ថ្ងៃព្រហស្បតិ៍ ៨កើត ខែបឋមាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៧ ខែមិថុនា ឆ្នាំ២០២១ នៅទីស្តីការក្រសួង ឯកឧត្ដម កែន រដ្ឋា អគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុ នៃក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកវគ្គបណ្ដុះបណ្ដាល ស្ដីពីមូលដ្ឋានគ្រឹះនៃការការពារ ការត្រួតពិនិត្យ ការឆ្លងមេរោគ កូវីដ-១៩ និងបង្ហាញពីរបៀបធ្វើតេស្តរហ័ស ដល់មន្រ្តីរាជការដែលជាជនបង្គោលនៅតាមបណ្ដាអគ្គនាយកដ្ឋានទាំងអស់ នៃក្រសួងសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំក្រសួងទទួលបន្ទុក ក្រុមគ្រូពេទ្យជំនាញនៃក្រសួងសុខាភិបាល និងសិក្ខាកាម ដែលអញ្ជើញមកពីបណ្តាអគ្គនាយកដ្ឋាននានារបស់ក្រសួងសរុបប្រមាណ៤០ រូប។ វគ្គបណ្តុះបណ្តាលនេះរៀបចំឡើង ក្រោមកិច្ចសហការរវាងក្រសួងសាធារណការ និងដឹកជញ្ជូន និងក្រុមគ្រូពេទ្យជំនាញរបស់ក្រសួងសុខាភិបាល ក្នុងគោលបំណងចែករំលែក និងលើកកម្ពស់ចំណេះដឹងដល់សិក្ខាកាមឱ្យបានយល់ដឹង អំពីមូលដ្ឋានគ្រឹះនៃការការពារខ្លួន ការត្រួតពិនិត្យ និងការឆ្លងមេរោគកូវីដ-១៩ ព្រមទាំងរបៀបប្រើប្រាស់ឧបករណ៍ធ្វើតេស្តរហ័សរកមេរោគកូវីដ-១៩(Rapid Test) ដើម្បីទប់ស្កាត់ការចម្លងតគ្នាពីមនុស្សម្នាក់ទៅមនុស្សម្នាក់ទៀតក្នុងពេលបំពេញការងារ ក៏ដូចជាជួយសម្រាលបន្ទុករបស់ក្រសួងសុខាភិបាលបានមួយចំណែកផងដែរ។ ថ្លែងក្នុងកម្មវិធីបើកវគ្គបណ្តុះបណ្តាលនាឱកាសនោះ ឯកឧត្តមអគ្គនាយក បានគូសបញ្ជាក់ថា៖ បញ្ហាជំងឺកូវីដ-១៩ នេះមិនមែនជាបញ្ហារបស់កម្ពុជាតែឯងនោះទេ ប៉ុន្តែវាជាបញ្ហាប្រឈមជាសកលរបស់ប្រជាជននៅក្នុងពិភពលោកទាំងមូល។ នាពេលបច្ចុប្បន្ន ជំងឺកូវីដ-១៩ នៅក្នុងកម្ពុជាយើងក៏នៅតែបន្តរីករាលដាល និងរកឃើញករណីឆ្លងថ្មីជារៀងរាល់ថ្ងៃ ជាពិសេស ព្រឹត្តិការណ៍ ២០ កុម្ភៈ ដែលបានផ្ទុះឡើង និងមិនទាន់អាចបិទបញ្ចប់ ហើយអាត្រាអ្នកឆ្លងថ្មី នៅតែបន្តរកឃើញក្នុងកម្រិតខ្ពស់ ដែលនេះជាកង្វល់និងក្តីបារម្ភមួយសម្រាប់យើងគ្រប់ៗគ្នា។ ឯកឧត្តមអគ្គនាយក បានលើកឡើងពីការយកចិត្តទុករបស់ ឯកឧត្តមទេសរដ្ឋមន្រ្តី ដែលតែងតែបានគិតគូរពីសុខទុក្ខរបស់បុគ្គលិកមន្រ្តីរាជការយើងទាំងអស់ នាពេលកន្លងមក មានដូចជា ការជំរុញឱ្យតាមដានសុខភាពផ្ទាល់ខ្លួនជាប្រចាំ ការរៀបចំឱ្យមានការចាក់វ៉ាក់សាំងនៅទីស្តីការក្រសួងជូនដល់បុគ្គលិកមន្រ្តីរាជការ ព្រមទាំងក្រុមគ្រួសារមន្រ្តី និងការបញ្ជាទិញឧបករណ៍តេស្តរហ័ស(Rapid Test) សម្រាប់ប្រើប្រាស់ក្នុងក្រសួង ការអនុញ្ញាតឱ្យរៀបចំវគ្គបណ្តុះបណ្តាលអំពី ការថែទាំ និងការការពារសុខភាព ពីការឆ្លងជំងឺកូវីដ-១៩ ព្រមទាំងរបៀបនៃការធ្វើតេស្តរហ័ស ដោយសហការជាមួយក្រុមគ្រូពេទ្យជំនាញរបស់ក្រសួងសុខាភិបាលនៅពេលនេះ។ បន្ថែមពីលើនេះ ឯកឧត្តមអគ្គនាយក បានណែនាំឱ្យសិក្ខាកាមទាំងអស់ចេះរស់នៅបន្ស៊ាំខ្លួននៅក្នុង បរិបទថ្មីសម័យកូវីដ-១៩ ពោលគឺត្រូវចេះរស់នៅមានអនាម័យខ្ពស់ តាមរយៈ ការលាងដៃឱ្យបានញឹកញាប់ អនុវត្តវិធានអនាម័យ នៅពេលក្អក ឬកណ្ដាស់ ពាក់ម៉ាសក្នុងករណីចាំបាច់ បន្តអនុវត្តគម្លាត សុវត្ថិភាពសង្គម និងគម្លាតសុវត្ថិ ភាពបុគ្គលដោយជៀសវាងការជួបជុំដែលមានមនុស្សចូលរួមច្រើន ឬដំណើរទៅកាន់ទីកន្លែងដែលមានមនុស្សកុះករជាដើម។ ឯកឧត្តម បានគូសបញ្ជាក់បន្ថែមថា ថ្វីត្បិតតែយើងនៅតែបារម្ភអំពីការឆ្លងជំងឺនេះក្តី ប៉ុន្តែយើងនៅតែមិនអាចកាត់ផ្តាច់ទំនាក់ទំនងក្នុងការងារប្រចាំថ្ងៃ សកម្មភាពការងារសង្គម និងសកម្មភាពសេដ្ឋកិច្ច បាននោះទេ ដែលនេះជាកត្តាជំរុញឱ្យយើងត្រូវតែរៀនបន្សាំខ្លួនក្នុងបរិបទថ្មី សម័យកូវីដ-១៩ ជាមួយនឹងការការពារ និងថែរក្សាសុខភាពផ្ទាល់ខ្លួនជាប្រចាំ។ ឆ្លៀតក្នុងឱកាសនោះផងដែរ ឯកឧត្តមអគ្គនាយក បានជំរុញលើកទឹកចិត្តដល់សិក្ខាកាមទាំងអស់របស់ ក្រសួងឱ្យខិតខំប្រឹងប្រែងរៀនសូត្រឱ្យបានម៉ត់ចត់ និងយកចំណេះដឹងនេះទៅចែករំលែកទៅដល់បងប្អូនមន្ត្រីរាជការរបស់យើងផ្សេងទៀត ដែលមិនបានចូលរួមវគ្គបណ្ដុះបណ្ដាលនេះ ដើម្បីចូលរួមចំណែកក្នុងការបង្ការជំងឺកូវីដ-១៩ទាំងអស់គ្នា ហើយក្នុងករណីត្រូវការជំនួយផ្សេងៗ ឯកឧត្តម បានលើកទឹកចិត្តឱ្យទំនាក់ទំនងមក អគ្គនាយកដ្ឋានរដ្ឋបាល និងហិរញ្ញវត្ថុ ដើម្បីដោះស្រាយបញ្ហាចំពោះមុខឱ្យបានទាន់ពេលវេលា។ គួរកត់សម្គាល់ផងដែរថា៖ ការឆ្លងរីករាលដាលជំងឺកូវីដ-១៩ជាសកលនេះ បានបង្កការរំខានយ៉ាងខ្លាំង ដល់ជីវភាពរស់នៅប្រចាំថ្ងៃរបស់ប្រជាពលរដ្ឋ រាប់ទាំងការគំរាមកំហែងដល់សុខភាពដោយផ្ទាល់និង ប្រយោល និងប៉ះពាល់ដល់វិស័យសេដ្ឋកិច្ច ការអប់រំ និងការអភិវឌ្ឍនានាផងដែរ៕