បច្ចេកវិទ្យាថ្មីចំនួន២ នឹងត្រៀមដាក់ឱ្យប្រើប្រាស់សាកល្បងនៅលើផ្លូវជាតិមួយចំនួន ដែលនេះជាគំនិតផ្តួចផ្តើម ក្រោមការចង្អុលបង្ហាញរបស់ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដើម្បីសម្រួលដល់ក្រុមការងារត្រួតពិនិត្យ ងាយស្រួលតាមដាន។ រីឯប្រជាពលរដ្ឋ និងក្រុមហ៊ុនដឹកជញ្ជូន ក៏មានភាពងាយស្រួលក្នុងការទទួលបានដំណឹងពីទម្ងន់យានយន្តរបស់ខ្លួននៅតាមដងផ្លូវភ្លាមៗផងដែរ។ នេះតាមការឱ្យដឹងពីក្រសួងសាធារណការ និងដឹកជញ្ជូន បានឱ្យដឹងថា លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងជាប្រធានក្រុមការងារបច្ចេកទេស ដើម្បីដឹកនាំអនុវត្តគម្រោងទំនើបកម្មប្រព័ន្ធបច្ចេកវិទ្យាគ្រប់គ្រងយានយន្តដឹកជញ្ជូនលើសទម្ងន់កម្រិតកំណត់បានធ្វើបទបង្ហាញអំពីបច្ចេកវិទ្យាថ្មីនេះ គឺ AI Camera and Weigh in Motion Sensor Centralized Database Solution System ដែលនឹងដាក់ប្រើប្រាស់សាកល្បងលើផ្លូវជាតិមួយចំនួន។ លោកប្រធាននាយកដ្ឋានផ្លូវថ្នល់ បានធ្វើការសាទរចំពោះការរៀបចំ ជ្រោមជ្រែងទៅលើចក្ខុវិស័យផ្តល់គុណតម្លៃដល់ការធានាអាយុកាលយូរអង្វែងដល់ផ្លូវថ្នល់សាធារណៈជាប្រយោជន៍សាធារណៈ និងសេដ្ឋកិច្ចជាតិ ដែលផ្លូវនីមួយៗ ទំរាំធ្វើការស្ថាបនាឡើងបាន ពិជាត្រូវឆ្លងកាត់ដំណាក់កាលលំបាកៗជាច្រើន និងចំណាយធនធានថវិកាដ៏សន្ធឹកសន្ធាប់។ លោក Makoto Usami ក៏បានវាយតម្លៃខ្ពស់លើបច្ចេកថ្មីរបស់ក្រសួងសាធារណការ និងដឹកជញ្ជូន ដោយប្រើប្រាស់ជញ្ជីង និងកាមេរ៉ាស្វ័យប្រវត្តិ (AI Camera and Weigh in Motion Sensor) ហើយលោកក៏បានចែករំលែកបទពិសោធន៍ នៃការប្រើប្រាស់ជញ្ជីងស្វ័យប្រវត្តិកន្លងមក។ ជាចុងបញ្ចប់ លោក Makoto Usami នឹងលើកយកប្រើប្រាស់បច្ចេកវិទ្យាគ្រប់គ្រងយានយន្តដឹកជញ្ជូនលើសទម្ងន់កម្រិតកំណត់ AI Camera and Weigh in Motion Sensor Centralized Database Solution System របស់ក្រសួងសាធារណការ និងដឹកជញ្ជូន ពិភាក្សាជាមួយភាគីពាក់ព័ន្ធលើគម្រោងធ្វើឱ្យប្រសើរឡើងផ្លូវជាតិលេខ៥ ៕