីមុនផ្លូវនេះតូចចង្អៀតហើយខូចស្ទើរតែទាំងស្រុងនោះ។ លោកបន្តថា៖ នៅពេលស្ថាបនាហើយផ្លូវលេខ៦៤នេះមានទំហំធំជាងមុន២ដងតភ្ជាប់ពីផ្លូវកេងទៅស្ពានមេគង្គ ទៅភ្ជាប់និងផ្លូវលេខ០៩ថ្មីឆ្ពោះទៅខេត្តព្រះវិហារ និងទៅកាន់ផ្លូវជាតិលេខ០៧ចេញទៅខេត្តក្រចេះ និងបានលើកស្ទួយសោភ័ណភាព ទីក្រុងឱ្យកាន់តែស្អាតផងដែរ។ លោកញឹប សំអុន ប្រជាពលរដ្ឋនៅភូមិរាជានុកូលបានអះអាងថា៖ នេះជាសមិទ្ធផលថ្មីមួយទៀតនៅឆ្នាំ២០២១នេះ បន្ទាប់ពីខេត្តស្ទឹងត្រែងមានប្រព័ន្ធទឹកស្អាតដ៏ធំស្កឹមស្កៃ សម្រាប់បម្រើឱ្យសេវាសាធារណៈ ស្របតាមគោលនយោបាយរបស់រាជរដ្ឋាភិបាល ធ្វើឱ្យប្រជាពលរដ្ឋរស់នៅតាមបណ្តា ភូមិ ឃុំ មាន ផ្លូវ ស្ពាន ទឹក ភ្លើងប្រើប្រាស់គ្រប់គ្រាន់ ។ លោកបន្តថា៖នៅពេលមានផ្លូវល្អ សូមបងប្អូននាំគ្នាជួយថែរក្សាសម្អាតបរិស្ថានទាំងអស់គ្នា ជាពិសេសជួយសម្អាតតាមមុខផ្ទះដែលបងប្អូនរស់នៅ ហើយធ្វើដំណើរក៏ត្រូវប្រយ័ត្នផងដែរ ។ សូមបញ្ជាក់ថា៖ផ្លូវកៅស៊ូលេខ៦៤នេះមានប្រវែងជាង៩គីឡូម៉ែត្រ ហើយអាជ្ញាធរចាប់ផ្តើមស្ថាបនាជាជំហានៗ ហើយលើកទី៣នេះ មានប្រវែង១.៨០០ម៉ែត្រទទឹង១៨ម៉ែត្រ ដើម្បីធ្វើឱ្យទីប្រជុំជនក្រុងកាន់តែមានសោភ័ណភាព និង ប្រជាពលរដ្ឋងាយស្រួលធ្វើចរាចរណ៍ទៅមកផងដែរ៕