ថ្ងៃអង្គារ ១៣កើត ខែបឋមាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២២ ខែមិថុនា ឆ្នាំ២០២១ លោក ជំទាវ និន សាផុន ប្រធានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា និងឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បាន ដឹកនាំគណៈប្រតិភូចម្រុះចុះពិនិត្យវឌ្ឍនភាពការងារសាងសង់ផ្លូវជាតិលេខ១៤៦B និងផ្លូវជាតិលេខ ១៤៨។ ការចុះត្រួតពិនិត្យនេះធ្វើឡើងដើម្បីត្រួតពិនិត្យលក្ខណៈបច្ចេកទេស តាមដានវឌ្ឍនភាពការងារសាងសង់ និងពិនិត្យថាតើក្រុមហ៊ុនសាងសង់កំពុងអនុវត្តការងារនីមួយៗត្រឹមត្រូវតាមសៀវភៅបន្ទុក ឬកិច្ចសន្យាដែរ ឬទេ ដើម្បីធានាគុណភាពផ្លូវថ្នល់រឹងមាំ និងប្រើប្រាស់ជាប់បានយូអង្វែង។ សូមជម្រាបជូនថា៖ ផ្លូវលេខ១៤៦B និងផ្លូវខេត្តលេខ១៤៨ ចាប់ផ្តើមពីចំណុចប្រសព្វលើផ្លូវជាតិលេខ៤ (ត្រង់ គីឡូម៉ែត្រ ១៧៨ +១៦៥) រួចឆ្លងកាត់លើផ្លូវខេត្តលេខ១៤៨ បញ្ចប់ក្នុងចំណុចប្រសព្វលើផ្លូវជាតិ លេខ៤ (ត្រង់ គីឡូម៉ែត្រ ២២៥ +៥៥០) ផ្លូវជាតិលេខ១៤៦B ចាប់ផ្តើមពីចំណុចប្រសព្វលើផ្លូវជាតិ លេខ៤ (ត្រង់គីឡូ ម៉ែត្រ ១៧៨ +១៦៥) រួចឆ្លងកាត់លើផ្លូវខេត្តលេខ១៤៨ បញ្ចប់ក្នុងចំណុចប្រសព្វ លើផ្លូវជាតិលេខ៤ (ត្រង់គីឡូម៉ែត្រ ២២៥ +៥៥០) ចុះកិច្ចសន្យាសាងសង់នៅថ្ងៃទី១០ ខែមីនា ឆ្នាំ២០២០ ដែលចាប់ផ្តើមសាងសង់ក្នុងកំឡុងខែមេសា ឆ្នាំ២០២០ និងគ្រោង បញ្ចប់នៅក្នុងខែសីហា ឆ្នាំ២០២២។ នៅក្នុងដំណើរចុះពិនិត្យគុណភាពផ្លូវនេះ ឯកឧត្តមទេសរដ្ឋមន្ត្រី បានដឹកនាំក្រុមការងារបច្ចេកទេសជំនាញ ដើម្បីធ្វើតេស្តគុណភាពស្រទាប់ផ្លូវថា តើវាមានគុណភាពជាប់រឹងមាំកម្រិតណា ដោយប្រើប្រាស់ បច្ចេកទេសម៉ាស៊ីនចល័តប្រភេទ FWD ដែលជាម៉ាស៊ីនធ្វើតេស្តគុណភាពផ្លូវ គ្រប់គ្រងដោយក្រុមការងារ ត្រួតពិនិត្យលក្ខណៈបច្ចេកទេសពិសេស ដែលដឹកនាំដោយរដ្ឋលេខាធិការមួយរូប អាចធ្វើតេស្តគុណភាព ប្រកបដោយឯករាជ្យភាព ក្រុមការងារនេះមានម៉ាស៊ីនជាច្រើនគ្រឿងសម្រាប់ចល័តទៅគ្រប់ការដ្ឋានទាំង អស់ដោយគ្មានការជូនដំណឹងជាមុន ដើម្បីធ្វើតេស្ត និងចេញរបាយការណ៍វាយតម្លៃប្រកបសុក្រឹត្យភាព ដោយមិនចំណុះទៅនឹងអង្គភាព ឬគម្រោងណាមួយឡើយ។ គួរកត់សម្គាល់ផងដែរថា៖ ផ្លូវលេខ១៤៦បេ សាងសង់ឡើងក្រោមកញ្ចប់ថវិកាសន្សំរបស់ជាតិ ផ្លូវនេះមាន ប្រវែងសរុប៤៣,០២ គីឡូម៉ែត្រ ក្នុងនោះប្រវែង២១គីឡូម៉ែត្រ ជាប្រភេទផ្លូវបេតុងកៅស៊ូ(AC) កម្រាស់ ៩ សង់ទីម៉ែត្រ ចំណែកប្រវែង២២គីឡូម៉ែត្រទៀតជាប្រភេទផ្លូវបេតុង កម្រាស់ ២៦សង់ទីម៉ែត្រ និងទទឹងផ្លូវ សរុបជារួម១២ម៉ែត្រ៕