ឯកអគ្គរដ្ឋទូត​ឥណ្ឌា ប្រចាំ​ព្រះរាជាណាចក្រ​កម្ពុជា លោកស្រី Devyani Uttam Khobragade បានជួបជាមួយ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ដើម្បីពិភាក្សាអំពីទំនាក់ទំនងដ៏ស៊ីជម្រៅ និងរីកចម្រើនរបស់ប្រទេសទាំងពីរ និងកំណត់វិស័យតាមរយៈការប្រើប្រាស់កញ្ចប់ថវិកាប្រមាណ ១០០លានដុល្លារអាមេរិក។ យោងតាមស្ថានទូតឥណ្ឌាប្រចាំកម្ពុជាបានឲ្យដឹងថា លោកស្រី Devyani Uttam Khobragade បានពិភាក្សាអំពីជំនួយសម្រាប់គម្រោងដែលនឹងភ្ជាប់បន្ថែមទៀតរវាងឥណ្ឌា និងកម្ពុជាជាមួយនឹងសក្តានុពលនៃការកសាងផ្លូវឆ្លងកាត់ប្រទេសវៀតណាម និងប្រទេសថៃ។ លោកស្រីបានស្នើឱ្យមានការពង្រីកផ្នែកខាងកើតតាមរយៈផ្លូវហាយវ៉េត្រីភាគីឥណ្ឌា-មីយ៉ាន់ម៉ា-ថៃ (India-Myanmar-Thailand Trilateral Highway) ចូលមកប្រទេសកម្ពុជាតាមរយៈប្រទេសឡាវ និងកសាងផ្លូវបន្ថែមទៀតដើម្បីតភ្ជាប់ប្រទេសវៀតណាម និងថៃ។ លោក ស៊ុន ចាន់ថុល បានទទួលយកគំនិតនេះ ដោយលើកឡើងថាការផ្សារភ្ជាប់ជាមួយឥណ្ឌានឹងជួយលើកកម្ពស់ពាណិជ្ជកម្ម និងបង្កើនការផ្លាស់រវាងប្រទេសទាំងពីរ។ លោកបានបន្ថែមទៀតថាលោកនឹងចាត់មន្ត្រីក្រសួងឱ្យធ្វើការសិក្សាស្រាវជ្រាវលើគម្រោងហេដ្ឋារចនាសម្ព័ន្ធដែលមានសក្តានុពលដើម្បីធ្វើឱ្យគំនិតនេះក្លាយជាការពិតដោយប្រើប្រាស់ឥណទានដែលមានថវិកាប្រមាណ ១០០លានដុល្លារអាមេរិក។ ជាមួយគ្នានេះផងដែរ លោកស្រី Devyani Uttam Khobragade ក៏បានលើកឡើងនូវគម្រោងអាទិភាពសំខាន់ៗមួយចំនួនដែលរួមមាន វិស័យសង្គម វិស័យហេដ្ឋារចនាសម្ព័ន្ធ ការបណ្តុះបណ្តាល និងអភិវឌ្ឍធនធានមនុស្ស ក្រោមក្របខ័ណ្ឌមូលនិធិអាស៊ាន-ឥណ្ឌា ដោយប្រើប្រាស់កញ្ចប់ថវិកាប្រមាណ១០០លានដុល្លារអាមេរិក។ នៅក្នុងកិច្ចប្រជុំ លោក ស៊ុន ចាន់ថុល ក៏បានលើកឡើងពីសារសំខាន់នៃវិទ្យាស្ថានតេជោសែន សាធារណការ និងដឹកជញ្ជូន ដែលអាចផ្តល់ការបណ្តុះបណ្តាលចំណេះជំនាញផ្នែកបច្ចេកទេសដល់វិស្វករកម្ពុជា ដើម្បីបំពេញតាមតម្រូវការសម្រាប់អភិវឌ្ឍន៍សេដ្ឋកិច្ចសង្គម និងអភិវឌ្ឍន៍ហេដ្ឋារចនាសម្ព័ន្ធរបស់កម្ពុជា។ ភាគីទាំងពីរ ក៏បានឆ្លុះបញ្ចាំងពីទំនាក់ទំនងរបស់ឥណ្ឌានិងកម្ពុជាអស់រយៈពេលជាច្រើនឆ្នាំ ខណៈដែលលោកស្រី Devyani Uttam Khobragade បានសាទរចំពោះកិច្ចខិតខំប្រឹងប្រែងរបស់ប្រទេសកម្ពុជាក្នុងការកាត់បន្ថយផលប៉ះពាល់នៃវីរុសកូវីដ-១៩ ។ លើសពីនេះទៅទៀត លោកស្រីបានគូសបញ្ជាក់ពីការខិតខំប្រឹងប្រែងរបស់ប្រទេសឥណ្ឌាក្នុងពេលកន្លងមករួមទាំងគំនិតផ្តួចផ្តើមនានាក្រោមគម្រោង Quick Impact Projects Scheme ដែលរួមមានការកសាងសាលារៀន និងការកែលំអវិស័យទេសចរណ៍ និងសុខាភិបាល។ យោងតាមលោក ស៊ុន ចាន់ថុល គម្រោងនាពេលអនាគតដែលស្ថិតក្រោមគ្រោងការណ៍នេះរួមមានការជួសជុលមណ្ឌលសុខភាពចំនួន ១១ នៅខេត្តកណ្តាល៕