ថ្ងៃអង្គារ ៧កើត ខែជេស្ន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៨ ខែឧសភា ឆ្នាំ២០២១ នៅទីស្តីការ ក្រសួងសាធារណការ និងដឹកជញ្ជូន ឯកឧត្តម ហេង រត្នពិសិដ្ឋ អគ្គនាយកនៃអគ្គនាយកដ្ឋាន សាធារណការ និងឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋានបច្ចេកទេស បានដឹកនាំកិច្ចប្រជុំពិនិត្យពិភាក្សាលើការងាររៀបចំបញ្ជីគម្រោងអាទិភាព ផែនការ៣ឆ្នាំរំកិល ២០២២-២០២៤លើ គម្រោងសាងសង់ ស្ដារ ជួសជុល និងថែទាំហេដ្ឋារចនាសម្ព័ន្ធផ្លូវថ្នល់ ដោយមានការចូលរួមពីលោកប្រធាននាយកដ្ឋានក្រោមឱវាទនៃអគ្គនាយកដ្ឋានទាំងពីរ ប្រធានមន្ទីសាធារណការរាជធានី-ខេត្ត និងក្រុមការងារបច្ចេកទេសផងដែរ។ ឯកឧត្តមអគ្គនាយកបានណែនាំដល់លោកប្រធាននាយកដ្ឋាន ក៏ដូចជាលោកប្រធានមន្ទីរសាធារណការ និងដឹកជញ្ជូនទាំងអស់ ត្រូវយកចិត្តទុកដាក់លើការរៀបចំគម្រោងឱ្យមានប្រសិទ្ធភាព សាកសិទ្ធភាព និង ទាន់ពេលវេលាក្នុងការតភ្ជាប់ និងសម្រួលដល់ការដឹកជញ្ជូនដើម្បីកាត់បន្ថយពេលវេលា និងថ្លៃដឹកជញ្ជូន ក្នុងនាមជាសេនាធិការរបស់ក្រសួងសាធារណការ និងដឹកជញ្ជូន។ ជាមួយគ្នានេះផងដែរឯកឧត្តមអគ្គនាយក នៃអគ្គនាយកដ្ឋានបច្ចេកទេស ក៏បានជំរុញឱ្យមន្ទីរត្រូវយកចិត្ត ទុកដាក់លើគុណភាពការងារសាងសង់ផ្លូវថ្នល់ជាចំបង ដោយត្រូវពង្រឹង និងពង្រីកនូវចំណេះដឹងបន្ថែម ដល់ក្រុមការងារបច្ចេកទេសរបស់ខ្លួន ក្នុងការសិក្សាស្វែងយល់នូវបទដ្ឋាន ស្តង់ដារ គោលការណ៍ណែនាំ ផ្សេងៗ ដើម្បីឱ្យដើរទាន់បច្ចេកវិទ្យាថ្មីៗលើការងារសាងសង់ហេដ្ឋារចនាសម្ព័ន្ធផ្លូវថ្នល់ ដោយធានានូវការប្រើប្រាស់ផ្លូវថ្នល់ឱ្យបានយូរអង្វែង៕