រាជធានីភ្នំពេញ៖​ រដ្ឋមន្រ្តី​ក្រសួងសាធារណការ និងដឹកជញ្ជូន និងក្រុមមន្ត្រី នៃទីភ្នាក់ងារ​ សម្រាប់កិច្ចសហប្រតិបត្តិការអន្តរ ជាតិរបស់កូរ៉េ (Korea International Cooperation Agency, KOICA) កាលពី​ថ្ងៃទី​២៦ កុម្ភៈ ម្សិលមិញ​ បាន​ផ្ដើម​និយាយ​អំពី​លទ្ធភាព​ ក្នុងការធ្វើឲ្យ​ប្រសើរឡើងដល់ផ្លូវទឹក សម្រាប់ការអភិវឌ្ឍភស្តុភារកម្មកំពង់ផែការអភិវឌ្ឍន៍កំពង់ផែទន្លេ ការកំណត់ តំបន់កំពង់ផែ និងជំនួយបច្ចេកទេស ដើម្បីស្វែងរកដំណោះស្រាយបង្កើនការដឹកជញ្ជូនផលិតផលកសិ​កម្ម​ និងទំនិញ តាមផ្លូវទឹក​។ ក្នុងឱកាសនោះ ​ឯកឧត្តម ស៊ុន ចាន់ថុល ក៏បានស្នើឱ្យ KOICA សិក្សាពីលទ្ធភាពនៃការកំណត់តំបន់ កំពង់ផែសម្រាប់ការអភិ វឌ្ឍន៍កំពង់ផែ និងការបាក់ច្រាំងទន្លេ ស្ថិតនៅចំនុចPK32 ផ្លូវជាតិលេខ6A ដែលជាករណីសង្គ្រោះបន្ទាន់មួយ ដែល​កំពុងបង្ក ផលប៉ះពាល់ដល់សកម្មភាពសង្គម និងសេដ្ឋកិច្ច។ ក្នុងនោះ​ឯកឧត្តមរដ្ឋមន្ត្រី ក៏បានស្នើឱ្យភាគីកូរ៉េ ផ្តល់ជំនួយដល់ការសាង់សង់ជម្រាលការពារច្រាំងទន្លេ កុំឱ្យបាក់ផងដែរ​។ លើសពីនេះ​ពាក់ព័ន្ធ នឹងសមុទ្រ​ ឯកឧត្តមទេសរដ្ឋមន្ត្រី បានស្នើឱ្យភាគីកូរ៉េផ្តល់អ្នកជំនាញរយៈពេលយូរទាក់ទង នឹងការ ធ្វើឱ្យមានប្រព័ន្ធ និងបទបញ្ញត្តិច្បាប់ ស្តីពីអ៊ីដ្រូកក្រាហ្វិក(Hydrographic) និងសេវាមហាសមុទ្រ។ ជាការឆ្លើយតប គណៈប្រតិភូ នៃទីភ្នាក់ងារសហប្រតិបត្តិការអន្តរជាតិកូរ៉េ(KOICA)បាន​សន្យាថា នឹងលើក​យក​សំណើទាំង នេះ ទៅ​ពិភាក្សាលម្អិតបន្ថែមទៀត មុន​នឹងឈាន​ដល់​ការសម្រេចផ្ដល់លទ្ធផលយ៉ាងណានោះ៕